Hende Muher den Bijbel—Kico Nos Por Siña for di Nan?

PLAY

Loke Bijbel ta bisa

Bijbel ta papia tocante hopi hende muher. Nos por siña hopi les valioso for di nan bida. (Romanonan 15:4; 2 Timoteo 3:16, 17) Den e articulo aki, nos lo mira brevemente loke algun di nan a haci. Hopi di nan a pone excelente ehempel pa nos imita. Sinembargo, loke algun hende muher a yega di haci ta sirbi como spiertamento pa nos.—1 Corintionan 10:11; Hebreonan 6:12.

Abigail

Ken Abigail tabata? Abigail tabata casa di Nabal, un homber rico pero cruel. Sinembargo, Abigail tabata inteligente, humilde, bunita di apariencia y cu bon cualidad.—1 Samuel 25:3.

Kico Abigail a haci? Abigail a actua sabi; asina, el a evita un desgracia. Abigail y Nabal a biba den e region caminda David, e futuro rey di Israel, tabata sconde tempo cu e tabata fugitivo. Mientras cu David y su soldaatnan tabata eynan, nan a proteha e tounan di carne di Nabal contra ladron. Un dia, David a manda algun mensahero cerca Nabal pa pidie un poco cuminda, pero Nabal a nenga di duna nan cuminda y a trata nan masha malo. Esey a pone David rabia masha hopi! Pues, David a sali bay pa mata Nabal y tur e hende hombernan di Nabal su cas.—1 Samuel 25:10-12, 22.

Ora Abigail a tende loke su casa a haci, el a actua di biaha. El a duna su sirbidornan cuminda pa nan hiba pa David y David su soldaatnan. E mes a bay tras di su sirbidornan pa roga David pa mustra misericordia. (1 Samuel 25:14-19, 24-31) David a acepta e regalo di Abigail y a mira cu Abigail tabata un persona humilde. El a scucha e conseho sabi di Abigail y a reconoce cu Dios a uza Abigail pa evita un tragedia. (1 Samuel 25:32, 33) Poco tempo despues, Nabal a muri y David a casa cu Abigail.—1 Samuel 25:37-41.

Kico nos por siña for di Abigail? Aunke Abigail tabata bunita y rico, e tabatin un punto di bista balansa di su mes. Pa mantene paz, Abigail tabata dispuesto pa pidi despensa pa algo cu e mes no a haci. Abigail a trata e situacion tenso aki cu trankilidad, tacto, curashi y sabiduria.

▸ Pa mas informacion tocante Abigail, wak e articulo “Un Muher Inteligente.”

Ana

Ken Ana tabata? Ana tabata esposa di Elcana, y mama di Samuel, un profeta cu a bira conoci den antiguo Israel.—1 Samuel 1:1, 2, 4-7.

Kico Ana a haci? Ana a busca consuelo cerca Dios pa motibo cu e no tabatin yiu aunke e tabatin hopi aña casa. Esposo di Ana tabatin dos esposa. E otro esposa di Elcana, esta, Penina, si tabatin yiu. Penina tabata haci cherche di Ana, pesey Ana tabata haci oracion na Dios pa haya consuelo. Ana a priminti Dios cu si Dios dun’e un yiu homber, lo el a entrega e yiu ey na Dios pa e yiu sirbi na e tabernakel. E tabernakel tabata un tent portatil cu e Israelitanan tabata uza pa adora Dios.—1 Samuel 1:11.

Dios a contesta Ana su oracion, y Ana a haya un yiu homber, cu el a yama Samuel. Ana a cumpli cu loke el a priminti y a hiba Samuel tabernakel pa el a sirbi eynan for di tempo Samuel tabata mucha. (1 Samuel 1:27, 28) Tur aña, Ana tabata cose un mantel sin manga y hib’e pa Samuel. Cu tempo, Dios a bendiciona Ana cu cinco yiu mas, tres yiu homber y dos yiu muher.—1 Samuel 2:18-21.

