Hopi hende cu a hera di muri a bisa cu nan a sinti cu nan a ser separa for di nan curpa, a mira un luz briyante of un luga hopi bunita. “Pa algun hende, e experencia ey a duna nan e privilegio di mira un otro esfera di existencia”, segun e buki Recollections of Death. Maske Bijbel no ta menciona experencia di hende cu a hera di muri, e ta contene un berdad fundamental cu ta mustra cu e experencianan ey sigur no ta vision di un bida despues di morto.

 E mortonan no sa di nada.

Bijbel ta bisa cu e mortonan “no sa nada.” (Eclesiastes 9:5, Beibel Santu) Ora nos muri, nos no ta pasa pa un otro tipo di existencia of dimension, sino simplemente nos ta stop di existi. E siñansa cu nos tin un alma inmortal cu ta bandona e curpa despues di nos morto y sigui biba no ta den Bijbel. (Ezekiel 18:4) Pesey, cualkier experencia cu un hende cu a hera di muri tabatin no por ta un bista adelanta di cielo, fierno of un bida despues di morto.

 Lazaro a papia di un bida despues di morto?

Bijbel ta describi loke a pasa cu Lazaro despues cu e si a muri: Hesus a lant’e for di morto despues cu e tabatin cuater dia morto. (Juan 11:38-44) Si Lazaro tabatin un dushi bida despues di morto, lo tabatin sentido pa Hesus trec’e bek den e mundo aki? Bijbel no ta bisa nada di esey. Ademas, si Lazaro a biba un otro caminda despues di morto, casi sigur lo el a papia tocante esey, no ta berdad? Loke nos por bisa si ta cu Hesus a compara e morto di Lazaro cu un soño, locual ta indica cu Lazaro no tabata consciente di nada ora e tabata morto.—Juan 11:11-14.