KON bo ta imaginá Dia di Huisio? Hopi hende ta kere ku míles di miónes di alma lo presentá, un pa un, dilanti di e trono di Dios. Einan, Dios lo dikta sentensia riba kada persona. Algun di nan lo haña e rekompensa di un paradeis selestial, i otronan lo keda kondená na tormento eterno. Sin embargo, Beibel ta pinta kompletamente un otro kuadro di e periodo di tempu aki. E Palabra di Dios no ta deskribié komo un tempu spantoso, sino komo un tempu di speransa i restorashon.

Na Revelashon 20:11 i 12 nos ta lesa apòstel Juan su deskripshon di Dia di Huisio: “Mi a mira un gran trono blanku i esun ku tabata sintá riba dje, pa kende su presensia tera i shelu a hui bai, i ningun lugá no a wòrdu hañá pa nan. I mi a mira e mortonan, grandi i chikitu, pará dilanti di e trono, i bukinan a wòrdu habrí; i un otro buki a wòrdu habrí, kual ta e buki di bida; i e mortonan a wòrdu husgá for di loke tabata pará skirbí den e bukinan, segun nan obranan.” Ken ta e Hues deskribí akinan?

Yehova Dios ta e Hues supremo di humanidat. Sin embargo, e trabou mes di husga e ta delegá na un otro persona.  Segun Echonan 17:31, apòstel Pablo a bisa ku Dios “a fiha un dia den kual e lo husga mundu ku hustisia pa medio di un hòmber, kende el a apuntá.” E Hues apuntá aki ta Hesukristu resusitá. (Juan 5:22) Pero ki tempu Dia di Huisio ta kuminsá? Kon largu e ta dura?

E buki di Revelashon ta mustra ku Dia di Huisio ta kuminsá despues di e guera di Armagedón, despues di a destruí Satanas su sistema di kosnan riba tera. * (Revelashon 16:14, 16; 19:19–20:3) Despues di Armagedón, lo sera Satanas i su demoñonan den un abismo pa mil aña. Durante e tempu ei, e 144.000 ko-herederonan selestial lo ta hues i lo “reina ku Kristu pa mil aña.” (Revelashon 14:1-3; 20:1-4; Romanonan 8:17) Dia di Huisio no ta un evento purá-purá ku ta dura apénas 24 ora. E ta dura mil aña.

Durante e periodo di mil aña ei, Hesukristu lo “husga e bibunan i e mortonan.” (2 Timoteo 4:1) “E bibunan” lo ta e “multitut grandi” ku ta sobrebibí Armagedón. (Revelashon 7:9-17) Apòstel Juan a mira tambe “e mortonan . . . pará dilanti di e trono” di huisio. Manera Hesus a primintí, esnan “ku ta den graf lo tende [Kristu] su bos, i lo sali” pa medio di un resurekshon. (Juan 5:28, 29; Echonan 24:15) Pero a base di kiko lo husga tur hende?

Segun e vishon di apòstel Juan, “bukinan a wòrdu habrí,” i “e mortonan a wòrdu husgá for di loke tabata pará skirbí den e bukinan, segun nan obranan.” Akaso e bukinan aki ta un registro di e hendenan su obranan di pasado? Nò, e huisio lo no ta basá riba loke hende a hasi promé ku nan a muri. Kon nos sa esei? Beibel ta bisa: “Esun ku a muri ta librá di piká.” (Romanonan 6:7) Pues anto, e hendenan resusitá lo lanta ku un registro limpi-limpi, ya ku nan pikánan di ántes a ser kanselá. P’esei e bukinan mester ta representá Dios su rekisitonan adishonal. Pa biba pa semper, tantu e sobrebibientenan di Armagedón komo esnan resusitá lo tin ku obedesé e mandamentunan  di Dios, inkluso kualke rekisito nobo ku Yehova lo por revelá durante e mil aña. Pues, lo husga hende a base di loke nan ta hasi durante Dia di Huisio.

Dia di Huisio lo duna míles di miónes di hende nan promé chèns di siña tokante Dios su boluntat i kumpli kuné. Esaki ta nifiká ku un obra di edukashon lo tuma lugá na gran eskala. En bèrdat e ora ei, “e habitantenan di mundu ta siña hustisia.” (Isaias 26:⁠9) Sin embargo, no ta tur hende lo ta dispuesto pa kumpli ku Dios su boluntat. Isaias 26:10 ta bisa: “Maske miserikòrdia wòrdu mustrá na e malbado, e no ta siña hustisia; e ta trata inhustu den e tera di rektitut, i no kier mira e mahestat di SEÑOR.” E malbadonan aki lo ser matá permanentemente durante Dia di Huisio.—Isaias 65:20.

Na fin di e Dia di Huisio, e personanan ku ainda ta na bida lo “biba” den e pleno sentido di palabra komo hende perfekto. (Revelashon 20:5) Pues, durante Dia di Huisio humanidat lo ser restorá na su estado original perfekto. (1 Korintionan 15:24-28) E ora ei lo tuma lugá un último tèst. Dios lo saka Satanas for di kaminda e ta será i lo permitié gaña humanidat pa último biaha. (Revelashon 20:3, 7-10) E hendenan ku resistié lo disfrutá di e kumplimentu kompletu di Beibel su promesa: “E hustunan lo heredá e tera, i lo biba den dje pa semper.” (Salmo 37:29) Sí, Dia di Huisio lo ta un bendishon pa fiel humanidat!