KAPÍTULO 8

Kon Mi Por Haña Bon Amigu?

“Si mi ta rabiá, mi mester di un hende pa mi papia kuné. Ora mi ta tristu, mi ke pa un hende konsolá mi. Ora mi ta kontentu, mi ke pa un otro hende ta kontentu huntu ku mi. Pa ami, ta importante pa bo tin amigu.”—Brittany.

HENDE sa bisa ku mucha mester di otro mucha pa hunga kuné, miéntras ku tiner mester di amigu. Kiko ta e diferensia?

Un mucha pa hunga kuné ta kompañá bo.

Un amigu ta kompañá bo i tambe tin e mesun normanan ku bo.

Ademas, Beibel ta bisa ku “un amigu ta stima tur ora bai i un ruman ta nasí pa tempu di atversidat.” (Proverbionan 17:17) E amistat deskribí den e teksto ei ta hopi mas profundo ku e amistat ku un mucha tin ku otro mucha!

Echo: Segun ku bo ta bira adulto, bo mester di amigu ku

1. Tin bon kualidat

2. Ta biba segun norma moral haltu

3. Tin un influensia positivo riba bo

Pregunta: Kon bo por haña amigu ku tin e kualidatnan ei? Laga nos trata nan un pa un.

Rekisito 1—Bon Kualidat

Loke bo mester sa. No ta tur hende ku ta bisa ku e ta un bon amigu ta un amigu di bèrdat. Beibel ta asta bisa ku “un hende ku tin hopi amigu por yega na ruina.” (Proverbionan 18:24) Esei por zona hopi serio. Pensa un ratu: Bo a yega di tin un “amigu” ku a probechá di bo? Òf un supuesto amigu ku a papia tras di bo lomba òf a plama rumor falsu di bo? Un eksperensia asina por pone bo pèrdè konfiansa den un amigu. * Semper kòrda ku un bon amigu ta mihó ku hopi mal amigu!

Loke bo por hasi. Skohe amigu ku tin kualidat ku ta bale la pena pa imitá.

“Tur hende ta papia bon di mi amiga Fiona. Mi ke pa hende papia bon di mi tambe. Mi ke tin un bon nòmber meskos kuné. Mi ta haña esei importante.”—Yvette, 17 aña.

Purba esaki.

1. Lesa Galationan 5:22, 23.

2. Puntra bo mes: ‘Mi amigunan tin e kualidatnan ku ta parti di “e fruta di spiritu”?’

3. Skirbi nòmber di bo amigunan mas será. Skirbi banda di kada nòmber e mihó kualidat ku e persona ei tin.

Nòmber

․․․․․

Kualidat

․․․․․

Tep: Si ta kos negativo so ta bini na bo mente, podisé ta ora pa buska mihó amigu!

Rekisito 2—Norma Moral Haltu

Loke bo mester sa. Mas bo anhelá di tin amigu, mas grandi e chèns ta ku lo bo skohe mal amigu. Beibel ta bisa: “Un kompañero di hende bobo lo sufri daño.” (Proverbionan 13:20) E ekspreshon “hende bobo” no ta referí na hende ku ta haña mal punto òf hende ku no ta sabí. Mas bien, e ta deskribí hende ku no ke aseptá ora bo rasoná ku nan i ta komportá nan mes na un manera rebelde. Esei ta tipo di amigu ku bo ke evitá!

Loke bo por hasi. Skohe bon promé ku bo sera amistat ku un persona. (Salmo 26:4) Esei no kier men ku bo mester tin prehuisio. Mas bien, e ta nifiká ku bo tin e kapasidat pa “distinguí entre e hustu i e malbado, entre un ku ta sirbi Dios i un ku no ta sirbié.”—Malakías 3:18.

“Mi ta masha kontentu ku mi mayornan a yuda mi haña bon amigu, hende di mi edat ku ta biba segun e normanan di Dios.”—Christopher, 13 aña.

Kontestá e siguiente preguntanan:

Ora mi ta huntu ku mi amigunan, mi tin miedu ku nan lo purba di preshoná mi pa hasi algu ku mi sa ta robes?

□ Sí

□ Nò

Mi ta duda pa laga mi mayornan sera konosí ku mi amigunan pasobra mi ta kere ku nan lo no gusta mi amigunan?

□ Sí

□ Nò

Tep: Si bo a kontestá e preguntanan ariba ku sí, buska amigu ku tin norma mas haltu, amigu ku ta pone na práktika loke e ta siña den Beibel.

