1, 2. Ki pregunta bo tin ku puntra bo mes despues di a bandoná religion falsu, i dikon bo ta kere esaki ta importante?

SUPONÉ ku bo a haña sa ku henter bo bario ta kontaminá. Un hende sekretamente tabata dùmp sushi venenoso den e área, i awor e situashon ta forma un peliger pa bida di hende. Kiko lo bo hasi? Sin duda, lo bo muda bai for di einan si ta posibel. Pero despues di hasi esei, tòg lo bo keda ku e pregunta serio aki: ‘Akaso mi a ser venená?’

² Un situashon similar ta surgi relashoná ku religion falsu. Beibel ta siña ku tal adorashon ta kontaminá ku siñansanan i práktikanan impuru. (2 Korintionan 6:17) Ta p’esei ta importante pa bo sali for di ‘Babilonia e Grandi,’ e imperio mundial di religion falsu. (Revelashon 18:2, 4) Bo a hasi esaki kaba? Si ta asina, bo ta meresé un kòmplimènt pa esei. Pero djis separá bo mes di un religion falsu òf kita bo nòmber no ta basta. Ora bo kaba di hasi esei, bo tin ku puntra bo mes: ‘Akaso mi a keda ku kualke rastro di adorashon falsu?’ Konsiderá algun ehèmpel.

3. (a) Kiko Beibel ta bisa tokante uso di imágen, i pakiko Dios su punto di bista lo por ta difísil pa algun hende aseptá? (b) Kiko bo mester hasi ku imágen- òf artíkulonan ku bo tin ku ta konektá ku adorashon falsu?

³ Algun hende pa años tin imágen òf altar den nan kas. Abo tambe tin nan? Si ta asina, kisas bo ta sinti ku ta straño òf robes pa resa na Dios sin tal yudansa visibel. Podisé bo ta sinti bo asta hopi pegá na algun di e imágen- òf artíkulonan aki. Pero ta Dios ta esun ku ta bisa kon mester ador’é, i Beibel ta siña ku e no ke pa nos usa imágen. (Eksodo 20:4, 5; Salmo 115:4-8; Isaias 42:8; 1 Juan 5:21) Pues bo por para firme pa adorashon berdadero dor di destruí kualke imágen òf artíkulo ku bo tin ku ta konektá ku adorashon falsu. Siña mira nan en todo kaso manera Yehova ta mira nan, esta, komo un “abominashon.”—Deuteronomio 27:15.

4. (a) Kon bin nos sa ku adorashon di antepasado ta enbano? (b) Dikon Yehova a prohibí su pueblo di partisipá den kualke forma di spiritismo?

⁴ Un otro kos komun den hopi religion falsu ta adorashon di antepasado. Promé ku algun hende a siña e bèrdat  di Beibel, nan tabata kere ku e defuntunan ta konsiente den un region invisibel i ku nan por yuda òf perhudiká hende bibu. Podisé abo tabatin kustumber di hasi bo máksimo esfuerso pa kalma bo antepasadonan morto. Pero manera bo a siña den Kapítulo 6 di e buki aki, e mortonan no ta na bida ningun kaminda. Pues, intentonan pa komuniká ku nan ta enbano. Kualke mensahe ku ta parse di ta bin di un ser kerí ku a muri en realidat ta originá di e demoñonan. P’esei Yehova a prohibí e israelitanan di purba papia ku e mortonan òf partisipá den kualke otro forma di spiritismo.​—⁠Deuteronomio 18:10-12.

5. Kiko bo por hasi si uso di imágen òf e práktika di adorá antepasado tabata parti di bo religion anterior?

⁵ Si e uso di imágen òf e práktika di adorá antepasado tabata parti di bo forma di adorá na ántes, kiko bo por hasi? Lesa i meditá riba pasashinan di Beibel ku ta mustra bo kon Dios ta mira e kosnan aki. Papia ku Yehova tur dia den orashon tokante bo deseo di para firme pa adorashon berdadero, i pidié yuda bo pensa manera é ta pensa.—Isaias 55:9.

6, 7. (a) Supuestamente Pasku ta konmemorá kiko, i Hesus su siguidónan di promé siglo a selebr’é? (b) Selebrashon di hasimentu di aña tabata konektá ku kiko durante e tempu di e promé disipelnan di Hesus?

