Cain, e yiu mayo di e prome pareha humano, a casa cu un di su rumannan muher of cu un otro famia cerca. Nos por saca e conclusion aki ora nos lesa loke Bijbel ta bisa tocante Cain y su famia.

E berdad tocante Cain y su famia

•   Tur ser humano ta descendiente di Adam cu Eva. Bijbel ta bisa: “For di un hende [Adam] Dios a traha tur nacion, pa nan biba riba henter e superficie di Tera.” (Echonan 17:26) Eva, esposa di Adam, a bira “mama di tur ser bibo.” (Genesis 3:20, Beibel Santu) Pesey, Cain mester a casa cu un otro descendiente di Adam cu Eva.

•   Cain y su ruman homber Abel tabata e prome di e hopi yiunan cu Eva a haya. (Genesis 4:1, 2) Ora Cain a mata su ruman y Jehova a core cu ne, Cain a bisa: “Lo sosode cu ken cu haya mi, lo mata mi.” (Genesis 4:14, Beibel Santu) Di ken Cain tabatin miedo? Bijbel ta bisa cu Adam “a engendra mas yiu homber y yiu muher.” (Genesis 5:4) Evidentemente, e otro descendientenan aki di Adam cu Eva por tabata un menasa pa Cain.

•   Na principio di historia humano, no tabata straño pa famianan casa cu otro. Por ehempel, e homber fiel Abraham a casa cu su mitar ruman. (Genesis 20:12) E prome biaha cu a prohibi matrimonio asina tabata den e Ley di Moises, cu a ser estableci siglonan despues cu Cain a muri. (Levitico 18:9, 12, 13) Ta parce cu den e tempo ey, yiunan cu a nace di un matrimonio cu ta consisti di dos miembro di e mesun famia no tabatin e risico pa nace cu defecto manera awe.

•   Bijbel ta presenta e relato di Adam cu Eva y nan famia como historia exacto. Tanto den e buki di Genesis, cu Moises a skirbi, como e relatonan di historia di Esdras y Lucas tin genealogia detaya cu ta yega na Adam. (Genesis 5:3-5; 1 Cronicanan 1:1-4; Lucas 3:38) Escritornan di Bijbel ta menciona e relato di Cain como algo cu di berdad a sosode.​—Hebreonan 11:4; 1 Juan 3:12; Judas 11.