DÉKADANAN di antemano, studiantenan di Beibel a proklamá ku desaroyonan signifikativo lo tuma lugá na aña 1914. Kiko esakinan tabata, i ki evidensia tin ku ta señalá 1914 komo un aña asina importante?

Manera ta pará skirbí na Lukas 21:24, Hesus a bisa: “Yerusalèm lo wòrdu trapá dor di e paganonan te ora ku e  tempunan di e paganonan keda kumplí.” Yerusalèm tabata e siudat kapital di e nashon hudiu, e asiento di gobernashon di e liña di reinan ku a bin for di e kas di Rei David. (Salmo 48:1, 2) Sin embargo, e reinan aki tabata úniko entre e lidernan di e nashonnan rònt di nan. Nan a sinta riba ‘e trono di Yehova’ komo Dios su representante. (1 Krónikanan 29:23) Yerusalèm tabata pues un símbolo di Yehova su gobernashon.

Pero kon i na ki tempu Dios su gobernashon a kuminsá “wòrdu trapá dor di e paganonan”? Esaki a sosodé na aña 607 promé ku nos era, ora ku Babilonia a konkistá Yerusalèm. ‘E trono di Yehova’ a keda bashí, i e liña di reinan ku a bin for David a keda interumpí. (2 Reinan 25:1-26) E ‘trapamentu’ aki lo a sigui pa semper? Nò, pasobra e profesia di Ezekiel a bisa relashoná ku Zedekias e último rei di Yerusalèm: “Lòs tùlban i kita korona . . . Esaki tampoko lo no t’ei mas, te ora ku esun bin ku tin derecho riba dje; i lo mi dun’é esei.” (Ezekiel 21:26, 27) Esun ku “tin  derecho riba” e korona ku a pertenesé na e desendensia di David ta Kristu Hesus. (Lukas 1:​32, 33) Pues ‘e trapamentu’ lo a terminá ora Hesus bira Rei.

Na ki tempu e gran suseso ei lo a tuma lugá? Hesus a mustra ku e paganonan lo a goberná pa un periodo fiho di tempu. E relato na Daniel kapítulo 4 ta kontené e yabi pa haña sa kon largu e periodo ei lo a dura. E relato ta konta di un soño profétiko ku Rei Nabukodonosor di Babilonia tabatin. El a mira un palu inmenso ku nan a kap basha abou. Su tronkon no por a krese pasobra nan a pone un banchi di heru i bròns rònt di dje. Un angel a deklará: “Laga shete periodo di tempu pasa riba dje.”—Daniel 4:10-16.

Den Beibel, palu tin biaha ta representá gobernashon. (Ezekiel 17:22-24; 31:2-5) Pues e bashamentu abou di e palu simbóliko ta representá kon Dios su gobernashon, ekspresá mediante e reinan na Yerusalèm, lo a ser interumpí. Sin embargo, e vishon a anunsiá ku e ‘trapamentu aki di Yerusalèm’ lo ta temporal, esta, “shete periodo di tempu.” Kon largu esei tabata?

Revelashon 12:6 i 14 ta indiká ku tres tempu i mei ta igual ku “1.260 dia.” “Shete periodo di tempu” lo ta anto dos biaha mas largu, esta, 2.520 dia. Pero e nashonnan pagano no a stòp di “trapa” riba Dios su gobernashon despues di apénas 2.520 dia di e kaida di Yerusalèm. Evidentemente anto, e profesia aki ta abarká un periodo di tempu hopi mas largu. A base di Numbernan 14:34 i Ezekiel 4:6, kuanan ta papia di “un aña pa kada dia,” e “shete periodo di tempu” lo a abarká 2.520 aña.

E 2.520 aña a kuminsá na òktober 607 P.E.K., tempu ku Yerusalèm a kai den man di Babilonia i nan a kita e rei di e liña di desendensia di David for di riba su trono. E periodo aki a terminá na òktober 1914. Na e tempu ei “e tempunan di e paganonan” a terminá, i Hesukristu a keda instalá komo Dios su Rei selestial. *—Salmo 2:1-6; Daniel 7:13, 14.

 Presis manera Hesus a predisí, su “binida” komo Rei selestial a ser karakterisá pa desaroyonan mundial dramátiko: guera, hamber, temblor, pestilensia. (Mateo 24:3-8; Lukas 21:11) E desaroyonan ei ta duna testimonio fuerte di e echo ku aña 1914 en bèrdat a marka nasementu di Dios su Reino selestial i komienso di “e último dianan” di e aktual sistema di kosnan malbado.—2 Timoteo 3:1-5.