⁶ Un persona su adorashon por ta kontaminá dor di religion falsu pa loke ta trata dianan di fiesta popular. Tuma por ehèmpel Pasku. Supuestamente Pasku ta konmemorá e nasementu di Hesukristu, i kasi tur religion ku ta pretendé di ta kristian ta selebr’é. Sin embargo, no tin ningun prueba ku Hesus su disipelnan di promé siglo a selebrá un dia di fiesta asina. E buki Sacred Origins of Profound Things (Orígen Sagrado di Kosnan Profundo) ta deklará: “Durante dos siglo despues di Kristu su nasementu, ningun hende no  tabata sa, i poko hende tabata interesá pa sa, ki dia presis el a nase.”

⁷ Asta si e disipelnan di Hesus tabata sa e fecha eksakto di su nasementu, nan lo no a selebr’é. Dikon? Pasobra, manera The World Book Encyclopedia ta bisa, e kristiannan di promé “a konsiderá e selebrashon di kualke hende su nasementu un kustumber pagano.” E úniko selebrashonnan di hasimentu di aña menshoná den Beibel ta di dos gobernante ku no tabata adorá Yehova. (Génesis 40:20; Marko 6:21) Tambe hende a tene selebrashon di hasimentu di aña na onor di diosnan pagano. Por ehèmpel, riba 24 di mei e romanonan a selebrá e hasimentu di aña di e diosa Diana. Riba e dia siguiente, nan a selebrá e hasimentu di aña di nan dios di solo, Apolo. Pues anto, selebrashon di hasimentu di aña tabata konektá ku paganismo, no ku kristianismo.

8. Splika e konekshon entre selebrashon di hasimentu di aña i superstishon.

⁸ Tin un motibu mas pakiko kristiannan di promé siglo lo no a selebrá e hasimentu di aña di Hesus. Su disipelnan probablemente tabata sa ku selebrashon di hasimentu di aña tabata konektá ku superstishon. Por ehèmpel, hopi griego i romano di tempu antiguo tabata kere ku un spiritu a asistí na e nasementu di kada hende i a protehá e persona ei atraves di su bida. E buki The Lore of Birthdays (E Tradishon di Hasimentu di Aña) ta bisa: “E spiritu aki tabatin un relashon mágiko ku e dios riba kende su dia e persona a nase.” Yehova sigur lo no a keda kontentu ku ningun selebrashon ku lo a konektá Hesus ku superstishon. (Isaias 65:11, 12) Pues kon bin anto ku asina tantu hende ta selebrá Pasku?

9. Kon 25 di desèmber a bira e dia pa selebrá e nasementu di Hesus?

⁹ Tabata un 300 aña despues ku Hesus a biba riba tera ku hende a kuminsá konmemorá su nasementu dia 25 di desèmber. Pero esei no tabata e fecha ku Hesus a nase, pasobra  evidentemente el a nase den òktober. * Pakiko anto a skohe 25 di desèmber? Algun hende ku despues a pretendé di ta kristian probablemente tabata “deseá pa e fecha kai pareu ku e fiesta pagano romano ku a marka e ‘dia di nasementu di solo invikto.’” (The New Encyclopædia Britannica) Den wenter, ora ku solo tabata parse ménos potente, paganonan tabata tene seremonianan pa pone solo—ku ta duna kalor i lus—bolbe for di su biahenan leu. Nan tabata kere ku dia 25 di desèmber solo a kuminsá ku su biahe di regreso. Den un intento pa kombertí e paganonan, lidernan religioso a tuma e fiesta aki over i a purba lag’é parse “kristian.” *

10. Den tempu di ántes, dikon algun hende no a selebrá Pasku?

¹⁰ For di hopi tempu pasá hende a rekonosé e orígen pagano di Pasku. Debí na su orígen ku a bai kontra di e Skritura, Pasku tabata prohibí na Inglatera i den algun di e kolonianan merikano durante siglo 17. Ken ku a djis keda kas sin bai traha riba dia di Pasku tabatin ku paga un but. Pero no a tarda hopi ku e kustumbernan bieu a bolbe bira popular, i nan a agregá algun kustumber nobo. Pasku un biaha mas a bira un dia di fiesta importante, i te ainda e ta asina den hopi pais. Sin embargo, debí na Pasku su konekshon ku religion falsu, hende ku ke agradá Dios no ta selebr’é ni nan no ta selebrá  ningun otro dia di fiesta ku ta originá di adorashon pagano. *

