1. Ki sorto di hende Yehova ta hala serka dje, i dikon nan mester keda alerta?

HESUS a bisa ku “e adoradónan berdadero lo adorá e Tata ku spiritu i ku bèrdat, pasobra, en realidat, e Tata ta buska esnan ku ke ador’é asina.” (Huan 4:23) Ora Yehova haña personanan asina—meskos ku el a haña abo—e ta hala nan serka dje i serka di su Yu. (Huan 6:44) Ki un gran onor esei ta! Sinembargo, hende ku ta stima e bèrdat di Beibel tin ku “sigui hasi sigur di loke ta agradá Señor,” pasobra Satanas ta un maestro di engaño, i nos ta kore peliger di kai den su trampa.—Efesionan 5:10; Revelashon 12:9.

2. Splika kiko Yehova ta pensa di hende ku ta purba meskla religion berdadero ku religion falsu.

² Por ehèmpel, wak kiko a pasa na Seru di Sinaí ora ku e israelitanan a pidi Aron traha un dios pa nan. Aron a komplasé nan i a traha un bisé di oro, ma el a hasi komo si fuera e bisé a representá Yehova. E di: ‘Mañan lo tin un fiesta pa Yehova.’ Akaso Yehova no a wòri ku nan a meskla religion berdadero ku religion falsu? Klaru ku nò! El a laga mata un 3.000 hende ku a adorá e ídolo. (Éksodo 32:1-6, 10, 28) Kiko nos por siña for di e relato akí? Si nos ke keda den e amor di Dios, nos tin ku sòru pa nos “no mishi ku nada impuru” i hasi esfuerso pa protehá e bèrdat kontra tur forma di korupshon.—Isaías 52:11; Ezekiel 44:23; Galationan 5:9.

3, 4. Dikon nos mester tene kuenta ku e prinsipionan di Beibel ora nos ta analisá kustumber- i selebrashonnan popular?

³ Lamentablemente, den tempu di e promé kristiannan  tambe tabatin intento pa desviá nan for di siñansa berdadero. Na prinsipio esei no a logra, pasobra e apòstelnan a fungi komo frena. Despues ku nan a muri, e kristiannan falsu, kendenan no tabata stima e bèrdat, a kuminsá adoptá hopi kustumber, selebrashon i dia “sagrado” for di paganismo i hasi komo si fuera e kosnan ei tabatin un orígen kristian. (2 Tesalonisensenan 2:7, 10) Den e kapítulo akí nos lo analisá algun selebrashon. Segun ku nos ta hasi esei, tuma nota kon nan ta reflehá e spiritu di mundu i no di Dios. Por lo general, e selebrashonnan di mundu tin un kos en komun: Nan ta traha riba e deseonan di karni i ta promové kreensia falsu i bruheria, kosnan ku ta karakterístika di “Babilonia e Grandi.” * (Revelashon 18:2-4, 23) No lubidá ku Yehova sa bon bon for di kua práktikanan religioso repugnante hopi kustumber popular a originá. No tin duda ku e ta haña e selebrashonnan ei mesun ofensivo awe ku ántes. Akaso no ta su punto di bista mester ta esun di mas importante pa nos?—2 Huan 6, 7.

⁴ Komo kristian berdadero, nos sa ku sierto selebrashon no ta agradá Yehova. Pero nos mester ta firmemente determiná tambe den nos kurason pa no tin nada di hasi ku nan. Pues, ta bon pa nos repasá dikon e selebrashonnan ei no ta agradá Yehova. E ora ei nos lo ta mas desididu pa evitá kualke kos ku lo por stroba nos di keda den e amor di Dios.