Kico nos por siña for di Ana? Ana su oracionnan sincero a yud’e trata cu prueba. E oracion di gradicimento di Ana cu ta registra na 1 Samuel 2:1-10 ta mustra cu Ana tabatin hopi fe den Dios.

▸ Pa mas informacion tocante Ana, wak e articulo “Ana a Desahoga Su Curason Cerca Dios.”
▸ Pa haya sa dicon Dios a permiti poligamia den su pueblo, wak e articulo “Dios ta Aproba Poligamia?”

Dalila

Ken Dalila tabata? Dalila tabata un hende muher cu Samson, un hues di Israel, a enamora di dje.—Huesnan 16:4, 5.

Kico Dalila a haci? Dalila a acepta placa for di e gobernantenan Filisteo pa e traiciona Samson. Dios tabata uzando e hues aki pa salba e Israelitanan for di man di e Filisteonan. E Filisteonan no por a vence Samson pasobra Samson tabatin forsa extraordinario. (Huesnan 13:5) Pues, e gobernantenan a pidi Dalila pa yudansa.

E Filisteonan a uza soborno pa Dalila haya sa con bin Samson tabatin asina tanto forsa. Dalila a acepta e placa, y despues di varios intento el a haya sa e secreto di Samson. (Huesnan 16:15-17) Dalila a conta e Filisteonan e secreto di Samson y nan a gara Samson y ser’e den prizon.—Huesnan 16:18-21.

Kico nos por siña for di Dalila? Loke Dalila a haci ta sirbi como spiertamento pa nos. Golosidad a pone Dalila trata un sirbidor di Dios na un manera engañoso, desleal y egoista.

Debora

Ken Debora tabata? Debora tabata profeta di Jehova, Dios di Israel, y e mester a bisa e pueblo kico Dios tabata kier pa nan haci. Ademas, Jehova a uza Debora pa yuda soluciona problema cu tabatin entre e Israelitanan.—Huesnan 4:4, 5.

Kico Debora a haci? Profeta Debora cu curashi a apoya e sirbidornan di Dios. Jehova a bisa Debora pa manda yama Barak y bisa Barak pa manda e ehercito Israelita den bataya pa bringa contra nan enemigonan Cananeo. (Huesnan 4:6, 7) Ora Barak a pidi Debora pa bay hunto cu ne, Debora no tabatin miedo y a acepta pa bay cu Barak.—Huesnan 4:8, 9.

Dios a yuda e Israelitanan logra un victoria aplastante. Anto Debora a compone por lo menos parti di e cantica cu e y Barak a canta ora nan a conta loke a sosode. Den e cantica ey, Debora a menciona Jael, un otro hende muher balente, cu a hunga un rol importante den derota di e Cananeonan.—Huesnan, capitulo 5.

Kico nos por siña for di Debora? Debora a haci sacrificio pa yuda otro hende y e tabatin curashi. El a anima otro hende pa haci loke ta bon den bista di Dios. Anto ora e hendenan cu el a papia cu ne a haci bon, Debora tabata elogia nan pa loke nan a haci.

▸ Pa mas informacion tocante Debora, wak e articulo “Mi A Lanta Como un Mama pa Israel.”

E mucha muher Sulamita

Ken e mucha muher Sulamita tabata? E tabata un bunita mucha muher di cunucu. E ta e personahe principal den e buki biblico Cantica di Salomon. Bijbel no ta menciona su nomber.

Kico e mucha muher Sulamita a haci? E mucha muher Sulamita a keda fiel na e wardador di carne cu e tabata stima. (Cantica di Salomon 2:16) Su bunitesa a capta atencion di Rey Salomon, kende tabata rico y kier a gana su amor. (Cantica di Salomon 7:6) Aunke otro hende tabata trata di convence e mucha muher Sulamita pa scoge Salomon, el a nenga di haci esey. E tabata stima e humilde wardador di carne y a keda fiel na dje.—Cantica di Salomon 3:5; 7:10; 8:6.