11. Dikon algun hende ta selebrá dia di fiesta, pero kiko mester ta nos preokupashon prinsipal?

¹¹ Tin hende ta di akuerdo ku dianan di fiesta manera Pasku ta di orígen pagano, pero tòg nan ta haña ku no ta algu malu pa selebrá nan. De echo, mayoria hende no ta pensa riba adorashon falsu ora nan ta selebrá dianan di fiesta. E okashonnan aki ta duna famianan chèns di bin huntu. Esei ta loke abo ta pensa? Si ta asina, probablemente ta bo amor pa famia, no amor pa religion falsu, ta loke ta pone ku para firme pa adorashon berdadero ta parse difísil. Bo por ta sigur ku Yehova, kende a originá famia, ke pa bo tin un bon relashon ku bo famianan. (Efesionan 3:14, 15) Pero bo por fortalesé e lasonan di famia den maneranan ku Dios ta aprobá. Apòstel Pablo a skirbi tokante kiko mester ta nos preokupashon prinsipal: ‘Trata di siña [òf, “hasi sigur di,” NW] loke ta agradabel na Señor.’—Efesionan 5:10.

12. Duna un ehèmpel ku ta mustra dikon nos mester evitá kustumber i selebrashon ku tin mal orígen.

¹² Kisas bo ta haña ku e orígen di dianan di fiesta tin masha tiki di haber ku e manera ku hende ta selebrá nan awe. E orígen realmente ta importá? Sí! Un ehèmpel: Suponé ku bo a mira un mangel bentá abou kantu di kaminda. Lo bo kue e mangel ei i kom’é? Klaru ku nò! E mangel ta sushi. Meskos ku e mangel ei, dianan di fiesta por parse dushi, pero hende a kue nan for di lugánan sushi, impuru. Pa nos para firme pa adorashon berdadero, nos mester tin e mesun punto di bista ku profeta Isaias, kende a bisa adoradónan berdadero: “No mishi ku nada impuru.”—Isaias 52:11.

13. Ki retonan por surgi ora ku bo no ta partisipá den dianan di fiesta?

¹³ Ora ku bo disidí di no partisipá den dianan di fiesta por surgi vários reto. Por ehèmpel, bo koleganan lo por ta puntra nan mes dikon bo no ta partisipá den sierto aktividatnan di dia di fiesta kaminda bo ta traha. Kiko si nan ofresé bo un regalo di Pasku? Lo ta robes pa asept’é? Kiko si bo kasá no ta kompartí bo kreensianan? Kon bo por hasi sigur ku bo yunan no ta sinti ku nan ta pèrdè algu dor di no selebrá dianan di fiesta?

14, 15. Kiko lo bo por hasi si un hende deseá bo felis dia di fiesta òf si un hende ke duna bo un regalo?

¹⁴ Nos mester di bon huisio pa distinguí kon pa trata kada situashon. Si un hende ku bo topa di paso deseá bo un felis dia di fiesta, bo por djis yam’é danki. Pero suponé ku ta trata di un hende ku bo ta mira òf traha kuné riba un base regular. Den tal kaso, lo bo por disidí di bisa mas. Den tur kaso, usa takto. Beibel ta konsehá: “Laga boso palabranan ta semper ku grasia, sasoná ku salu, pa boso por sa kon boso mester kontestá kada persona.” (Kolosensenan 4:6) Tene kuidou pa bo no mustra falta di rèspèt pa otro hende. Mas bien, ku takto splika nan bo posishon. Mustra bon kla ku bo no ta kontra dunamentu di regalo ni reunionnan sosial pero ku bo ta preferá di partisipá den e aktividatnan aki na un otro momentu.