5. Dikon nos por ta sigur ku Hesus no a nase dia 25 di desèmber?

⁵ Beibel no ta menshoná ningun kaminda ku a selebrá Hesus su fecha natal. De echo, nos no sa mes ki dia presis el a nase. Pero un kos ta sigur, e no a nase dia 25 di desèmber ora  ku ta pleno wenter den e parti ei di mundu. * Dikon nos ta bisa asina? Pa kuminsá, Lukas a skirbi ku ora Hesus a nase “tabatin wardadó di karné ta biba pafó den kunuku,” kuidando nan karnénan. (Lukas 2:8-11) Si nan tabatin e kustumber di “biba pafó den kunuku” henter aña, lo no tabatin nodi di menshoná esei. Pero komo ku áwaseru friu i sneu tabata kai na Bètlehèm den wenter, e wardadónan no tabata keda “biba pafó den kunuku,” sino mas bien, nan tabata tene nan karnénan paden. Ademas, Hose ku Maria a bai Bètlehèm pasobra Sésar Ougusto a duna òrdu pa tene un senso. (Lukas 2:1-7) Ta masha improbabel ku Sésar lo a ordená e pueblo hudiu, ku no tabatin lei ku e gobernashon romano, pa bai e stat natal di nan antepasadonan den pleno wenter pa registrá nan mes.

6, 7. (a) Di unda e kustumbernan di Pasku a originá? (b) Ki kontraste nos por mira entre dunamentu di regalo durante Pasku i ora un kristian ta duna regalo?

⁶ Nos no ta haña e orígen di Pasku den Beibel, sino den fiesta pagano di antigwedat. Un di nan tabata Saturnalia, un selebrashon dediká na Saturno, e dios romano di agrikultura. Un otro selebrashon tabata “e fecha natal di e solo invensibel,” segun New Catholic Encyclopedia. E dia ei a kai riba 25 di desèmber, segun kálkulo di e debotonan di e dios Mitra. E ensiklopedia a sigui bisa ku “Pasku a originá den un époka ku adorashon di solo tabata masha importante na Roma,” esta, un tres siglo asina despues di morto di Kristu.

⁷ Durante e selebrashonnan ei, e paganonan tabata duna otro regalo i organisá banketenan grandi, práktikanan ku te awe ta parti di selebrashon di Pasku. Meskos ku ta e kaso awe, gran parti di e dunamentu di regalo durante e temporada di fiesta ei no tabata na armonia ku e spiritu di 2 Korintionan  9:7, ku ta bisa: “Laga kada hende hasi manera el a disidí den su kurason, no di mala gana, ni fòrsá, pasobra Dios ta stima hende ku ta duna ku alegria.” Amor ta motivá kristiannan berdadero pa duna, sin ku nan ta spera nada a kambio, i sin ku e dunamentu ta mará na un sierto fecha. (Lukas 14:12-14; Echonan 20:35) Ademas, nan ta masha kontentu ku nan a ser librá di un karga pisá: e tenshon i ansiedat rondó di Pasku i tur e debenan ku hopi hende ta hinka nan kurpa aden durante e temporada ei.—Mateo 11:28-30; Huan 8:32.

8. Ta regalo di kumpleaño e astrólogonan a duna Hesus? Splika esei.

⁸ Pero tin hende ta insistí ku ta regalo di kumpleaño e astrólogonan a duna Hesus. En realidat, no ta asina. Nan dunamentu di regalo tabata simplemente un muestra di rekonosementu na un persona importante, manera tabata e kustumber den tempu bíbliko. (1 Reinan 10:1, 2, 10, 13; Mateo 2:2, 11) De echo, no ta e anochi ku Hesus a nase nan a bini. Nan a topa  Hesus hopi luna despues, ora ku e no tabata un bebi resien nasí mas den pesebre, sino bibando den un kas.

9. Kiko a sosodé na e úniko fiestanan di kumpleaño menshoná den Beibel?

⁹ Aunke semper nasementu di un bebi tabata i ta un okashon di alegria, Beibel no ta menshoná selebrashon di e fecha natal di ningun sirbidó di Dios. (Salmo 127:3) Akaso e eskritornan di Beibel simplemente a lubidá di menshoná ku tabatin un selebrashon di hasimentu di aña pa e Yu di Dios? Nò, pasobra Beibel ta papia sí di dos fiesta di kumpleaño: di Fárao di Egipto i di Heródes Antipas. (Génesis 40:20-22; Marko 6:21-29) Pero e ta presentá ámbos suseso den un lus negativo. Durante e fiesta di kumpleaño di Fárao, nan a kita kabes di un  di su sirbidónan. Pió ainda, durante e fiesta di kumpleaño di Heródes, nan a kita kabes di Huan Boutista, un sirbidó di Dios.

10, 11. Kon e kristiannan di promé a mira selebrashon di hasimentu di aña, i dikon?

