1. Kiko Hesus a enfatisá durante su último anochi komo hende riba tera?

DURANTE Hesus su último anochi komo hende riba tera, el a ekspresá su preokupashon pa e futuro di su siguidónan. El a asta hasi orashon tokante e asuntu, bisando su Tata: “Mi no ta pidi bo pa saka nan for di mundu, ma pa bo protehá nan pa motibu di e Malbado. Nan no ta parti di mundu, meskos ku ami no ta parti di mundu.” (Huan 17:15, 16) Ku e petishon sinsero akí, Hesus a demostrá kuantu e tabata stima su disipelnan i tambe kon importante e palabranan ku el a bisa algun di nan mas promé tabata, esta: “Boso no ta parti di mundu.” (Huan 15:19) Klaramente, pa Hesus tabata masha importante pa su siguidónan keda separá for di mundu!

2. Di kua “mundu” Hesus a papia?

² E “mundu” ku Hesus a papia di dje ta referí na tur hende alehá for di Dios i dominá pa Satanas i pa e spiritu egoista i orguyoso ku e ta plama. (Huan 14:30; Efesionan 2:2; 1 Huan 5:19) Ta p’esei Beibel ta bisa: “Amistat ku mundu ta enemistat ku Dios.” (Santiago 4:4) Pero, kon nos ku ke keda den e amor di Dios por biba den mundu i tòg keda separá for di dje? Tin sinku kos ku por yuda nos: (1) keda neutral den asuntu polítiko i keda leal na e Reino di Dios, (2) resistí e spiritu di mundu, (3) ser modesto den nos  forma di bisti i den nos aparensia, (4) mantené nos wowo simpel i (5) bisti e armadura spiritual. Laga nos analisá nan un pa un.

3. (a) Dikon Hesus no a mete den asuntu polítiko di su tempu? (b) Dikon nos por bisa ku Hesus su siguidónan ungí ta sirbi komo embahador? (Inkluí nota.)

³ Hesus no a mete den asuntu polítiko di su tempu; mas bien, el a enfoká riba predikashon di e Reino di Dios, e futuro gobièrnu selestial di kua e lo ta Rei. (Daniel 7:13, 14; Lukas 4:43; 17:20, 21) P’esei e por a bisa ora e tabata dilanti di e gobernador romano Ponsio Pilato ku su “reino no ta parti di e mundu akí.” (Huan 18:36) Kristu su siguidónan fiel ta keda leal na dje i ta imitá su ehèmpel kedando leal na e Reino di Dios i anunsiando e Reino ei rònt mundu. (Mateo 24:14) Apòstel Pablo a skirbi: “Nos ta embahador den nòmber di Kristu . . . Pues, komo supstituto di Kristu, nos ta roga hende: ‘Rekonsiliá ku Dios.’” *—2 Korintionan 5:20.

4. Di ki manera kristian berdadero semper a demostrá nan lealtat na e Reino di Dios? (Wak e kuadro “ E Promé Kristiannan A Keda Neutral.”)

⁴ Un embahador ta representá un pais òf soberano den eksterior. Pues, e no ta mete den asuntu interno di e pais kaminda e ta sirbi; e ta keda neutral. Sinembargo, e ta promové e interesnan di e gobièrnu di e pais ku e ta representá. Meskos ta e kaso ku e disipelnan ungí di Kristu, kende nan “siudadania ta den shelu.” (Filipensenan 3:20) Nan predikashon entusiasmá di e Reino a yuda miónes di e ‘otro karnénan’ di Kristu “rekonsiliá ku Dios.” (Huan  10:16; Mateo 25:31-40) E otro karnénan akí tambe ta representá e Reino, ya ku nan ta apoyá e rumannan ungí di Hesus. Komo un tou uní ku ta promové e Reino Mesiániko, ámbos grupo ta keda estriktamente neutral den asuntu polítiko di mundu.—Isaías 2:2-4.

