LOKE HOBENNAN SA PUNTRA
Enamoracion—Parti 1: Mi Ta Cla pa Enamoracion?
E articulo aki lo contesta e siguiente preguntanan:
Kico ta enamoracion?
Pa algun hende, enamoracion ta djis algo leuk pa haci. Pero den e articulo aki, “enamoracion” ta referi na e periodo cu un mucha homber y un mucha muher ta pasa tempo cu otro pa wak si nan lo ta un bon casa pa otro. Pues, ora dos hende ta enamora, nan tin un meta. Enamoracion no ta djis un manera pa haya atencion di un persona di e otro sexo.
Cu tempo, dos persona cu ta namora otro mester tuma un decision: sea nan ta casa cu otro of nan ta stop di namora otro. Ora bo ta cuminsa cu enamoracion, bo mester ta prepara pasobra cualkier un di e dos cosnan ey por sosode.
Cu otro palabra: Si bo ta pensa cu bo ta cla pa enamoracion, bo mester ta cla tambe pa casa.
Cuminsa cu enamoracion sin intencion di casa un dia ta mescos cu solicita pa un trabou sin intencion di acepta un trabou
Bo ta cla pa enamoracion?
Enamoracion por hiba na casamento. Pues, ta importante pa bo pensa riba ki tipo di persona bo ta y ki efecto esey lo tin riba boso relacion. Por ehempel, pensa riba e siguiente puntonan:
Con bo ta trata bo famia? E manera cu bo ta trata bo mayornan y bo rumannan, vooral ora bo tin stress, por mustra con lo bo trata bo casa.
Principio di Bijbel: “Kita tur tipo di amargura malicioso, rabia, furia, gritamento y papiamento di cos ofensivo for di boso, y tambe tur loke ta perhudicial.”—Efesionan 4:31.
Puntra bo mes: Mi mayornan y mi rumannan ta haya cu mi ta trata nan cu respet? Ora nos no ta di acuerdo cu otro tocante algo, mi por papia trankil cu nan of mi ta rabia y cuminsa pleita cu nan?
Si aworaki bo no por soluciona desacuerdo cu bo mayornan, bo ta kere cu ora bo ta casa si bo lo por soluciona desacuerdo cu bo casa?
Si bo por sacrifica cierto cos. Ora bo ta casa, bo tin cu tene cuenta cu e deseonan di bo casa, y hopi biaha, lo bo tin cu complac’e.
Principio di Bijbel: “Laga cada hende sigui busca, no su mes beneficio, sino esun di e otro persona.”—1 Corintionan 10:24.
Puntra bo mes: Semper mi ta insisti pa cos bay manera ami kier pa nan bay? Otro hende ta haya cu mi ta un hende rasonabel, of flexibel? Con mi a yega di mustra cu e necesidadnan di otro hende ta mas importante cu esnan di mi?
Si bo ta un hende humilde. Un bon casa ta admiti ora e haci fout, y e ta pidi despensa.
Principio di Bijbel: “Nos tur ta faya hopi biaha.”—Santiago 3:2, nota.
Puntra bo mes: Mi ta admiti mesora cu mi a haci un fout, of mi ta bin cu yen di excuus? Mi tin tendencia di rabia lihe ora hende duna mi un conseho pa mi mehora den algo?
Con bo ta uza bo placa? Un di e cosnan cu hopi biaha ta trece problema den matrimonio ta placa. Pues, un hende cu ta uza su placa na un manera responsabel ta evita e tipo di problemanan ey den su matrimonio.
Principio di Bijbel: “Cua di boso cu kier traha un toren no ta sinta calcula e gasto prome pa wak si e tin suficiente pa cab’e?”—Lucas 14:28.
Puntra bo mes: Mi ta pensa bon con pa uza mi placa of mi ta gasta placa pa loco y semper mi tin debe? Con mi a yega di mustra cu mi por uza placa na un manera responsabel?
Con bon bo ta spiritualmente? Si bo ta Testigo di Jehova, bo mester ta un hende cu ta studia Bijbel regularmente y cu ta bay reunion regularmente.
Principio di Bijbel: “Feliz ta esnan cu ta consciente di nan necesidad spiritual, ya cu e Reino di cielo ta di nan.”—Mateo 5:3.
Puntra bo mes: Mi ta haci esfuerso pa mantene mi fe fuerte? Mi adoracion na Jehova ta e cos di mas importante pa mi of mi ta laga otro cos stroba mi?
Cu otro palabra: E persona cu bo ta casa cu ne merece un bon casa. Si bo ta haci bo best pa ta un persona asina, tin hopi chens cu lo bo atrae un hende cu tambe ta haciendo su best pa ta un bon casa.
