Bijbel no ta papia specificamente tocante eutanasia. a Pero loke Bijbel ta bisa tocante bida y morto ta yuda nos tin un bista balansa. Bijbel ta bisa cu ta malo pa pone fin na un bida, pero esey no ta nifica cu mester sigui medidanan extremo pa alarga bida.

 Bijbel ta bisa cu Dios ta nos Creador, “e fuente di bida.” (Salmo 36:9, Beibel Santu; Echonan 17:28) Pa Dios bida ta hopi precioso. Pesey, Dios ta condena hende cu ta pone fin na tanto bida di un otro hende como esun di su mes. (Exodo 20:13; 1 Juan 3:15) Ademas, Bijbel ta bisa cu nos mester tuma medida di precaucion rasonabel pa proteha nos bida y di otronan. (Deuteronomio 22:8) Ta bon cla anto cu Dios kier pa nos balora e regalo di bida.

Kico si un hende tin un maleza terminal?

 Bijbel no ta aproba pa pone fin na un hende su bida aunke e tin un maleza incurabel y ta cerca di muri. Pensa riba e ehempel di Rey Saul di Israel. Ora e tabata gravemente herida den un bataya, el a pidi su cargado di arma pa pone un fin na su bida. (1 Samuel 31:3, 4) E cargado di arma a nenga. Sinembargo, despues un homber a gaña cu e si a cumpli cu Saul su deseo. David, kende tabata un persona cu a considera e asunto for di Dios su punto di bista, a condena e homber aki pa dramamento di sanger.​—2 Samuel 1:6-16.

Mester alarga bida cueste loke cueste?

 Ora ta bisto cu un hende ta bay muri, Bijbel no ta bisa cu mester alarga e proceso. Mas bien, Bijbel ta duna nos un bista balansa. Morto ta nos gran enemigo, e resultado di nos condicion pecaminoso. (Romanonan 5:12; 1 Corintionan 15:26) Aunke nos niun no kier muri, nos no mester tin miedo di morto pasobra Dios ta priminti di resucita e hendenan cu muri. (Juan 6:39, 40) Si nos ta mustra respet pa bida, nos lo busca e mihor yudansa medico disponibel. Pero, esey no ta nifica cu nos mester scoge proceduranan medico cu ta djis alarga un hende su bida ora ya ta bisto caba cu e ta den su fase terminal.

Suicidio ta un pica imperdonabel?

 No, Bijbel no ta menciona suicidio ora e ta papia di picanan imperdonabel. Aunke pone fin na bo propio bida ta un pica serio, b Dios ta compronde completamente cu por tin factornan manera problema mental, hopi stress y hasta caracteristicanan genetico cu por hiba na e deseo di comete suicidio. (Salmo 103:13, 14) Mediante Bijbel, Dios ta consola hende cu ta pasa den tempo dificil. Ademas, Bijbel ta priminti cu “lo bay tin un resureccion di tanto hende husto como inhusto.” (Echonan 24:15) Esaki ta mustra cu tin un speransa di resureccion pa hende cu a haci foutnan serio, manera comete suicidio.