5. Menshoná un otro motibu pakiko kristian berdadero ta neutral.

 ⁵ Lealtat na Kristu no ta e úniko motibu pakiko kristian berdadero ta keda neutral. Pa kuminsá, e israelitanan di antigwedat tabata biba den ún pais so, ma nos awe ta forma parti di un hermandat ku ta bini di tur nashon. (Mateo 28:19; 1 Pedro 2:9) P’esei, kiko lo pasa si nos djòin un partido polítiko? Wèl, nos lo pone nos union kristian na peliger i tambe nos frankesa di papia tokante e mensahe di Reino. (1 Korintionan 1:10) Ademas, den tempu di guera, nos lo haña nos ta bringa kontra nos rumannan den fe, kende nos tin ku stima. (Huan 13:34, 35; 1 Huan 3:10-12) Ku bon motibu anto, Hesus a bisa su disipelnan pa no usa spada. Asta el a bisa nan pa stima nan enemigunan!—Mateo 5:44; 26:52; wak e kuadro “ Ami Ta Neutral?”

6. Ki efekto bo dedikashon na Dios tin riba bo relashon ku Sésar?

⁶ Komo kristian berdadero, nos a dediká nos bida na Dios, no na ningun hende ni organisashon humano ni nashon. Segun 1 Korintionan 6:19 i 20: “Boso no ta pertenesé na boso mes: Dios a kumpra boso pa un preis haltu.” Pues, aunke siguidónan di Hesus ta duna Sésar loke e tin derecho riba dje—onor, belasting i sumishon te na e grado ku Dios ta permití Sésar eksigí esei—nan deber prinsipal ta pa duna “Dios loke ta di Dios.” (Marko 12:17; Romanonan 13:1-7) Entre e kosnan ku “ta di Dios” ta nan adorashon, nan amor di henter alma i nan obedensia i lealtat. Si ta nesesario, nan ta dispuesto pa entregá nan bida pa Dios.—Lukas 4:8; 10:27; Echonan 5:29; Romanonan 14:8.

7, 8. Kiko ta “e spiritu di mundu,” i kon e spiritu ei ta “obra” den un persona?

⁷ Un otro manera ku kristiannan ta keda separá for di mundu ta ora nan ta resistí su spiritu malbado. Pablo a skirbi: “Nos a aseptá e spiritu ku ta bini di Dios—no e spiritu di mundu.” (1 Korintionan 2:12) El a bisa e efesionan:  “Boso un tempu tabata kana segun . . . e mundu akí, segun e gobernante di e outoridat di airu, e spiritu ku awor ta obra den e yunan di desobedensia.”—Efesionan 2:2, 3.

⁸ Kiko ta e “airu,” òf e spiritu, di mundu? Esei ta e forsa invisibel ku ta influensiá hende pa hasi malu. Kon? E ta instigá nan pa desobedesé Dios i ta fomentá e ‘deseo di karni i deseo di wowo.’ (1 Huan 2:16; 1 Timoteo 6:9, 10) Dikon e spiritu ei tin e “outoridat” òf poder akí riba mundu? Pasobra e ta atraé e karni pekaminoso, e ta difísil pa rekonos’é i e ta ehersé un influensia konstante ku ta penetrá tur kaminda meskos ku “airu.” Ademas, e ta “obra” den un persona dor di desaroyá gradualmente kualidatnan antikristian, manera egoismo, arogansia, ambishon i e aktitut di independensia moral i rebeldia. * Simplemente bisá, e spiritu di mundu poko poko ta laga e karakterístikanan di Diabel krese den un hende su kurason.—Huan 8:44; Echonan 13:10; 1 Huan 3:8, 10.

9. Menshoná algun manera ku e spiritu di mundu por drenta nos mente i kurason.

⁹ Akaso e spiritu di mundu por saka rais den bo mente i kurason? Sí, pero solamente si bo no keda alerta. (Proverbionan 4:23) Hopi biaha e influensia di e spiritu malbado ei ta kuminsá sin ku bo ta ripará. Por ehèmpel, bo ta kuminsá anda ku personanan ku por parse bon hende, pero ku en realidat, no ta stima Yehova. (Proverbionan 13:20; 1 Korintionan 15:33) Bo por apsorbá e spiritu ei tambe via literatura kuestionabel, websitenan pornográfiko òf apóstata, dibertishon ku no ta sano i deportenan sumamente kompetitivo; bon mirá, via kualke persona òf kos ku ta transmití e manera di pensa di Satanas òf di su mundu.