Rekisito 3—Influensia Positivo

Loke bo mester sa. Beibel ta bisa: “Mal kompania ta daña bon kustumber.” (1 Korintionan 15:33) Un hóben ku yama Lauren a bisa: “Mi kompañeronan di skol tabata aseptá mi tanten ku mi tabata hasi loke nan ke. Mi tabata sinti mi mi so. Pues, mi tabata hasi meskos ku nan djis pa nan aseptá mi.” Lauren a ripará ku ora bo adaptá na e normanan di otro hende, bo ta bira manera un peon den wega di ahedres, kaminda nan ta hasi loke nan ke ku bo. Bo ta meresé mas ku esei!

Loke bo por hasi. Kibra amistat ku hende ku ke pa bo kambia pa asina biba manera nan ta biba. Si bo hasi esei, kisas lo bo keda ku ménos amigu. Pero lo bo sinti bo mihó i lo bo tin mas chèns pa haña bon amigu, e tipo di amigunan ku tin bon influensia riba bo.—Romanonan 12:2.

“Mi bon amigu Clint ta trankil i ta komprondé mi, i pa e motibu ei e ta un gran animashon pa mi.”—Jason, 21 aña.

Puntra bo mes:

Mi ta kambia mi manera di bisti, papia òf hasi djis pa komplasé mi amigunan?

□ Sí

□ Nò

Ora mi ta huntu ku mi amigunan, mi ta bai lugá ku lo mi no a bai si mi tabata mi so?

□ Sí

□ Nò

Tep: Si bo a kontestá e preguntanan ariba ku sí, buska konseho serka bo mayornan òf un adulto maduro. Si bo ta un Testigu di Yehova, bo por bai serka un ansiano tambe i puntr’é pa yuda bo skohe amigu ku tin bon influensia riba bo.

BO POR HAÑA MAS INFORMASHON DEN TOMO 2, KAPÍTULO 9 (na spañó)

DEN E SIGUIENTE KAPÍTULO

Kiko si un supuesto amigu òf kisas bo kurason ta preshoná bo pa hasi kos malu? Haña sa kon bo por resistí!

[Nota]

 TEKSTO KLAVE

“Tin un amigu ku ta mas pegá ku un ruman.”—Proverbionan 18:24.

TEP

Ora bo trata di biba segun norma haltu, otro hende ku ta purba di hasi meskos lo apresiá bo. Nan lo ta un bon amigu pa bo!

BO TABATA SA . . . ?

Dios no ta parsial, pero e ta wak bon ken e ta skohe komo su amigu. —Salmo 15:1-5.

 LOKE MI POR HASI

Pa haña bon amigu, lo mi tin ku ․․․․․

Algun hende ku ta mas grandi ku mi i ku mi ke konosé mas mihó ta ․․․․․

Loke mi tin gana di puntra mi mayor(nan) tokante e tópiko akí ta ․․․․․

 KIKO BO TA PENSA?

● Ki ta algun kualidat ku lo bo balorá mas tantu den un amigu, i dikon?

● Ki ta algun kualidat ku bo tin ku traha ariba pa bo ta un bon amigu?

 [Komentario]

“Mi mayornan a bisa mi pa keda leu for di sierto amigu. Pero ta nan so mi tabata ke komo amigu. E konseho di mi mayornan tòg tabata bon i unabes mi a stòp di pensa riba loke mi tabata ke, mi a mira ku tabatin hopi hende ku mi por a sera amistat kuné.’’—Cole

 [Kuadro]

Purba esaki

Papia ku bo mayornan tokante amistat. Puntra nan ki tipo di amigu nan tabatin tempu ku nan tabatin bo edat. E amigunan ku nan a skohe a resultá di ta mal amigu? Si ta asina, dikon? Puntra nan kon bo por evitá di haña bo ku algun di e problemanan ku nan a haña nan kuné.

Laga bo mayornan sera konosí ku bo amigunan. Si bo ta duda pa hasi esei, puntra bo mes: ‘Dikon mi no ke pa mi mayornan sera konosí ku mi amigunan?’ Tin algu ku bo amigunan ta hasi ku bo mayornan lo no gusta? Si esei ta kaso, kisas bo mester skohe bo amigunan mas mihó.

Skucha bon. Mustra ku bo ta interesá den bo amigu i den loke e ta pasa aden.—Filipensenan 2:4.

Pordoná bo amigu. No pensa ku bo amigu ta perfekto. “Nos tur ta trompeká hopi biaha.”—Santiago 3:2.

Duna bo amigu tempu pa su mes. Bo no mester ta henter ora huntu kuné. Si ta un amigu di bèrdat, semper lo e t’ei pa bo ora bo mester di dje.—Eklesiástes 4:9, 10.

[Plachi]

Ora bo adaptá na e normanan di otro hende, bo ta bira manera un peon den wega di ahedres, kaminda nan ta hasi loke nan ke ku bo