No, nos no ta presiona ningun hende pa cambia nan religion. Den nos revista principal, E Toren di Vigilancia, nos a bisa: “Ta robes pa forsa hende cambia nan religion.” a Dicon nos no ta presiona hende pa cambia nan religion? Ata aki algun motibo:

•   Hesus nunca a presiona hende pa acepta su siñansanan. E tabata sa cu masha poco hende lo acepta su mensahe. (Mateo 7:​13, 14) Un biaha, ora algun di su discipelnan a bay lag’e pasobra nan no tabata di acuerdo cu un di su siñansanan, el a laga nan bay; e no a obliga nan pa keda.​—Juan 6:60-62, 66-68.

•   Hesus a siña su siguidornan pa no forsa hende pa cambia nan creencianan. Su siguidornan no tabata forsa hende pa acepta e bon noticia di Reino. Mas bien, nan a busca hende cu kier a scucha.​—Mateo 10:​7, 11-​14.

•   No ta bale la pena forsa hende pa cambia nan religion pasobra Dios ta desea pa hende ador’e di curason.​—Deuteronomio 6:4, 5; Mateo 22:37, 38.

 Ta berdad cu nos ta hiba e mensahe di Bijbel “te na e partinan di mas leu di Tera”, y nos ta haci esey “publicamente y … di cas pa cas”, manera e Palabra di Dios ta bisa. (Echonan 1:8; 10:42; 20:20) Anto mescos cu e prome cristiannan, tin biaha nos ta ser acusa di obliga hende pa acepta nos creencianan. (Echonan 18:12, 13) Pero e acusacionnan ey ta falso. Nos no ta forsa niun hende pa kere loke nos ta kere. Pero nos ta kere si cu ta bon pa tur hende haya un oportunidad di siña conoce Bijbel ya asina nan por tuma nan mes decision.

 Nos no ta forsa niun hende pa cambia nan religion. Ni nos no ta uza religion pa logra metanan politico ni tampoco nos no ta ofrece ayudo social of material pa haya miembro. Anto esaki ta na contraste cu esnan cu ta bisa cu nan ta cristian pero ta deshonra Cristo door di haci e tipo di cosnan ey. b

 Si, Bijbel ta mustra cu hende tin derecho di cambia nan religion. Tin varios ehempel biblico di hende cu a scoge pa no sigui e religion di nan famia sino a dicidi pa adora e Dios berdadero. Ken asina? Wel, algun di nan tabata Abraham, Ruth, algun hende di Atenas y Apostel Pablo. (Josue 24:2; Ruth 1:14-16; Echonan 17:22, 30-34; Galationan 1:14, 23) Ademas, Bijbel ta reconoce cu hende tin hasta derecho di stop di adora e Dios berdadero, maske esey no ta un bon decision.​—1 Juan 2:19.

 E documento Declaracion Universal di Derecho Humano, cu segun Nacionnan Uni ta contene “e normanan fundamental y internacional di derecho humano”, ta bisa cu nos tur tin “libertad di cambia religion of creencia” y tambe cu nos tin derecho di “investiga, ricibi y duna informacion y opinion.” Y esey ta inclui pensamentonan religioso. c Ta claro cu e derecho aki ta encera tambe cu nos mester respeta e derecho cu hende tin di defende nan creencia of rechasa esun di nos.

 No necesariamente. Bijbel ta anima nos pa respeta tur hende, sin importa ki religion nan tin. (1 Pedro 2:17) Ademas, testigonan di Jehova ta obedece e mandamento biblico pa honra nan mayornan, hasta si nan tin un otro religion.​—Efesionan 6:2, 3.

 Pero, no ta tur hende ta di acuerdo cu loke Bijbel ta bisa. Un hende muher di Zambia a conta: “Den mi comunidad, cambia religion tabata ... un acto di deslealtad y un traicion contra bo famia y comunidad.” Tempo cu e tabata teenager, el a hay’e den e situacion ey ora el a cuminsa studia Bijbel cu testigonan di Jehova y a dicidi di cambia su religion. E ta sigui bisa: “Mi mayornan tawata bisa mi cada bes cu nan tawata hopi malcontento cu mi, y cu mi a laga nan na caya. Esey tawata dificil pa mi, pasobra aprobacion di mi mayornan tawata hopi importante pa mi ... Scoge pa ta leal na Jehova en bes di na tradicionnan religioso no kiermen cu mi no ta leal na mi famia.” d