Kico nos por siña for di e mucha muher Sulamita? Aunke e tabata un mucha muher bunita y tabata haya hopi atencion, semper el a keda humilde. E no a laga presion di otro hende, ni e promesa pa bira rico ni pa haya prestigio influenci’e. El a controla su emocionnan y a keda limpi den sentido moral.

Esposa di Lot

Ken e esposa di Lot tabata? Bijbel no ta menciona su nomber. Pero Bijbel ta bisa cu e tabatin dos yiu muher y cu e y su famia tabata biba den e stad Sodoma.—Genesis 19:1, 15.

Kico e esposa di Lot a haci? El a desobedece Dios. Dios a bisa cu e lo destrui Sodoma y e stadnan pega cu ne pasobra nan tabata practica inmoralidad sexual teribel. Debi cu Dios tabata stima Lot y su famia, kendenan tabata biba na Sodoma, Dios a manda dos angel pa saca nan y hiba nan na un luga safe.—Genesis 18:20; 19:1, 12, 13.

E angelnan a bisa famia di Lot pa huy y no wak patras, sino nan lo a muri. (Genesis 19:17) E esposa di Lot “a draai wak patras, y el a bira un pilar di salo.”—Genesis 19:26.

Kico nos por siña for di esposa di Lot? Loke a pasa cu esposa di Lot ta corda nos cu ta masha peligroso pa stima cos material asina tanto te cu nos ta desobedece Dios. Debi na e mal ehempel di esposa di Lot, Hesus a spierta nos: “Corda e casa di Lot.”—Lucas 17:32.

Ester

Ken Ester tabata? Ester tabata un mucha muher Hudiu cu Rey Asuero di Persia a scoge como su reina.

Kico Ester a haci? Reina Ester a uza su influencia pa evita cu nan lo a mata su pueblo. El a haya sa di un decreto cu a indica fecha specifico cu lo a mata tur Hudiu cu tabata biba den e Imperio Perso. Haman, kende tabata e prome minister, a trama e plan malbado ey. (Ester 3:13-15; 4:1, 5) Ester a risca su bida y cu yudansa di su primo, Mardokeo, el a conta su casa, Rey Asuero, di e complot aki. (Ester 4:10-16; 7:1-10) Asuero a laga Ester y Mardokeo saca un otro decreto cu a permiti e Hudiunan defende nan mes. E Hudiunan a logra derota tur nan enemigonan.—Ester 8:5-11; 9:16, 17.

Kico nos por siña for di Ester? Reina Ester a pone un excelente ehempel pa nos. E tabatin curashi; e tabata humilde y modesto. (Salmo 31:24; Filipensenan 2:3) A pesar cu Ester tabata bunita y tabatin un posicion halto, el a busca conseho y yudansa cerca otro hende. Ora el a papia cu su casa, el a uza tacto y a papia cu respet, pero cu curashi. Ademas, Ester no tabatin miedo di identifica su mes como Hudiu, maske tabata un periodo masha peligroso pa e Hudiunan.

▸ Pa mas informacion tocante Ester, wak e articulo “El a Sali na Defensa di e Pueblo di Dios” y “E Tabata Sabi, cu Curashi y Cla pa Sacrifica Su Mes.”

Eva

Ken Eva tabata? Eva tabata e prome hende muher cu Dios a crea y e prome hende muher menciona den Bijbel.

Kico Eva a haci? Eva a desobedece un mandamento cla di Dios. Tanto Adam como Eva tabata sernan humano perfecto. Jehova a crea nan cu e capacidad di tuma nan propio decisionnan y pa cultiva e cualidadnan di Dios, manera amor y sabiduria. (Genesis 1:27) Eva tabata sa cu Dios a bisa Adam cu si nan a come for di un cierto palo, nan lo a muri. Sinembargo, Satanas a gaña Eva y a laga Eva kere cu lo e no muri. De echo, Satanas a convence Eva cu su bida lo tabata mihor si e desobedece Dios. Pues, Eva a come di e fruta y despues el a duna su esposo tambe pa e come for di dje.—Genesis 3:1-6; 1 Timoteo 2:14.