¹⁰ The World Book Encyclopedia ta bisa ku “e promé kristiannan a konsiderá selebrashon di un hende su dia di nasementu un kustumber pagano.” Por ehèmpel, e griegonan di antigwedat tabata kere ku kada persona tabatin un spiritu wardadó ku tabata presente na su nasementu i ku despues di esei a sigui proteh’é. E spiritu ei “tabatin un relashon mágiko ku e dios riba kende su dia e persona a nase,” segun e buki The Lore of Birthdays (E Tradishon di Hasimentu di Aña). Ademas, pa hopi tempu kaba hende ta konektá e fecha di nasementu ku astrologia i horoskop.

¹¹ Sirbidónan di Dios di pasado a rechasá e kustumbernan di hasimentu di aña no solamente pasobra nan tabata konektá ku paganismo i spiritismo, sino probablemente pa un otro motibu tambe. Kiko esei tabata? Nan tabata hende humilde i modesto ku no a mira nan nasementu na mundu komo algu asina importante ku mester a selebr’é. * (Mikéas 6:8; Lukas 9:48) Al kontrario, nan a duna gloria na Yehova i a gradisié pa e maravioso regalo di bida. *—Salmo 8:3, 4; 36:9; Revelashon 4:11.

12. Den ki sentido e dia ku nos muri ta mihó ku e dia ku nos nase?

¹² Eklesiástes 7:1 ta bisa: “Un bon nòmber ta mihó ku un bon ungwento, i e dia di un hende su morto ta mihó ku e dia di su nasementu.” Den e versíkulo akí, nos “nòmber” ta e bon reputashon ku nos a gana serka Dios pa medio di nos sirbishi fiel. Pa e motibu ei, tur hende ku muri fiel ta keda grabá den e  memoria di Dios i tin e garantia ku nan lo bolbe biba. (Yòb 14:14, 15) Ta bon pa tuma nota ku e úniko konmemorashon ku Beibel ta manda kristiannan selebrá no ta un nasementu, sino un morto, esta, esun di Hesus, kende su “nòmber” ta esensial pa nos salbashon.—Lukas 22:17-20; Hebreonan 1:3, 4.

13, 14. Di unda e kustumbernan popular di Pasku di Resurekshon a bini?

¹³ Hende ta bisa ku Pasku di Resurekshon, òf Pasku Grandi, ta pa konmemorá e resurekshon di Hesus, pero en realidat esei a sali for di religion falsu. Pensa un ratu, kiko konènchi i webu tin di hasi ku Pasku di Resurekshon? Segun Encyclopædia Britannica, for di hopi tempu pasá webu “tabata un símbolo importante di bida nobo i resurekshon,” miéntras ku konènchi a fungi komo símbolo di fertilidat. Pues, Pasku di Resurekshon ta un rito di fertilidat selebrá bou di e kapa di ta konmemorá e resurekshon di Kristu. *

¹⁴ Yehova lo a aprobá pa nan konmemorá e resurekshon di su Yu ku rito repugnante di fertilidat? Apsolutamente ku nò! (2 Korintionan 6:17, 18) De echo, Beibel no ta manda mes pa konmemorá e resurekshon di Hesus i pa kolmo, nan ta hasi esei den algun pais bou di un nòmber pagano, loke ta hasi e selebrashon un akto mas desleal ainda.

15. Kiko ta e orígen di Halloween, i ki detayenan signifikativo bo por menshoná relashoná ku e fecha ku ta selebr’é?

¹⁵ Kiko ta e orígen di Halloween? Halloween ta abreviashon di e nòmber ingles All Hallows’ Eve i ta nifiká “bispu di Dia di  Tur Santu” (na spañó e yama Noche de Brujas). Nan ta selebrá e fiesta akí, konosí pa su dekorashonnan makabro, manera hèks i kabouter, dia 31 di òktober. Su orígen ta di e époka di e antiguo pueblo séltiko di Gran Bretaña i Irlanda. Tur aña, riba e anochi di e luna yen mas serka di 1 di novèmber, nan a selebrá e fiesta di Samhain (ku ta nifiká “Fin di Zomer”). Nan tabata kere ku durante e anochi di Samhain, e kortina entre e mundu humano i esun sobrenatural tabata habri i ku mal spiritu i bon spiritu tabata kana rònt riba tera. Nan tabata kere ku alma di e defuntunan tabata regresá nan kas, i famianan tabata pone kuminda i bibida pa e spiritunan di bishita, ku e speransa di kalma nan. Pues awe, ora mucha bistí na spiritu òf hèks ta bai di kas pa kas, menasando di hasi un travesura si nan no haña mangel, nan ta kontinuá inkonsientemente ku e antiguo ritual pagano di Samhain.

