Segun e ultimo buki di Bijbel, 666 ta e number of nomber di e bestia salbahe cu shete cabes y dies cacho cu ta sali for di lama. (Revelacion 13:​1, 17, 18) E bestia aki ta simbolisa e sistema politico mundial cu ta goberna riba “tur tribu, pueblo, idioma y nacion.” (Revelacion 13:7) E nomber 666 ta mustra cu e sistema politico ta un fracaso total den bista di Dios. Con asina?

  Un nomber cu ta nifica algo. Nombernan cu Dios ta duna tin nificacion. Por ehempel, ora Dios a priminti Abram, kende su nomber ta nifica “Tata Exalta”, cu e lo bira “tata di un multitud di nacionnan”, Dios a dun’e e nomber Abraham, cu ta nifica “Tata di hopi.” (Genesis 17:5, nota) Di mes manera, e nomber 666 cu Dios a duna e bestia ta representa e caracteristicanan cu Dios ta mira den dje.

  E number seis ta representa imperfeccion. Den Bijbel, hopi bes ta uza number como simbolo. E number shete normalmente ta representa algo completo of perfecto. E number seis cu ta un menos cu shete, por representa algo incompleto of imperfecto den bista di Dios. Y e por tin di haber cu Dios su enemigonan. ​—1 Cronicanan 20:6; Daniel 3:1.

  Tin ora Bijbel ta enfatisa un asunto door di mencion’e tres biaha. (Revelacion 4:8; 8:​13) Pues, e nomber 666 ta mustra claramente cu Dios ta mira e sistema politico humano como un fracaso total. Nan no por trece paz y siguridad duradero, algo cu solamente e Reino di Dios por logra.

E marca di e bestia

 Bijbel ta bisa cu hende ta haya “e marca di e bestia salbahe” pasobra nan ta siguie “cu admiracion”, te na e grado pa ador’e. (Revelacion 13:​3, 4; 16:2) Nan ta duna honor den forma di adoracion na nan pais, na su emblemanan of na su poder militar. The Encyclopedia of Religion ta bisa: “Nacionalismo a bira un tipo di religion dominante di e mundo moderno.” a

 Con e marca di e bestia salbahe ta wordo poni riba un hende su man drechi of frenta? (Revelacion 13:16) Tocante su mandamentonan duna na e nacion di Israel, Dios a bisa: “Mara nan como un señal na boso man, y nan lo ta manera banchi na boso frenta.” (Deuteronomio 11:18) Esaki no tabata kiermen cu e Israelitanan mester a marca nan man y nan frenta literalmente, pero cu Dios su palabra lo mester a guia tur nan pensamento y accionnan. Asina tambe, e marca simbolico di e bestia ta identifica esnan cu ta somete nan mes completamente na e sistema politico y no ta un marca literal manera un tattoo di 666. Esnan cu tin e marca di e bestia ta pone nan mes contra di Dios.​—Revelacion 14:​9, 10; 19:19-​21.