No, nos no mester haci esaki. E New Catholic Encyclopedia ta bisa tocante e leynan cu Dios a duna e nacion di Israel: “For di varios relato di Bijbel ta bisto cu hende cu tabata adora Dios no tabata uza imagen.” Wak e siguiente versiculonan di Bijbel:

•   “No traha niun imágen di niun dios, den niun forma: ni di loke tin na shelu, ni di loke tin riba tera, ni di loke tin den awa bou di tera. No hinka rudia adorá nan, pasobra Ami, SEÑOR, bo Dios, no ta tolerá ningun otro dios.” (Exodo 20:4, 5, Beibel na papiamentu koriente) Como cu Dios “no ta tolerá ningun otro dios”, e no ta aproba uzo di imagen, prenchi, idolo, estatua of simbolo pa ador’e.

•   “Lo mi no duna mi gloria na un otro, ni mi alabanza na imagennan graba.” (Isaias 42:8, Beibel Santu) Dios no ta acepta pa hende ador’e pa medio di imagen. Ora algun Israelita a purba di adora Dios uzando un bishe di oro, Dios a bisa: “Nan ta un pueblo cabesura.”—Exodo 32:7-9, Beibel Santu.

•   “Nos no mester kere cu e Ser Divino ta manera un cos di oro, plata of piedra, esta, cos cu arte y imaginacion di hende a produci.” (Echonan 17:29) Pues, en bes di adora imagen cu “imaginacion di hende a produci” manera ta e custumber den paganismo, cristiannan tin cu “cana pa medio di fe, no pa medio di bista.”—2 Corintionan 5:7

•   “Warda boso di idolonan.” (1 Juan 5:21, Beibel Santu) Bijbel ta mustra bon cla cu Dios a instrui tanto e nacion di Israel como e cristiannan pa no uza imagen den adoracion na dje. Pues, e siñansa di cu hende mester uza imagen pa adora Dios ta falso.