Kico nos por siña for di Eva? Su ehempel ta mustra dicon ta peligroso pa keda pensa riba mal deseo. Eva a desobedece e mandamento di Dios y a cultiva un deseo intenso pa haya algo cu no a pertenece na dje.—Genesis 3:6; 1 Juan 2:16.

Jael

Ken Jael tabata? Jael, un muher no-Israelita, tabata esposa di Heber. Cu curashi Jael a apoya e pueblo di Dios.

Kico Jael a haci? Jael tabata dicidido ora Sisara, hefe di e ehercito Cananeo, a bin na su campamento. Sisara a perde e bataya contra Israel y awor e tabata busca un luga pa sconde y sosega. Jael a invit’e bin den su tent. Mientras Sisara tabata drumi, Jael a mat’e.—Huesnan 4:17-21.

Loke Jael a haci a cumpli cu loke Debora a profetisa: “Señor lo bende Sisara cu un muher.” (Huesnan 4:9) Pesey, Jael a ser elogia como “esun di mas bendiciona di e muhernan.”—Huesnan 5:24.

Kico nos por siña for di Jael? Jael a tuma iniciativa y tabatin curashi. Su ehempel ta mustra cu Dios por haci loke sea ta necesario pa profecia cumpli.

Jezabel

Ken Jezabel tabata? Jezabel tabata esposa di e rey di Israel, Acab. Jezabel no tabata Israelita ni adorador di Jehova. E tabata adora Baal, un dios Cananeo.

Kico Jezabel a haci? Reina Jezabel tabata un muher dominante, malbado y violento. Fuera di promove adoracion na Baal, el a promove inmoralidad sexual, loke tabata forma parti di e adoracion ey. Ademas, el a purba di caba cu adoracion na Jehova, e Dios berdadero.—1 Reynan 18:4, 13; 19:1-3.

Jezabel tabata gaña y asesina hende pa haya loke e tabata kier. (1 Reynan 21:8-16) Manera Jehova a bisa, Jezabel a muri na un manera violento y e no a ser dera.—1 Reynan 21:23; 2 Reynan 9:10, 32-37.

Kico nos por siña for di Jezabel? E ehempel di Jezabel ta un spiertamento pa nos. E tabata asina corupto y cruel cu su nomber a bira simbolo di un muher inmoral, sinberguensa y sin respet pa autoridad.

Lea

Ken Lea tabata? Lea tabata e prome esposa di e patriarca Jacob. Su ruman muher chikito, Raquel, tabata e otro esposa di Jacob.—Genesis 29:20-29.

Kico Lea a haci? Lea a haya seis yiu homber cu Jacob. (Ruth 4:11) Jacob kier a casa cu Raquel y no cu Lea. Sinembargo, Laban, tata di e mucha muhernan, a laga Lea tuma e luga di Raquel. Ora Jacob a haya sa cu el a ser gaña pa casa cu Lea, el a bay papia cu Laban. Laban a splica Jacob cu no tabata e custumber pa casa e yiu di mas chikito prome cu esun mayo. Un siman despues, Jacob a casa cu Raquel.—Genesis 29:26-28.

Jacob tabata stima Raquel mas cu Lea. (Genesis 29:30) Esey a pone cu Lea a bira jaloers y a cuminsa competi cu su ruman muher pa haya Jacob su amor y atencion. Dios a mira con Lea tabata sintie y a bendicion’e cu shete yiu—seis yiu homber y un yiu muher.—Genesis 29:31.

Kico nos por siña for di Lea? Lea a haci oracion na Jehova y no a laga su problemanan di famia strob’e di mira cu Jehova tabata yud’e. (Genesis 29:32-35; 30:20) E relato tocante Lea su bida ta mustra e problemanan cu poligamia ta trece cu ne; poligamia tabata algo cu Jehova a tolera pa un tempo. Sinembargo, e norma di Dios pa matrimonio ta pa un homber tin un esposa.—Mateo 19:4-6.

