1, 2. Kiko Pedro lo a spera ora Hesus tabata papia na Kapernaum, pero kiko a sosodé en bes di esei?

PEDRO tabata opservá e hendenan ku tabata skucha Hesus. Nan tabata den e snoa di Kapernaum, e stat kaminda Pedro tabata biba. Su negoshi di piskamentu tambe tabata einan, na e kosta nort di ­Laman di Galilea. I hopi di su amigu-, famia- i kompañeronan di trabou tambe tabata biba einan. Sin duda, Pedro tabatin masha gana pa tur e hendenan ei tambe rekonosé Hesus komo e Mesías. Es mas, mare nan tambe tabata kontentu di por a siña tokante e Reino di Dios for di e mihó maestro den historia. Pero parse ku esei lo no a bai sosodé e dia ei.

² Hopi di e hendenan a stòp di skucha Hesus. Pedro por a tende algun di nan kritiká e mensahe di Hesus. Pero loke mas a molestiá Pedro tabata e reakshon di algun di e disipelnan di Hesus mes. Nan no tabata mustra kontentu ni emoshoná mas ku e bèrdatnan nobo ku Hesus a siña nan. Bo por a mira ku nan tabata iritá, asta rabiá. Algun di nan a bisa na bos haltu ku Hesus su diskurso tabata ofensivo. Nan no kier a sigui skucha mas i a sali bai for di snoa. Loke tabata pió ta ku nan no a sigui Hesus mas.—Lesa Huan 6:60, 66.

3. Kiko Pedro su fe a yud’é hasi na vários okashon?

³ Esei tabata un momento difísil pa Pedro i e otro apòstelnan tambe. Nan tampoko no a komprondé muchu bon loke Hesus a bisa e dia ei. Sin duda, Pedro por a mira ku si tuma e palabranan di Hesus literalmente, nan en bèrdat lo por tabata ofensivo. Kiko Pedro lo hasi? No tabata promé biaha ku su lealtat na su Maestro a ser poné na prueba, ni lo no tabata último biaha. Laga nos wak kon Pedro su fe a yud’é superá e problemanan ei i keda leal.

4, 5. Menshoná algun kos ku Hesus a hasi i bisa ku tabata kontrali na loke hende a ferwagt di dje.

⁴ Hopi biaha, Hesus a laga Pedro keda sorprendí. Bes tras bes,  su Maestro a bisa i hasi kosnan nèt kontrali di loke hende a ferwagt di dje. Por ehèmpel, e dia promé, Hesus milagrosamente a duna míles di hende kuminda. Komo resultado, nan a purba di hasié rei. Pero el a sorprendé hopi di nan ora ku el a kita bai for di einan i manda su disipelnan Kapernaum ku boto. E mesun anochi ei, segun ku e disipelnan tabata nabegá riba Laman di Galilea meimei di un tormenta, Hesus a bolbe sorprendé nan ora el a kana riba awa bini serka nan. Na e okashon ei, el a siña Pedro un lès importante tokante fe.

⁵ Su manisé, e disipelnan a ripará ku e multitut a sigui nan te na e otro banda di e lago. Kiko Hesus a hasi? El a skual e hendenan pa nan aktitut materialista! Aparentemente, nan no tabata buska Hesus pasobra nan kier a siña mas bèrdat for di dje, sino pasobra nan tabata ke p’e bolbe duna nan kuminda milagrosamente. (Huan 6:25-27) Den snoa na Kapernaum, Hesus a sigui papia di e asuntu, i un biaha mas e no a bisa loke e hendenan a ferwagt; el a siña nan un bèrdat ku tabata importante pero ku nan a haña ofensivo.