¹⁵ Kiko si un hende ke duna bo un regalo? Ta dependé hopi di e sirkunstansia. E dunadó kisas ta bisa: “Mi sa ku bo no ta selebrá e dia di fiesta. Pero tòg mi ke duna bo esaki.” Bo por disidí ku si bo aseptá e regalo bou di e sirkunstansia ei, lo no ta meskos ku tuma parti den e dia di fiesta. Klaru ku si e dunadó no ta konosí ku bo kreensianan, lo bo por bis’é ku bo no ta selebrá e dia di fiesta. Esaki lo yuda splika dikon bo ta aseptá un regalo pero no ta duna un regalo na e  okashon ei. Di otro banda, no ta sabí pa aseptá un regalo si ta bisto ku e ta ser duná ku e intenshon pa mustra ku bo no ta pega na bo kreensianan òf pa mustra ku lo bo komprometé bo posishon djis pa haña kos material.

16. Kon bo por demostrá takto ora di trata ku asuntunan relashoná ku dia di fiesta?

¹⁶ Kiko si miembronan di famia no ta kompartí bo kreensianan? Un biaha mas, demostrá takto. Bo no tin nodi forma un kuestion riba kada kustumber òf selebrashon ku bo famianan ta disidí di tene. Mas bien, respetá nan derecho di tin nan propio punto di bista, meskos ku bo ke pa nan respetá bo derecho di tin bo punto di bista. (Mateo 7:12) Evitá kualke akshon ku lo por hasi bo un partisipante den e dia di fiesta. Pero tòg sea rasonabel den asuntunan ku no ta relashoná ku e selebrashon mes. Klaru ku semper bo mester aktua den un manera ku ta laga bo ku un bon konsenshi.—1 Timoteo 1:18, 19.

17. Kon bo por yuda bo yunan pa nan no sinti ku nan ta pèrdè algu ora nan ta mira otro hende selebrá dianan di fiesta?

¹⁷ Kiko bo por hasi pa asina bo yunan no sinti ku nan ta pèrdè algu pasobra nan no ta selebrá dianan di fiesta ku ta bai kontra e Skritura? Esei ta dependé hopi di loke bo ta hasi na otro momentunan durante aña. Tin mayor ta apartá tempu spesial pa duna regalo na nan yunan. Un di e mihó regalonan ku bo por duna bo yunan ta bo tempu i atenshon amoroso.

18. Kon asistensia na reunionnan kristian por yuda bo para firme pa adorashon berdadero?

¹⁸ Pa agradá Dios, bo tin ku rechasá adorashon falsu i para firme pa adorashon berdadero. Kiko esaki ta enserá? Beibel ta deklará: “Laga nos konsiderá kon pa stimulá otro pa stima i hasi bon obra, i no laga di asistí na nos mes reunionnan,  manera ta kustumber di algun, ma enkurashá otro; i muchu mas ainda, ora boso ta mira ku e dia ta yegando serka.” (Hebreonan 10:24, 25) Reunionnan kristian ta okashonnan felis pa bo adorá Dios den e manera ku e ta aprobá. (Salmo 22:22; 122:1) Na e reunionnan ei, kristiannan fiel ta “enkurashá” otro.—Romanonan 1:12.

19. Dikon ta importante pa bo papia ku otro hende tokante e kosnan ku bo a siña for di Beibel?

¹⁹ Un otro manera ku bo por para firme pa adorashon berdadero ta dor di papia ku otro hende tokante e kosnan ku bo a siña for di bo estudio di Beibel ku Testigunan di Yehova. Hopi hende realmente ta “suspirá i keha” debí na e maldat ku ta tumando lugá den mundu awe. (Ezekiel 9:⁠4) Podisé bo konosé algun hende ku ta suspirá i keha. Pakiko bo no ta papia ku nan tokante bo speransa pa futuro ku ta basá riba Beibel? Segun ku bo ta asosiá ku kristiannan berdadero i ta papia ku otro hende tokante e maravioso bèrdatnan bíbliko ku bo a siña, lo bo ripará ku kualke deseo pa e kustumbernan di adorashon falsu ku kisas tabatin ainda den bo kurason, pokopoko lo disparsé. Bo por ta sigur ku lo bo ta masha felis i lo haña hopi bendishon si bo para firme pa adorashon berdadero.—Malakias 3:10.