10. Kon nos por resistí e spiritu di mundu?

 ¹⁰ Kon nos por resistí e spiritu peligroso ei di mundu i keda den e amor di Dios? Solamente si nos probechá plenamente di e medionan ku Yehova a pone disponibel pa fortalesé nos spiritualidat—manera su Palabra, e reunionnan, etcetera—i si nos pidié konstantemente pa duna nos su spiritu santu. Yehova ta hopi mas poderoso ku Diabel i su mundu malbado. (1 Huan 4:4) Pues, ta masha  importante pa nos keda serka di Yehova pa medio di orashon!

11. Kon e spiritu di mundu a influensiá e normanan di bistimentu?

¹¹ Bo por mira na un hende su forma di bisti, na su aparensia i na su higiena ki spiritu ta impuls’é. Na hopi pais, e normanan di bistimentu a bai atras asina tantu ku un komentarista di televishon a bisa ku aki poko dia no ta sobra nada pa e prostitutanan bisti pa nan hala atenshon. Asta mucha muhé ku no ta tiner ainda ta sigui e forma di bisti akí, ku un korant a deskribí komo “hopi sunú i nada di modestia.” Tambe ta hopi popular pa bisti kon ku ta, na un manera slòns ku ta reflehá un aktitut rebelde i tambe falta di dignidat i rèspèt propio.

12, 13. Kua ta e prinsipionan ku mester guia nos den bistimentu i kuido di nos aparensia?

¹² Komo sirbidó di Yehova ta lógiko ku nos ke tin un bon aparensia, lokual ta nifiká bisti na òrdu, limpi, nèchi i apropiá pa kada okashon. Nos aparensia semper mester reflehá “modestia i sano huisio,” lokual huntu ku “bon obra” ta pas pa tur hende “ku ta bisa ku nan ta deboto na Dios,” tantu hende hòmber komo hende muhé. Klaru ku nos preokupashon prinsipal no mester ta pa hala atenshon na nos mes, sino pa “keda den e amor di Dios.” (1 Timoteo 2:9, 10; Hudas 21) De echo, nos adorno di mas bunita mester ta ‘e hende ku nos ta di paden . . . loke ta di gran balor den bista di Dios.’—1 Pedro 3:3, 4.

¹³ Kòrda tambe ku nos forma di bisti i e manera ku nos ta kuida nos aparensia por influensiá e manera ku otro hende ta mira adorashon berdadero. Ora usa e palabra griego tradusí komo “modestia” den sentido moral, e ta ekspresá e idea di rèspèt i atmirashon pa sintimentu i opinion di otro hende. Pues, nos ta hasi bon di konsiderá e  konsenshi di otro hende mas importante ku e derechonan ku nos ta pensa ku nos tin en konekshon ku e manera ku nos ke bisti. Mas ku tur kos, nos ke onra Yehova i su pueblo i rekomendá nos mes komo sirbidó di Dios, sí, nos ke “hasi tur kos pa e gloria di Dios.”—1 Korintionan 4:9; 10:31; 2 Korintionan 6:3, 4; 7:1.

14. Relashoná ku nos aparensia i higiena, kiko nos mester puntra nos mes?

¹⁴ Nos forma di bisti, e kuido di nos aparensia i nos higiena ta asta mas importante ainda ora nos ta den sirbishi di vèlt òf na un reunion kristian. Puntra bo mes: ‘Mi aparensia i higiena personal ta hala atenshon? Otro hende ta sinti bèrgwensa di mi? Kiko ta mas importante pa mi: mi derecho den e asuntunan akí òf kumpli ku e rekisitonan pa por risibí privilegio den kongregashon?’—Salmo 68:6; Filipensenan 4:5; 1 Pedro 5:6.