▸ Pa mas informacion tocante Lea, wak e articulo “Dos hermanas rivales ‘edificaron la casa de Israel.’”
▸ Pa haya sa dicon Dios a permiti poligamia den su pueblo, wak e articulo “Dios ta Aproba Poligamia?”

Maria (mama di Hesus)

Ken Maria tabata? Maria tabata un hoben Hudiu. Maria tabata birgen na momento cu Hesus a nace. Pues, Maria a concebi e yiu di Dios na un manera milagroso.

Kico Maria a haci? Maria tabata humilde y a obedece Dios. E tabata comprometi cu Jose ora cu el a haya bishita di un angel cu a bis’e cu lo el a sali na estado di un yiu cu lo a bira e Mesias tan spera. (Lucas 1:26-33) Maria tabata dispuesto pa cumpli cu su papel. Despues cu Hesus a nace, Maria y Jose a haya cuater yiu homber y por lo menos dos yiu muher. Pues, Maria no a keda birgen. (Mateo 13:55, 56) Aunke Maria tabatin un privilegio special, nunca el a pidi ni a haya trato special durante Hesus su sirbishi ni tampoco como miembro di e prome congregacion cristian.

Kico nos por siña for di Maria? Maria tabata un muher fiel cu tabata dispuesto pa acepta un responsabilidad grandi. E tabata conoce Scritura masha bon mes. Segun calculo, Maria a referi mas o menos 20 biaha na Scritura ora el a cita e palabranan registra na Lucas 1:46-55.

▸ Pa mas informacion tocante Maria, wak e articulo “Loke Nos Por Siña for di Maria Su Ehempel.”

Maria (ruman muher di Marta y Lazaro)

Ken Maria tabata? Maria cu su ruman homber Lazaro, y su ruman muher Marta, tabata bon amigo di Hesus.

Kico Maria a haci? Na varios ocasion, Maria a mustra cu e tabatin respet pa Hesus, Yiu di Dios. E tabatin fe cu Hesus por a evita cu su ruman homber, Lazaro, lo a muri. Ademas, e tabata presente ora Hesus a resucita Lazaro. Maria su ruman muher, Marta, a critic’e ora el a scoge pa scucha Hesus en bes di yud’e cu e trabounan di cas. Pero Hesus a elogia Maria pasobra Maria a pone cos spiritual na prome luga.—Lucas 10:38-42.

Na un otro ocasion, Maria a mustra generosidad bashando “zeta perfuma caro” riba Hesus su cabes y pia. (Mateo 26:6, 7) Algun di e hendenan presente no a gusta cu Maria tabata dispidi zeta caro. Pero Hesus a defende Maria y a bisa: “Tur caminda na mundo cu predica e bon noticia, nan lo conta tambe loke e muher aki a haci y asina sigui record’e.”—Mateo 24:14; 26:8-13.

Kico nos por siña for di Maria? Maria tabatin hopi fe. El a pone adoracion na Dios prome cu cualkier otro cos. Y na un manera humilde el a mustra honor na Hesus, sin importa cuanto placa esey lo a costa.

Maria Magdalena

Ken Maria Magdalena tabata? Maria Magdalena tabata un fiel discipel di Hesus.

Kico Maria Magdalena a haci? Maria Magdalena tabata un di e hende muhernan cu tabata biaha hunto cu Hesus y e discipelnan di Hesus. E tabata un persona generoso cu a uza su propio recursonan pa yuda cubri e necesidadnan di Hesus y e otro discipelnan. (Lucas 8:1-3) Maria Magdalena a sigui Hesus te na final di Hesus su sirbishi, y el a keda hunto cu Hesus ora nan a mata Hesus. E tabatin e privilegio di ta un di e prome discipelnan cu a mira Hesus despues cu Hesus a resucita.—Juan 20:11-18.

Kico nos por siña for di Maria? Maria Magdalena a apoya e sirbishi di Hesus na un manera generoso y e tabata un fiel discipel di Hesus.

Marta

Ken Marta tabata? Marta tabata ruman muher di Lazaro y Maria, y nan tres tabata biba den e pueblito Betania, cerca di Jerusalem.

