No. Henter Bijbel ta cuadra cu otro, for di cuminsamento te final. Aunke tin cierto partinan di Bijbel cu kisas ta parce contradictorio, lo bo por compronde nan mihor si bo aplica e siguiente principionan:

1.   Analisa e contexto. Cualkier autor por parce di ta contradeci su mes si bo saca su palabranan for di contexto.

2.   Analisa e punto di bista di e autor. Aunke testigonan ocular por describi un suceso cu exactitud, nan no mester uza e mesun palabranan ni inclui e mesun detayenan.

3.   Tene cuenta cu datonan historico y custumbernan.

4.   Mester compronde den ki sentido ta uza cierto palabranan. Den sentido literal of figurativo.

5.   Corda cu nan por bisa cu un persona a haci algo, aunke e no a hacie personalmente. a

6.   Uza un traduccion di Bijbel cu ta exacto.

7.   No purba harmonisa doctrina religioso falso cu loke Bijbel ta bisa.

 E siguiente ehempelnan lo yuda nos mira con e principionan aki ta splica algun punto cu por parce contradictorio den Bijbel.

Principio 1: Contexto

  Si Dios a sosega riba e di shete dia, dicon Bijbel ta bisa cu el a sigui traha? E buki biblico di Genesis ta bisa cu “riba e di shete dia el a sosega di tur su trabou cu el a haci.” E palabranan ey ta referi specificamente na su trabou di crea cos cu tin di haber cu nos planeta. (Genesis 2:​2-4) Pues, Hesus no a contradeci esaki ora el a bisa cu Dios “ta traha te ainda,” pasobra e tabata papia di un otro tipo di trabou cu Dios ta haci. (Juan 5: 17) Dios su trabou ta inclui inspira hende pa skirbi Bijbel, guia y cuida humanidad.—Salmo 20:6; 105:5; 2 Pedro 1:​21.

Principio 2 y 3: Punto di bista y historia

  Na unda Hesus a cura e homber ciego? E buki di Lucas ta bisa cu Hesus a cura un homber ciego “ora e tabata yegando Jerico.” Pero ora Mateo a conta e mesun relato, el a menciona dos homber ciego y a bisa cu e incidente a tuma luga ora “e tabata sali for di Jerico.” (Lucas 18:35-​43; Mateo 20:29-​34) E dos relatonan aki ta skirbi for di dos punto di bista diferente y eigenlijk nan ta complimenta otro. Relaciona cu e cantidad di homber cu Hesus a cura, Mateo tabata mas specifico y a menciona cu nan tabata dos. En cambio, Lucas a focus riba e homber cu Hesus a papia cu ne. Y pa loke ta e luga caminda Hesus a cura nan, arkeologonan a descubri cu den tempo di Hesus Jerico tabata dos stad den uno. Un tabata un stad bieu hudiu y e otro un stad romano mas nobo. Nan tabata situa un kilometer y mei leu for di otro y Hesus mas sigur tabata entre e dos stadnan aki ora el a haci e milager.

Principio 4: Palabranan literal y figurativo

  Tera lo ser destrui? Bijbel ta bisa na Eclesiastes 1:4 cu “tera ta permanece pa semper.” Pa cierto hende esey por parce contradictorio pasobra Bijbel ta bisa cu “e elementonan, siendo intensamente cayente ... lo larga caba na nada”—hunto cu e tera. (2 Pedro 3:10) Pero Bijbel ta uza e palabra “tera” den sentido literal pa referi na nos planeta y den sentido figurativo pa referi na hende cu ta biba riba dje. (Genesis 1:1; 11:1) E destruccion di e “tera” menciona na 2 Pedro 3:10 no ta referi na e kimamento di nos planeta, sino na “e destruccion di hende malbado”.—2 Pedro 3:7.

Principio 5: Representacion

  Na Capernaum, ken a hiba e peticion di e oficial di ehercito pa Hesus? Mateo 8:5 y 6 ta bisa cu ta e oficial di ehercito mes a bay cerca Hesus, pero Lucas 7:3 ta bisa cu e oficial a manda algun anciano di e Hudiunan pa hiba su peticion. Esaki no ta un contradiccion pasobra loke a sosode ta cu e peticion a bin originalmente di e oficial di ehercito, pero en bes di bay personalmente el a manda e ancianonan como su representantenan.

Principio 6: Traduccion exacto

  Nos tur ta peca? Bijbel ta bisa cu nos tur a hereda pica di e prome homber Adam. (Romanonan 5:12) Algun traduccion ta parce di contradeci esaki door di bisa cu un bon hende “no sa peca.” (1 Juan 3:6, The Bible in Basic English) Pero den e idioma original, e verbo Griego pa “peca” na 1 Juan 3:6 ta den tempo presente, cu normalmente ta indica un accion continuo. Tin un diferencia entre pica cu nos a hereda, pica cu nos no por scapa for di dje, y pica cu nos ta practica ora nos scoge pa desobedece Dios su mandamentonan intencionalmente y continuamente. Pesey tin algun traduccion cu a clarifica esaki door di uza frasenan mas exacto manera “no ta practica pica.”—Traduccion di Mundo Nobo; Phillips.

Principio 7: Bijbel, no doctrina

  Hesus ta igual cu Dios of menos importante cu Dios? Hesus a yega di bisa: “Ami cu e Tata ta un.” Esey ta parce di contradeci un otro cos cu el a bisa: “E Tata ta mas cu mi.” (Juan 10:30; 14:28) Pa nos por compronde e textonan aki corectamente, nos tin cu analisa kico Bijbel ta bisa realmente tocante Jehova y Hesus y no purba harmonisa e textonan ey cu e siñansa di Trinidad; un siñansa cu no ta basa riba Bijbel. Bijbel no ta djis bisa cu Jehova ta Tata di Hesus, pero e ta bisa tambe cu Jehova ta Hesus su Dios, Esun cu hasta Hesus ta adora. (Mateo 4:​10; Marco 15:34; Juan 17:3; 20:17; 2 Corintionan 1:3) Hesus no ta igual cu Dios.

 E contexto di e palabranan di Hesus “ami cu e Tata ta un” ta mustra cu e ta papia tocante e union cu tin entre e cu su Tata, Jehova Dios. Hesus a bisa un poco despues: “E Tata ta den union cu mi y ami ta den union cu mi Tata.” (Juan 10:38) E mesun union aki ta existi entre Hesus y su siguidornan. Pesey el a haci oracion pa nan: ”Mi a duna nan e gloria cu bo a duna mi, ya nan por ta un mescos cu nos ta un. Ami ta den union cu nan, y abo ta den union cu mi, ya nan por ta realmente uni.”—Juan 17:22, 23