15. Dikon e Palabra di Dios no ta duna un lista di regla tokante bistimentu, kuido di aparensia i higiena?

¹⁵ Beibel no ta duna un lista di regla tokante bistimentu, higiena i kuido di aparensia. Dikon nò? Pasobra Yehova no tin intenshon di kita nos libertat di skohe i di pensa pa nos mes. Al kontrario, e ke pa nos bira hende madurá ku por rasoná riba prinsipio di Beibel i kende “a usa nan kapasidat di komprondé i asina a entrená esaki pa distinguí loke ta  bon for di loke ta malu.” (Hebreonan 5:14) Es mas, e ke pa nos laga amor guia nos, sí, amor pa Dios i pa próhimo. (Marko 12:30, 31) Denter di e límitenan ei, por tin un variedat amplio di stail di bisti i manera di kuida aparensia. Na kualke reunion grandi di e pueblo di Yehova na mundu, nos por mira kantidat di ruman kontentu, bistí na tur koló di paña.

16. Kon e spiritu di mundu ta kontrali na e siñansa di Hesus, i kiko nos mester puntra nos mes?

¹⁶ E spiritu di mundu ta engañoso i ta motivá miónes di hende pa buska felisidat den plaka i kosnan material. Sinembargo, Hesus a bisa: “Asta ora un hende tin na abundansia, su bida no ta dependé di loke e tin.” (Lukas 12:15) Hesus no a aprobá e estilo di bida ekstremo di priva bo mes di tur plaser i luho. Pero sí el a siña hende ku “esnan ku ta  konsiente di nan nesesidat spiritual” i esnan ku mantené un wowo “simpel” lo haña berdadero felisidat. (Mateo 5:3; 6:22, 23) Puntra bo mes: ‘Di bèrdat mi ta kere loke Hesus a siña hende, òf mi ta bou di influensia di e “tata di mentira”? (Huan 8:44) Kiko mi palabranan, mi metanan, mi prioridatnan i mi manera di biba ta revelá?’—Lukas 6:45; 21:34-36; 2 Huan 6.

17. Menshoná algun benefisio ku esnan ku ta mantené un wowo simpel ta risibí.

¹⁷ Hesus a bisa: “Sabiduria ta demostrá pa medio di su obranan ku e ta hustu.” (Mateo 11:19) Laga nos konsiderá algun benefisio ku esnan ku ta mantené un wowo simpel ta risibí. Pa kuminsá, nan ta haña berdadero alivio den e sirbishi di Reino. (Mateo 11:29, 30) Ademas, nan ta skapa di hopi inkietut, angustia i doló. (1 Timoteo 6:9, 10) I komo ku nan ta keda kontentu ku loke nan tin, nan tin mas tempu pa nan famia i pa nan rumannan den fe. Kisas nan ta asta drumi mihó. (Eklesiástes 5:12) Nan ta biba mas felis, ya ku nan ta kompartí loke nan tin ku otro hende. (Echonan 20:35) Tambe nan ta “abundá den speransa” i tin pas mental i satisfakshon. (Romanonan 15:13; Mateo 6:31, 32) E bendishonnan akí realmente ta impagabel!

18. Kon Beibel ta deskribí nos enemigu, su métodonan i e tipo di lucha ku nos tin?

¹⁸ Si nos keda den e amor di Dios, nos lo haña tambe protekshon kontra Satanas su esfuersonan pa stroba nos di sirbi Dios, di haña felisidat i asta di haña bida eterno. (1 Pedro 5:8) Pablo a bisa: “Nos lucha no ta kontra karni i sanger, sino kontra gobièrnu, kontra outoridat, kontra gobernante di mundu di e skuridat akí, kontra forsanan spiritual di maldat den lugánan selestial.” (Efesionan 6:12) E palabra griego tradusí komo “lucha” ta duna e idea di un kombate man na man i no di un kombate for di distansia,  kisas den e siguridat di un bùnker skondí bou di tera. Ademas, e palabranan “gobièrnu,” “outoridat” i “gobernante di mundu” ta indiká ku e atake for di e region di spiritu ta bon organisá i planiá.