Kico Marta a haci? Marta tabata un bon amiga di Hesus. Hesus tabata stima Marta, Marta su ruman muher y Lazaro. (Juan 11:5) Marta tabata hospitalario. Un biaha cu Hesus tabata di bishita, Maria a scoge pa scucha Hesus mientras cu Marta tabata atende cu cos di cas. Marta a bay cerca Hesus y bis’e cu Maria no tabata yud’e, pero na un manera amabel Hesus a corigi Marta.—Lucas 10:38-42.

Ora Lazaro a bira malo, Marta y su ruman muher a manda yama Hesus, pasobra nan tabatin sigur cu Hesus lo por a cura nan ruman homber. (Juan 11:3, 21) Pero Lazaro a muri. E combersacion cu Marta tabatin cu Hesus a mustra cu el a kere den e speransa di resureccion cu Bijbel ta duna y a confia cu Hesus por a lanta su ruman homber for di morto.—Juan 11:20-27.

Kico nos por siña for di Marta? Marta tabata traha duro y tabata masha hospitalario. El a acepta conseho di buena gana. E tabata papia abiertamente tocante su sintimentonan y tocante su fe.

▸ Pa mas informacion tocante Marta, wak e articulo “Mi Ta Kere.”

Miriam

Ken Miriam tabata? Miriam tabata ruman muher di Moises y Aaron. E tabata e prome hende muher cu Bijbel ta yama profeta.

Kico Miriam a haci? Como profeta, e tabatin e tarea di transmiti mensahe di Dios. Miriam tabatin un puesto importante na Israel. Ora Dios a destrui e ehercito Egipcio den Lama Cora, Miriam a canta un cantica di victoria hunto cu e hombernan.—Exodo 15:1, 20, 21.

Algun tempo despues, Miriam y Aaron a cuminsa critica Moises. Ta parce cu nan a bira orguyoso y jaloers. Dios “a tende esaki”, y el a duna conseho fuerte na Miriam y Aaron. (Numbernan 12:1-9) Debi cu Miriam tabata esun cu a cuminsa cu e criticanan, Dios a castiga Miriam cu lepra. Moises a roga Dios pa cura Miriam, y Dios a scuch’e. Miriam mester a keda shete dia den cuarentena, prome cu e por a regresa campamento di Israel.—Numbernan 12:10-15.

Bijbel ta mustra cu Miriam a acepta e disciplina. Despues di hopi siglo, Dios a papia tocante e papel importante cu Miriam tabatin na Israel. Jehova a recorda e Israelitanan: “Mi a manda Moises, Aaron y Miriam bo dilanti.”—Mikeas 6:4.

Kico nos por siña for di Miriam? E relato di Miriam ta mustra cu Dios ta scucha loke su sirbidornan ta bisa di otro y e manera cu nan ta papia di otro. Nos ta siña tambe cu pa agrada Dios, nos mester evita di bira jaloers y orguyoso, cu ta caracteristicanan cu por pone nos daña e bon reputacion di otro hende.

Rahab

Ken Rahab tabata? Rahab tabata un prostituta cu tabata biba den e stad Cananeo Jerico. Cu tempo, Rahab a bira un sirbidor di Jehova Dios.

Kico Rahab a haci? Rahab a sconde dos Israelita cu tabata spiona e tera. El a haci esey pasobra el a tende con e Dios di Israel, Jehova, a libra su pueblo for di e Egipcionan y despues for di e Amoreonan.

Rahab a yuda e spionnan, y el a suplica nan pa salba e y su famia ora e Israelitanan tabata bin pa destrui Jerico. E spionnan a bay di acuerdo, pero bou di algun condicion: prome, Rahab no mester a conta niun hende di nan mision secreto; di dos, Rahab y su famia mester a keda den cas durante e atake di e Israelitanan, y di tres, Rahab mester a colga un cabuya cora for di su bentana pa nan por a sa cua tabata su cas. Rahab a obedece tur instruccion, y e hunto cu su famia a scapa ora e Israelitanan a captura Jerico.

