E boluntad di Dios ta pa bo conoc’e como persona, hala cerca dje, anto stim’e y sirbie cu henter bo curason. (Mateo 22:37, 38; Santiago 4:8) Pa bo por siña con pa haci e boluntad di Dios, ta bon pa bo analisa e bida y siñansanan di Hesus. (Juan 7:16, 17) Hesus no solamente a papia di e boluntad di Dios, sino el a biba tambe na harmonia cu ne. En realidad, Hesus a bisa cu su proposito den bida no tabata “pa haci [su] boluntad, ma pa haci boluntad di esun cu a mand’e.”—Juan 6:38.

Mi mester haya un señal, vision of yamada special pa sa kico Dios kier pa mi haci?

 No, pasobra Bijbel ta contene e mensahe cu Dios tin pa humanidad. E tin tur loke bo mester pa bo ta “completamente prepara pa tur bon obra.” (2 Timoteo 3:16, 17) Dios kier pa bo uza Bijbel hunto cu bo “capacidad di pensa” pa haya sa kico e ta spera di bo.—Romanonan 12:1, 2; Efesionan 5:17.

Di berdad mi por haci Dios su boluntad?

 Si, pasobra Bijbel ta bisa di Dios cu “su mandamentonan no ta pisa.” (1 Juan 5:3) Esey no kiermen si cu semper ta facil pa obedece Dios su mandamentonan. Pero e beneficionan cu lo bo haya ta mucho mas tanto cu e esfuerso cu bo tin cu haci. Hesus mes a bisa: “Feliz ta esnan cu ta tende e palabra di Dios y ta cumpli cu ne!”—Lucas 11:28.