Saludamentu di Bandera. Testigunan di Yehova ta kere ku ora un hende saludá òf bùig pa un bandera, hopi biaha durante tokamentu di himno, e ta hasiendo un akto religioso ku ta atribuí salbashon na patria òf su lidernan, en bes di na Dios. (Isaías 43:11; 1 Korintionan 10:14; 1 Huan 5:21) Un lider ku a risibí e tipo di venerashon ei ta Rei Nabukodonosor di Babilonia. Pa impreshoná e pueblo ku su mahestat i fervor religioso, e monarka poderoso akí a traha un imágen inmenso i a obligá su súpditonan bùig pa e imágen, segun ku un tipo di himno tabata toka. Sinembargo, tres mucha hòmber hebreo—Sadrak, Mesak i Abed-nego—a nenga di bùig pa e imágen, aunke tabatin kastigu di morto pa esei.—Daniel, kapítulo 3.

Kiko djawe? E historiadó Carlton Hayes a skirbi ku den nos era “nashonalismo su símbolo prinsipal di fe i opheto sentral di adorashon ta bandera. . . . Hòmbernan ta kita sombré ora bandera ta pasa; poetanan ta dediká alabansa na onor di bandera i muchanan ta kanta himno p’e.” Ademas, el a bisa ku nashonalismo tambe tin su “dianan sagrado” (manera 4 di yüli, Dia di Independensia di Merka), su “santu- i héroenan” i su “tèmpelnan” òf lugánan sagrado. Durante un seremonia públiko na Brazil, e presidente di e Korte Militar Superior a rekonosé ku ‘hende ta venerá i adorá bandera meskos ku nan ta adorá Patria.’ Manera Encyclopedia Americana a yega di menshoná: “Bandera ta mes sagrado ku krus.”

 Na un fecha mas resiente, e mesun ensiklopedia ei a splika ku himno nashonal ta un “ekspreshon di sintimentunan patriótiko ku hopi bes ta inkluí un petishon na Dios pa guia i protehá e pueblo òf su gobernantenan.” Pues, e punto di bista di e sirbidónan di Yehova no ta ekstremo. Nan tin rason di mira seremonianan patriótiko, den kua ta saludá bandera òf toka himno, komo aktonan religioso. Komentando riba e echo ku e yunan di Testigunan di Yehova ta nenga di rindi homenage na bandera òf di ripití e huramentu di lealtat na skol, na Merka, e buki The American Character (E Karakterístikanan di e Pueblo Merikano) a bisa: “Por fin Korte Supremo a konfirmá den un seri di sentensia ku e ritualnan diario akí ta di karakter religioso.”

Testigunan di Yehova no ta partisipá den e seremonianan ei pasobra nan ta haña ku esakinan ta bai kontra di prinsipio bíbliko; pero nan ta respetá sí ku otro hende tin e derecho di hasié. Tambe nan ta respetá bandera komo un símbolo nashonal i ta someté nan na gobièrnunan legítimo, ya ku esakinan ta e “outoridatnan superior” ku ta fungi komo “sirbidó di Dios.” (Romanonan 13:1-4) P’esei, Testigunan di Yehova ta sigui e konseho pa hasi orashon “pa reinan i tur esnan ku ta den puesto haltu.” Sinembargo, nos ta hasié “a fin ku nos por sigui hiba un bida trankil i ketu ku pleno deboshon na Dios i seriedat.”—1 Timoteo 2:2.

Votamentu den elekshon polítiko. Kristiannan berdadero ta respetá e derecho ku otro hende tin di vota. Nan no ta hasi kampaña kontra elekshon ni nenga di kooperá ku e outoridatnan eligí. Sinembargo, nan ta tuma e desishon firme di keda kompletamente neutral den asuntu polítiko. (Mateo 22:21; 1 Pedro 3:16) Kiko un kristian mester hasi si den su pais votamentu ta obligatorio òf si tin sintimentunan fuerte kontra hende ku no bai urna? Si su konsenshi ta permitié, e por bai urna. E ta aktua e ora ei meskos ku Sadrak, Mesak i Abed-nego, kendenan den sirkunstansianan similar a bai e yanura di Dura. Ma e kristian lo sòru pa e no violá su neutralidat. Lo e tene kuenta ku e seis prinsipionan akí:

1.   E siguidónan di Hesus “no ta parti di mundu.”—Huan 15:19.

2. Kristiannan ta representá Kristu i su Reino.—Huan 18:36; 2 Korintionan 5:20.

3. Tur e miembronan di kongregashon ta uní den e mesun kreensia i e mesun amor kristian.—1 Korintionan 1:10; Kolosensenan 3:14.

4. Esun ku vota pa un mandatario ta karga sierto grado di responsabilidat pa loke e mandatario ei hasi.—Tuma nota di e prinsipionan ku tin den e palabranan di 1 Samuel 8:5, 10-18 i 1 Timoteo 5:22.

5. Ora Israel a pidi pa haña un gobernante visibel, Yehova a konsiderá e petishon ei un rechaso di Su soberania.—1 Samuel 8:7.

6. Kristiannan mester keda neutral pa nan por papia ku frankesa ku hende di tur ideologia polítiko tokante e Reino di Dios.—Mateo 24:14; 28:19, 20; Hebreonan 10:35, nota.

Servisio sivil alternativo. Tin pais ta eksigí di personanan ku nenga servisio militar pa hasi un tipo di servisio alternativo, ku no ta militar, pa un periodo di tempu. E servisio ei por ta, entre otro, kobamentu di pos, trahamentu di kaminda, skol i hospital. Kiko nos mester hasi si nos haña nos ku e situashon akí? Hasi orashon na Yehova i buska informashon tokante e asuntu. Tambe nos por pidi un kristian maduro konseho. Asina nos por tuma un bon desishon a base di nos konsenshi.—Proverbionan 2:1-5; Filipensenan 4:5.

E Palabra di Dios ta bisa nos pa nos ta “obediente na gobièrnu i outoridat,” pa nos ta “kla pa tur bon obra” i pa nos ta “rasonabel.” (Tito 3:1, 2) Ku esei na mente, nos por puntra nos mes lo siguiente tokante e servisio sivil alternativo ku nan ta ofresé: ‘Lo mi komprometé mi neutralidat kristian òf haña mi enbolbí den religion falsu si mi asept’é?’ (Mikéas 4:3, 5; 2 Korintionan 6:16, 17) ‘Lo ta difísil, òf kasi imposibel, pa mi kumpli ku mi responsabilidatnan kristian si mi bai hasi e trabou akí?’ (Mateo 28:19, 20; Efesionan 6:4; Hebreonan  10:24, 25) ‘Òf yùist lo mi tin mas tempu pa partisipá den aktividatnan spiritual, kisas asta kuminsá ku sirbishi di tempu kompleto?’—Hebreonan 6:11, 12.

Si un kristian disidí a base di su konsenshi ku e por kumpli ku servisio sivil alternativo, en bes di bai prizòn, su rumannan den fe mester respetá su desishon. (Romanonan 14:10) Di otro banda, si e ta sinti ku e no por hasi tal servisio, e rumannan tin ku respetá su posishon e ora ei tambe.—1 Korintionan 10:29; 2 Korintionan 1:24.