Ken e “Tres Reynan” Tabata? Nan A Sigui e “Strea” di Betlehem?
Loke Bijbel ta bisa
Contrario na e tradicion popular di Pasco, Bijbel no ta papia di “tres rey” pa describi e biaheronan cu a bishita Hesus despues cu el a nace. (Mateo 2:1) E evangelio di Mateo ta uza e palabra Griego magoi ora e ta referi na e hendenan cu a bishita Hesus. E palabra aki muy probablemente ta referi na experto den astrologia y practicante di ocultismo. a
Cuanto nan tabata?
Bijbel no ta bisa y tin hopi opinion tocante cuanto nan tabata. Segun e Encyclopedia Britannica, “na Medio Oriente nan ta papia di 12 mago, pero den Occidente nan ta papia di solamente tres, probablemente pasobra nan a hiba tres regalo pa e yiu, esta, ‘oro, sencia blanco y mira.’ (Mateo 2:11)”
Di berdad nan tabata rey?
Aunke durante celebracion di Pasco nan ta referi na e hombernan aki como rey, niun caminda Bijbel no ta yama nan asina. Segun Encyclopedia Britannica, ta hopi siglo despues nan a agrega e titulo ey pa “floria e storia.”
Con e “reynan” tabata yama?
Bijbel no ta menciona nomber di e astrologonan. Segun The International Standard Bible Encyclopedia, e nomber cu nan a duna nan (p.e., Gaspar, Melchor y Baltasar) ta basa riba leyenda.
Na ki tempo e “reynan” a bishita Hesus?
Probablemente nan a bishita Hesus algun luna despues di su nacemento. Nos sa esaki pasobra Rey Herodes, cu tabata kier a mata Hesus, a manda mata tur yiu homber di dos aña bay abou. El a calcula e edad ey a base di e informacion cu el a haya di e astrologonan.—Mateo 2:16
E astrologonan no a bishita Hesus riba e anochi cu el a nace. Bijbel ta bisa: “Ora nan a drenta den e cas, nan a mira e mucha hunto cu su mama, Maria.” (Mateo 2:11) Esey ta indica cu e famia tabata biba den un cas caba y cu Hesus no tabata un baby den pesebre mas.—Lucas 2:16
Ta Dios a laga e “reynan” sigui e “strea” di Betlehem?
Tin hende ta kere cu ta Dios a manda e supuesto strea di Betlehem pa guia e astrologonan na Hesus. Laga nos wak dicon esey no por ta.
Loke a parce di ta un strea a dirigi e astrologonan prome na Jerusalem. Bijbel ta bisa: “Algun astrologo di Oriente a bin Jerusalem y a puntra: ‘Na unda esun cu a nace como rey di e Hudiunan ta? Pasobra nos a mira su strea ora nos tabata na Oriente, y nos a bin pa rindi homenahe na dje.’”—Mateo 2:1, 2.
Ta Rey Herodes a manda nan bay Betlehem prome y no e “strea.” Ora el a tende di un rey rival Hudiu, el a busca pa sa na unda e Cristo priminti lo mester a nace. (Mateo 2:3-6) Ora el a haya sa cu lo ta na Betlehem, el a manda e astrologonan pa bay eynan pa busca e yiu, y bolbe pa inform’e cu nan a hay’e.
Ta pa e motibo ey, e astrologonan a bay Betlehem. Bijbel ta bisa: “Despues cu nan a tende e rey, nan a sigui nan caminda, y ata e strea cu nan a mira ora nan tabata na Oriente! Esaki a bay nan dilanti te ora el a yega caminda e mucha tabata y a keda para riba e luga ey.”—Mateo 2:9.
Aparicion di e “strea” a hiba na algun suceso cu a pone Hesus su bida na peliger y a hiba na asesinato di hopi mucha inocente. Ora e astrologonan a bandona Betlehem, Dios a spierta nan pa no bolbe cerca Herodes.—Mateo 2:12.
Con Herodes a reacciona? Bijbel ta bisa: “Ora Herodes a mira cu e astrologonan a nek e, el a bira masha furioso y a manda mata tur mucha homber di dos aña di edad bay abou na Betlehem y den henter e region ey banda. E edad aki tabata cuadra cu e tempo cu e astrologonan a bis’e cu nan a mira e strea.” (Mateo 2:16) Hamas Dios lo a causa algo asina teribel.—Job 34:10.
a Herodoto, un historiador Griego di siglo cinco prome cu Cristo, a bisa cu magoi di su tempo tabata di e tribu di Medo (Persia) cu a specialisa nan mes den astrologia y interpretacion di soño.
You May Also Like
PREGUNTA CU BIJBEL TA CONTESTA
Kico Bijbel Ta Bisa Tocante Pasco di Nacemento?
Un analisis di historia en conexion cu seis tradicion popular relaciona cu Pasco kisas lo laga bo keda sorprendi.
TOCANTE NOS
Pidi un Bishita
Papia tocante un topico di Bijbel of haya sa mas tocante testigonan di Jehova.