Despues di tempo, Rahab a casa cu un homber Israelita y a bira antepasado di Rey David y Hesucristo.—Josue 2:1-24; 6:25; Mateo 1:5, 6, 16.

Kico nos por siña for di Rahab? Bijbel ta mustra cu Rahab ta un excelente ehempel di fe. (Hebreonan 11:30, 31; Santiago 2:25) Su historia ta mustra cu Dios ta imparcial y cla pa pordona, y cu e ta bendiciona hende cu ta confia den dje sin importa nan pasado.

▸ Pa mas informacion tocante Rahab, wak e articulo “Dios a ‘Declar’e Husto pa Medio di Obra.’”

Raquel

Ken Raquel tabata? E tabata un di e yiu muhernan di Laban y e esposa cu Jacob tabata stima mas.

Kico Raquel a haci? Raquel a casa cu Jacob y el a haya dos yiu homber, cu a bira dos di e cabesantenan di e 12 tribunan di Israel. Raquel a conoce su futuro esposo ora e tabata cuida e carnenan di su tata. (Genesis 29:9, 10) Raquel tabatin “bunita curpa” compara cu su ruman muher mas grandi, Lea.—Genesis 29:17.

Jacob a stima Raquel, y el a bay di acuerdo pa traha shete aña pa e por a casa cu ne. (Genesis 29:18) Sinembargo, Laban a gaña Jacob pa asina Jacob casa cu Lea prome. Despues, Laban a laga Jacob casa cu Raquel.—Genesis 29:25-27.

Jacob a stima Raquel y su dos yiu hombernan mas cu el a stima Lea y e yiunan cu e tabatin cu ne. (Genesis 37:3; 44:20, 27-29) Como resultado, tabatin un rivalidad entre e dos ruman muhernan aki.—Genesis 29:30; 30:1, 15.

Kico nos por siña for di Raquel? Raquel a soporta un problema familiar dificil y no a perde speransa cu Dios lo a scucha su oracion. (Genesis 30:22-24) E relato di Raquel ta mustra cuanto dificultad poligamia ta causa den famia. Loke a pasa cu Raquel tambe ta mustra e sabiduria tras di Dios su norma tocante matrimonio, esta, cu cada homber mester tin solamente un esposa.—Mateo 19:4-6.

▸ Pa mas informacion tocante Raquel, wak e articulo “Dos hermanas rivales ‘edificaron la casa de Israel.’”
▸ Pa haya sa dicon Dios a permiti poligamia den su pueblo, wak e articulo “Dios ta Aproba Poligamia?”

Rebeca

Ken Rebeca tabata? Rebeca tabata esposa di Isaak y mama di e morocho Jacob y Esau.

Kico Rebeca a haci? Rebeca a haci Dios su boluntad, hasta ora esey no tabata facil. Un dia, mientras e tabata saca awa for di un pos, un homber a pidie poco awa. Rebeca a core dun’e di bebe y el a ofrece tambe pa duna e camelnan di e homber awa. (Genesis 24:15-20) E homber ey tabata Abraham su sirbidor cu a biaha distancia largo pa busca un esposa pa Isaak, yiu di Abraham. (Genesis 24:2-4) Ademas, el a haci oracion pa pidi Dios yud’e haya un casa pa Isaak. Ora el a mira cu Rebeca tabata un muher balente y hospitalario, el a realisa cu Dios a contesta su oracion. Si, Rebeca tabata e persona cu Dios a scoge pa Isaak.—Genesis 24:10-14, 21, 27.

Ora Rebeca a compronde e motibo tras di e sirbidor su bishita, el a acepta pa bay cu ne y a bira esposa di Isaak. (Genesis 24:57-59) Despues di tempo, Rebeca a haya yiu homber morocho. Dios a bis’e cu e yiu mayo, Esau, lo a sirbi e yiu homber mas chikito, Jacob. (Genesis 25:23) Ora Isaak tabata bay bendiciona su yiu mayo, Esau, Rebeca a dal paso pa haci sigur cu Jacob lo a haya e bendicion ey. Rebeca tabata sa cu esey tabata boluntad di Dios.—Genesis 27:1-17.