19. Deskribí e armadura spiritual di un kristian.

¹⁹ Apesar di nos debilidat- i limitashonnan, nos por sali viktorioso. Kon? Si nos “bisti e armadura kompleto ku Dios ta duna.” (Efesionan 6:13) Nos ta lesa e siguiente deskripshon di e armadura ei na Efesionan 6:14-18: “P’esei, para firme ku e bèrdat mará manera un faha rònt di boso sintura, i boso pechu protehá ku e harnas di hustisia, i ku boso pia bistí ku e sandalia pa prediká e bon notisia di pas. Den tur sirkunstansia, tuma e eskudo grandi di fe, ku kua boso lo por paga tur e flechanan sendí di e Malbado. Ademas, aseptá e hèlm [òf, speransa] di salbashon, i e spada di spiritu, esta, e palabra di Dios. A la bes, sigui resa tur ora bai bou di guia di spiritu santu, usando tur forma di orashon i súplika.”

20. Kon nos situashon ta distinto for di un sòldá literal?

²⁰ E armadura spiritual nunka lo laga nos na kaya, pasobra e ta bini di Dios. Un kos sí, nos mester tiné semper bistí. Sòldánan literal tin periodonan largu di pas entre e gueranan ku nan ta bringa. Distinto for di nan, kristiannan ta nònstòp den un lucha di bida i morto. Ta ora Dios destruí e mundu di Satanas i benta tur spiritu malbado den abismo lo bini un fin na e lucha ei. (Revelashon 12:17; 20:1-3) Pues, si bo ta luchando kontra debilidat òf mal deseo, no entregá. Nos tur tin ku ‘gòlpia nos kurpa,’ na moda di papia, pa nos por keda fiel na Yehova. (1 Korintionan 9:27) De echo, ta yùist ora nos no ta luchando nos tin ku preokupá.

21. Kua ta e úniko manera pa nos sali viktorioso den nos guera spiritual?

²¹ Ademas, nos no por gana e lucha akí riba nos mes forsa.  P’esei Pablo ta kòrda nos ku nos mester “sigui resa tur ora bai” na Yehova. A la bes, nos tin ku skucha Yehova. Nos ta hasi esei ora nos ta studia su Palabra i anda mas tantu posibel ku ‘nos kompañeronan den lucha,’ ya ku nos no ta den e lucha akí nos so. (Filemon 2; Hebreonan 10:24, 25) Si nos keda fiel riba tur e terenonan akí, nos no solamente lo sali viktorioso for di e lucha, sino tambe nos lo por defendé nos fe ora esaki ta bou di atake.

22, 23. (a) Dikon semper nos mester ta kla pa defendé nos fe, i kiko nos mester puntra nos mes? (b) Kiko nos lo analisá den e siguiente kapítulo?

²² Hesus a bisa: “Komo ku boso no ta parti di mundu, . . . mundu ta odia boso.” (Huan 15:19) Pues, kristiannan mester ta semper kla pa defendé nan fe, i nan mester hasi esaki na un manera suave i ku rèspèt. (1 Pedro 3:15) Puntra bo mes: ‘Mi ta komprondé dikon tin biaha Testigunan di Yehova ta tuma un posishon ku ta kontrario na opinion popular? Ora mi tin ku tuma e posishon difísil ei, mi ta kompletamente konvensí ku loke Beibel i e esklabo fiel ta bisa ta korekto? (Mateo 24:45; Huan 17:17) I ora mi tin ku hasi loke ta korekto den bista di Yehova, mi ta demostrá ku no solamente mi ta dispuesto pa ta diferente, sino ku mi ta orguyoso tambe di esei?’—Salmo 34:2; Mateo 10:32, 33.

²³ Sinembargo, Diabel ta usa tambe táktikanan mas sutil pa pone nos deseo pa keda separá for di mundu na prueba. Por ehèmpel, manera a keda menshoná mas promé, e ta purba lòk e sirbidónan di Yehova pa medio di dibertishon degradá pa nan bai kuné den mundu. Kon nos por skohe dibertishon sano ku ta refreská nos i laga nos ku un konsenshi limpi? Nos lo analisá esei den e siguiente kapítulo.