Diabel ta un criatura spiritual cu ta biba den un region invisibel. Sinembargo, e luga ey no ta un fierno di candela caminda e ta laga hende malbado sufri, manera e plachi den e articulo aki ta mustra.

“Guera den cielo”

 Un tempo, Satanas e Diabel tabata move libremente den e region spiritual y tabata presenta tambe dilanti di Dios hunto cu e angelnan fiel. (Job 1:6) Pero Bijbel a profetisa cu lo tin un “guera ... den cielo”, y como resultado Satanas a ser saca for di cielo y “benta abou riba Tera.” (Revelacion 12:7-9) Tanto cronologia di Bijbel como sucesonan mundial ta confirma cu e guera den cielo a tuma luga caba. Awor Diabel ta forsa pa keda den e bisindario di Tera.

 Esey ta nifica cu Diabel ta biba na un luga specifico riba nos planeta? Por ehempel, Bijbel ta bisa cu e stad antiguo di Pergamo tabata “caminda e trono di Satanas ta” y “caminda Satanas ta biba.” (Revelacion 2:13) E expresionnan ey muy probablemente ta referi na e echo cu hopi hende tabata practica ritonan satanico den e stad ey. Bijbel ta bisa cu Diabel ta goberna riba “tur e reinonan di e Tera habita.” Pues, e no ta biba na niun luga specifico riba Tera, pero e ta forsa pa keda den e bisindario di Tera.—Lucas 4:5, 6.