Kico nos por siña for di Rebeca? Rebeca tabata modesto, balente y hospitalario. Debi na e cualidadnan aki, e tabata un excelente esposa, mama y sirbidor di e Dios berdadero.

▸ Pa haya sa mas tocante Rebeca, wak e articulo “Mi Kier Bay.”

Ruth

Ken Ruth tabata? Ruth tabata un Moabita cu a laga su diosnan y su tera natal pa el a bay sirbi Jehova na Israel.

Kico Ruth a haci? Ruth tabata stima su suegra, Noemi, masha hopi mes. Noemi cu su casa y nan dos yiu hombernan a bay biba na Moab debi na un hamber severo cu tabatin na Israel. Despues, e yiunan a casa cu dos Moabita, Ruth y Orfa. Sinembargo, cu tempo Noemi su casa y Noemi su yiu hombernan a muri, y e tres viudanan a keda atras.

Noemi a dicidi di bay Israel bek, pasobra e temporada di secura a pasa. Ruth y Orfa kier a bay cu Noemi, pero Noemi a bisa nan pa bolbe cerca nan famia. Orfa a haci esey. (Ruth 1:1-6, 15) Sinembargo, Ruth lealmente a keda hunto cu su suegra. El a stima Noemi masha hopi y e kier a adora e Dios di Noemi, Jehova.—Ruth 1:16, 17; 2:11.

Ruth tabata un bon nuera y un muher balente, pesey, el a haya bon reputacion den e pueblo di Noemi na Jerusalem. Boaz, un homber rico y doño di tereno, a keda asina impresiona cu Ruth y generosamente el a percura cuminda pa Ruth y Noemi. (Ruth 2:5-7, 20) Cu tempo, Ruth a casa cu Boaz. Asina Ruth a bira antepasado di Rey David y Hesucristo.—Mateo 1:5, 6, 16.

Kico nos por siña for di Ruth? Ruth tabata dispuesto pa bandona su pais y su famia, pasobra el a stima Noemi y Jehova. E tabata un muher balente, devoto y leal, hasta den situacion dificil.

▸ Pa mas informacion tocante Ruth, wak e articulo “Unda Cu Bo Bay, Lo Mi Bay” y “Un Muher Excelente.”

Sara

Ken Sara tabata? Sara tabata esposa di Abraham y mama di Isaak.

Kico Sara a haci? Sara a laga un bida comodo den e stad Ur atras, pasobra e tabatin fe den e promesa cu Dios a haci na Abraham, su esposo. Dios a bisa Abraham pa e sali for di e stad Ur y bay Canaan. Dios a priminti di bendicion’e y hacie un nacion grandi. (Genesis 12:1-5) Probablemente, Sara tabatin rond di 60 aña e tempo ey. Djey padilanti, Sara y su casa a biba den tent y a bay di un luga pa otro.

Aunke e tipo di bida ey tabata peligroso pa Sara, Sara a apoya Abraham segun cu Abraham tabata sigui guia di Dios. (Genesis 12:10, 15) Pa hopi aña, Sara no por a haya yiu, loke a hacie masha tristo. Toch, Dios a priminti di bendiciona Abraham su descendientenan. (Genesis 12:7; 13:15; 15:18; 16:1, 2, 15) Cu tempo, Dios a laga Sara sa cu lo el a haya un yiu cu Abraham. Sara a haya un yiu den su biehes. E tabatin 90 aña y su esposo tabatin 100 aña. (Genesis 17:17; 21:2-5) Nan a yama e yiu Isaak.

Kico nos por siña for di Sara? E ehempel di Sara ta siña nos cu semper Dios ta cumpli cu su promesanan, hasta ora esey por parce imposibel! (Hebreonan 11:11) Ademas, Sara su ehempel como esposa ta resalta e importancia di mustra respet den matrimonio.—1 Pedro 3:5, 6.