6. Ki ilustrashon Hesus a usa, i kon su oyentenan a reakshoná?

⁶ Hesus no tabata ke pa e hendenan ei bini serka dje djis pasobra e tabata duna nan kuminda. E tabata ke pa nan realisá ku ta Dios a mand’é, i ku Dios lo a duna nan bida eterno solamente si nan pone fe den e sakrifisio di Hesus i sigui su ehèmpel. Pa yuda nan komprondé esei, el a kompará su mes ku mana, e pan ku a baha for di shelu den tempu di Moises. Komo ku algun hende a protestá kontra esei, el a usa un otro ilustrashon mas bibu. El a splika ku pa nan haña bida eterno nan mester a kome su karni i bebe su sanger. Mas e hendenan a protestá e ora ei. Algun a bisa: “E palabranan akí ta ofensivo; ken por skucha nan?” Hopi disipel di Hesus mes tambe a disidí di bai lag’é, manera nos a mira den e introdukshon. *—Huan 6:48-60, 66.

7, 8. (a) Kiko Pedro no a komprondé ainda tokante e papel di Hesus? (b) Kon Pedro a kontestá e pregunta ku Hesus a hasi e apòstelnan?

⁷ Kon Pedro a reakshoná? E tambe lo a sintié konfundí, pasobra ainda e no a komprondé ku Hesus mester a muri pa kumpli ku e boluntat di Dios. Pero tòg e no a bai laga Hesus manera e otro disipelnan kaprichoso a hasi e dia ei. Kon bini? Pasobra Pedro tabatin algu ku a hasié diferente for di e hendenan ei. Kiko esei tabata? Laga nos sigui analisá e relato.

⁸ Hesus a bira puntra su apòstelnan: “Akaso boso tambe ke bai?”  (Huan 6:67) E pregunta tabata dirigí na e 12 apòstelnan, pero Pedro tabata esun ku a kontest’é. E tabatin kustumber di hasi esei. Kisas e tabata mayó di nan tur. Òf simplemente e no por a keda sin bisa kiko e tabata pensa. En todo kaso, e tabata esun di mas franko di e grupo. I su kontesta e biaha akí tabata masha memorabel: ­“Señor, serka ken nos lo bai? Abo tin e palabranan ku ta hiba na bida eterno.”—Huan 6:68.

9. Kon Pedro a demostrá lealtat na Hesus?

⁹ E palabranan ei no ta konmové bo? Ta bisto ku Pedro su fe den Hesus a yud’é kultivá un kualidat masha balioso: lealtat. Pedro a mira bon kla ku Hesus tabata e úniko Salbador ku Yehova a perkurá i ku pa un persona salba, e mester a skucha loke Hesus tabata siña hende tokante e Reino di Dios. Pedro tabata sa ku asta si e no a komprondé tur loke Hesus a bisa, e no por a bai ningun otro kaminda pa haña e aprobashon di Dios i e bendishon di bida eterno.

10. Kon nos awe por imitá e lealtat di Pedro?

¹⁰ Bo tambe ta sinti asina? Lamentablemente, awendia hopi hende ta bisa ku nan ta stima Hesus, pero nan no ta leal na dje. Pa nos ta leal na Kristu, nos tin ku stima su siñansanan meskos ku Pedro a stima nan. Nos mester hasi esfuerso pa siña nan, komprondé nan i biba di akuerdo ku nan, asta ora algun di e siñansanan ei ta sorprendé nos pasobra nan no ta loke nos a ferwagt òf no ta kuadra ku nos preferensianan personal. Solamente si nos keda leal, nos por tin e speransa di haña e bida eterno ku Hesus ta ofresé nos.—Lesa Proverbionan 21:21.

11. Unda Hesus a bai ku su siguidónan? (Wak tambe e nota.)

¹¹ Poko despues di e periodo drùk ei, Hesus a bai riba un biahe largu rumbo panort huntu ku su apòstelnan i algun disipel. Seru Hermon tabata situá na e frontera di mas nort di e Tera Primintí, i de bes en kuando hende por a mira su tòp kubrí ku sneu asta for di e awanan blou di Laman di Galilea. Mas serka e grupo tabata yega di e seru ei, mas haltu e tabata mustra nan dilanti. Nan tabata riba e kaminda ku a hiba na e pueblitonan den bisindario di Sesarea Filipo. * Den e paisahe bunita ei, ku un bista riba gran parti di e Tera Primintí, Hesus a hasi su siguidónan un pregunta importante.

12, 13. (a) Dikon Hesus kier a sa kiko e multitut tabata pensa di dje? (b) Kon Pedro su kontesta a demostrá ku e tabatin berdadero fe?