16, 17. (a) Dikon parehanan kristian ku ta plania pa kasa mester analisá e kustumbernan lokal di kasamentu den lus di Beibel? (b) Relashoná ku tradishonnan manera tira aros òf stroistu, kiko un kristian mester tuma na kuenta?

¹⁶ Beibel ta menshoná ‘stèm di brùidehòm i di brùit’ entre e kosnan ku ta karakterisá Babilonia e Grandi, e imperio mundial di religion falsu. (Revelashon 18:23) Dikon? Pa un parti esaki ta debí na religion falsu su tantísimo práktikanan ligá ku bruheria ku por kontaminá un matrimonio for di e dia di kasamentu.—Marko 10:6-9.

¹⁷ E tradishon- òf kustumbernan akí, ku ta varia di un pais pa otro, por parse inosente pero kisas nan a sali for di práktikanan babilóniko ku supuestamente ta trese “fortuna” òf “suerte” pa e pareha resien kasá i nan invitadonan. (Isaías 65:11; BPK) Tuma por ehèmpel e tradishon di tira aros òf stroistu. E tradishon akí kisas a sali for di e idea ku kuminda ta kalma mal spiritu i ta evitá ku nan ta kousa daño na e brùit i brùidehòm. Ademas, for di hopi tempu pasá hende  misteriosamente tabata konektá aros ku fertilidat, felisidat i bida largu. Ta bisto ku ken ku ke keda den e amor di Dios lo evitá tal kustumber kontaminá.—2 Korintionan 6:14-18.

18. Menshoná algun prinsipio bíbliko ku por guia tantu un pareha ku ta bai kasa komo nan invitadonan.

¹⁸ Sirbidónan di Yehova ta evitá tambe e práktikanan di mundu ku ta kita e dignidat di un kasamentu i di e fiesta di kasamentu òf ku por ofendé e konsenshi di algun hende. Por ehèmpel, nan no ta duna spich ku ta kontené komentarionan sarkástiko òf dòbel sintí, ni nan no ta hasi mal chansa òf bisa kosnan ku por brongosá e pareha resien kasá i otro hende. (Proverbionan 26:18, 19; Lukas 6:31; 10:27) Tambe nan ta evitá resèpsi ekstrabagante ku ta parse un ‘sprookje’ i ku no ta reflehá modestia, sino mas bien ta pa “broma ku loke [nan] tin.” (1 Huan 2:16) Si bo ta planiando bo kasamentu, no lubidá ku Yehova ke pa e dia spesial ei ta algu ku semper bo por rekordá ku goso, i no ku duele. *

19, 20. Kiko un fuente di mundu a bisa tokante e orígen di brinda, i dikon e kustumber akí ta inaseptabel pa un kristian?

¹⁹ Un kustumber masha popular na kasamentu i otro okashonnan sosial ta di dal un bríndis. Na aña 1995, e buki na ingles Manual Internashonal di Alkohòl i Kultura a bisa ku e kustumber ei “probablemente ta un aspekto no-religioso ku a resta di e ofrendanan di bibida di antigwedat den kua nan tabata ofresé un líkido sagrado na e diosnan . . . a kambio di un deseo, un orashon resumí den e palabranan ‘un bida largu!’ òf ‘na bo salú!’”

