Dios a duna nos un boluntad liber, esta, e capacidad pa tuma nos mes decisionnan. No ta Dios ta controla nos bida ni nos no ta mara na un destino. Laga nos wak kico Bijbel ta bisa riba e punto aki.

•   Dios a crea hende den su imagen. (Genesis 1:26) Distinto for di bestia cu ta djis bay tras di nan instinto, nos tin e capacidad di refleha e cualidadnan di nos Creador, manera amor y husticia. Y mescos cu nos Creador, nos tin un boluntad liber.

•   Basicamente, ta nos mes ta dicidi nos futuro. Bijbel ta anima nos pa “scoge bida ... door di obedece [Dios] su bos”, esta, scoge pa obedece su mandamentonan. (Deuteronomio 30:19, 20, Beibel Santu) E opcion aki lo no tabatin sentido y lo tabata hasta cruel si nos no tabatin un boluntad liber. En bes di forsa nos pa haci loke e kier, Dios ta anima nos di curason: “Mara bo a pone atencion na mi mandamentonan! E ora ey bo paz lo tabata manera un riu.”—Isaias 48:18, Beibel Santu.

•   Nos exito of fracaso no ta mara na destino. Kico cu bo kier logra den bida, bo tin cu traha pa alcans’e. Bijbel ta bisa: “Tur loke bo man haya pa haci, hacie cu tur bo forsa.” (Eclesiastes 9:10, Beibel Santu) E ta bisa tambe: “E plannan di hende balente siguramente ta conduci na abundancia.”—Proverbionan 21:5, Beibel Santu.

 Boluntad liber ta un regalo precioso di Dios, pasobra esey ta permiti nos stim’e cu “henter [nos] curason”, no pasobra nos ta sinti nos forsa pa haci esey, sino pasobra ta nos mes kier.—Mateo 22:37.

 Bijbel ta siña nos cu Dios ta Todopoderoso, esta, cu su poder no tin limite. (Job 37:23; Isaias 40:26) Sinembargo, e no ta uza su poder pa controla tur cos. Por ehempel, Bijbel ta bisa cu Dios a “domina [su] mes” y no a tuma medida mesora contra Babilonia di antiguedad, un nacion enemigo di su pueblo. (Isaias 42:14, Beibel Santu) Di igual manera, pa un tempo Dios ta opta pa tolera hende cu ta haci mal uzo di nan boluntad liber pa haci daño na otro hende. Pero lo e no haci esey pa semper.—Salmo 37:10, 11.