Algun Bijbel ta traduci e palabra Hebreo “Seol” y e palabra Griego “Hades” como fierno. (Bijbel a ser skirbi originalmente na Hebreo, Arameo y Griego.) Tur e dos palabranan aki ta referi na un luga simbolico caminda e mortonan ta bay y no un luga caminda hende ta ser tormenta den candela. Ken ta esnan cu ta bay eynan? Tanto bon hende como mal hende. (Job 14:13; Salmo 9:17) Bijbel ta bisa cu graf ta “e cas destina pa tur cu ta biba.”​—Job 30:23, Beibel Santu.

 Hasta Hesus a bay fierno ora el a muri. Pero e no a keda “den fiernu” pasobra Dios a resucit’e.​—Echonan 2:31, 32, E Testament Nobo di Nos Señor y Salbador Jesu-Christo.

Fierno lo existi pa semper?

 Cu e poder cu Dios a duna Hesus, lo e lanta tur esnan cu ta den fierno bek na bida. (Juan 5:28, 29; Echonan 24:15) Bijbel ta papia di e futuro resureccion ey bisando cu “morto i fiernu a entrega e mortónan” cu tabata den nan. (Revelacion 20:13, TN) Despues cu fierno bira bashi, lo e stop di existi; niun hende lo no bay eynan pasobra “lo no tin morto mas.”​—Revelacion 21:3, 4; 20:14.

 Pero no ta tur hende cu muri ta bay fierno. Bijbel ta bisa cu tin hende ta haci asina tanto maldad cu nan no ta cambia mas. (Hebreonan 10:26, 27) Ora nan muri, nan no ta bay fierno, pero nan ta bay Gehena cu ta simbolo di destruccion completo. (Mateo 5:29, 30) Por ehempel, Hesus a bisa cu algun di e lidernan religioso hipocrita di su tempo lo a bay den Gehena.​—Mateo 23:27-33.