²⁰ Ta bèrdat ku hopi hende no ta konsiderá un bríndis un gesto religioso òf superstisioso. Pero bo por mira e kustumber di hisa un glas di biña na haltu komo un orashon òf súplika na “shelu,” òf na un forsa sobrenatural, pa un bendishon.  E forma akí di pidi bendishon no ta na armonia ku loke tin den Beibel.—Huan 14:6; 16:23. *

21. Ki selebrashonnan popular un kristian lo evitá apesar ku nan no ta di orígen religioso, i dikon?

²¹ Mundu su norma- i balornan ta bayendo atras drástikamente, i ta Babilonia e Grandi ta fomentá esaki na un manera direkto òf indirekto. Tin pais ku tur aña ta organisá fiestanan manera karnaval, ku ta inkluí baile indesente i ku asta ta glorifiká e estilo di bida homoseksual. Ta apropiá pa un hende ku ta ‘stima Yehova’ asistí na evenementonan asina òf sinta wak nan? E ta demostrá asina ku di bèrdat e ta odia maldat? (Salmo 1:1, 2; 97:10) Sin duda, ta muchu mas mihó pa nos tin e mesun aktitut ku e eskritor di salmo ku a pidi Dios: “Kita mi bista for di kosnan sin balor”!—Salmo 119:37, BPK.

22. Ki ora un kristian por disidí a base di su konsenshi si e ta partisipá den un selebrashon òf nò?

²² Nos tin ku tene kuidou pa riba e dianan di fiesta ku no ta apropiá pa un kristian nos komportashon no duna hende e impreshon ku nos ta partisipá den e selebrashon. Pablo a skirbi: “Sea ku boso ta kome, bebe òf kiko ku boso ta hasi, hasi tur kos pa e gloria di Dios.” (1 Korintionan 10:31; wak e kuadro “ Yudansa pa Tuma Desishon Sabí.”) Pero kiko di un kustumber òf selebrashon ku no tin ningun nifikashon religioso, ku no ta di karakter polítiko ni patriótiko i ku no ta violá ningun prinsipio bíbliko? Den tal kaso, kada kristian mes por disidí si e ta partisipá den dje òf nò. Pero ta klaru ku lo e tene kuenta ku sintimentu di otro hende pa e no pone nan trompeká.

23, 24. Kon nos por duna un bon testimonio tokante Yehova su normanan hustu?

²³ Hopi hende ta mira sierto dia di fiesta popular  prinsipalmente komo un oportunidat pa topa famia i amigu. Esei ta pone ku tin hende eróneamente ta asumí ku e punto di bista bíbliko di Testigunan di Yehova ta ekstremo i ku nan no tin amor pa próhimo. Den tal kaso, nos por splika nan bondadosamente ku nos gusta pasa un ratu kontentu huntu ku nos famia- i amigunan. (Proverbionan 11:25; Eklesiástes 3:12, 13; 2 Korintionan 9:7) Nos ta hasi esei henter aña, pero komo ku nos stima Dios i su normanan hustu, nos lo no ke daña e dushi okashonnan ei ku kustumber ku ta ofend’é.—Wak e kuadro “ E Religion Berdadero Ta Duna Mas Goso.”

²⁴ Algun Testigu a haña bon resultado ora nan a usa algun punto for di kapítulo 16 di e buki Kiko Beibel Ta Siña Realmente? * pa kontestá hende sinsero ku a hasi nan pregunta. Pero no lubidá ku nos meta ta pa gana kurason, no gana diskushon. Pues, nos manera di papia semper mester ta suave, ku rèspèt i “ku grasia, sasoná ku salu.”—Kolosensenan 4:6.

25, 26. Kon mayornan por fortalesé e fe di nan yunan i yuda nan stima Yehova mas?

²⁵ Komo sirbidó di Yehova, nos ta bon informá. Nos sa dikon nos ta aseptá òf rechasá sierto práktika i kreensia. (Hebreonan 5:14) Pues mayornan, siña boso yunan komprondé e prinsipionan bíbliko riba kua nos posishon ta basá. Hasiendo esei, boso ta fortalesé nan fe, boso ta prepará nan pa duna un kontesta bíbliko na e hendenan ku ta kuestioná loke nan ta kere i boso ta yuda nan keda den e amor di Yehova.—Isaías 48:17, 18; 1 Pedro 3:15.

²⁶ Hende ku ta adorá Dios “ku spiritu i ku bèrdat” no solamente ta evitá selebrashon ku ta kontrario na prinsipio bíbliko, sino tambe ta hasi esfuerso pa ta onesto den tur aspekto di bida. Awe, hopi hende ta haña ku no ta kumbiní pa bo ta onesto. Pero manera nos lo bai mira den e siguiente kapítulo, e normanan di Dios semper ta mihó.