¹² Hesus a puntra nan: “Ken e multitut ta bisa ku mi ta?” Nos  por imaginá kon Pedro a keda wak Hesus den su kara, tumando nota un biaha mas di su mirada penetrante i di e bondat i inteligensia ekstraordinario di su Maestro. Hesus kier a sa ki konklushon su oyentenan a saka for di loke nan a mira i tende. E disipelnan di Hesus a kont’é algun di e ideanan robes ku e hendenan tabatin tokante su identidat. Pero Hesus kier a sa mas. Akaso su siguidónan mas yegá tambe tabata pensa meskos? Pues, el a puntra nan: “Ma boso, ken boso ta bisa ku mi ta?”—Luk. 9:18-20.

¹³ Un biaha mas, Pedro no a pèrdè pa gana. Ku palabranan kla i firme el a kontestá loke tabata e sintimentu di hopi di nan presente. E di: “Abo ta Kristu, Yu di e Dios bibu.” Nos por imaginá kon Hesus, ku un smail, a felisit’é kalurosamente. El a splika Pedro ku ta Yehova Dios—i no hende—a revelá e bèrdat importante akí na esnan ku tabatin berdadero fe. Si nos wak bon, Yehova a permití Pedro komprondé un di e bèrdatnan di mas grandi ku el a yega di revelá: e identidat di Kristu, e Mesías primintí!​—Lesa Mateo 16:16, 17.

14. Hesus a duna Pedro ki responsabilidat importante?

¹⁴ Profesia di antigwedat a menshoná e Kristu akí komo un piedra ku e trahadónan lo a rechasá. (Sal. 118:22; Luk. 20:17) Hesus tabata referí na e profesianan ei ora el a revelá ku Yehova lo establesé un kongregashon riba e piedra, òf baranka, ku Pedro a kaba di identifiká komo e Kristu. Kaba Hesus a enkargá Pedro ku algun privilegio masha importante den e kongregashon ei. E no a duna Pedro un puesto mas haltu ku e otro apòstelnan, manera tin hende ta pretendé, ma el a dun’é responsabilidatnan importante. El a duna Pedro “e yabinan di e Reino.” (Mat. 16:18, 19) Ku otro palabra, Hesus a duna Pedro e privilegio di habri e oportunidat di drenta e Reino di Dios pa tres grupo di hende: promé e hudiunan, despues e samaritanonan i finalmente hende ku no tabata hudiu.

15. Kon bini Pedro a papia serio ku Hesus, i kiko el a bisa?

¹⁵ Mas despues Hesus a bisa ku esnan ku risibí mas responsabilidat lo tin ku duna mas kuenta i rason, i e kaso di Pedro a komprobá esei. (Luk. 12:48) Hesus a sigui splika mas bèrdat tokante e Mesías, manera e echo ku lo e tabatin ku sufri i muri na Herúsalèm. Ma loke Hesus a bisa a shòk Pedro. El a hala Hesus un banda i a papia serio kuné: “Sea bondadoso ku bo mes, Señor; esei sigur lo no pasa ku bo.”—Mat. 16:21, 22.

16. Kon Hesus a korigí Pedro, i ki bon lès nos tur por saka for di Hesus su palabranan?

 ¹⁶ Ta klaru ku Pedro tabatin tur bon intenshon. P’esei Hesus su kontesta mester tabata manera un baño di awa friu p’e. Hesus a bira lomba p’e, wak e otro disipelnan—kendenan kisas tabata pensa meskos ku Pedro—i a bisa: “Kita for di mi dilanti, Satanas! Bo ta un piedra di trompeká pa mi, pasobra bo no tin e pensamentu di Dios, sino di hende.” (Mat. 16:23; Mar. 8:32, 33) Nos por saka un bon lès for di esaki. Ta masha fásil pa laga hende su manera di pensa bira mas importante ku Dios su manera di pensa. Den tal kaso por sosodé ku asta si nos intenshon ta pa yuda un hende, sin ku nos ke nos por ta bezig ta animá e persona ei pa hasi algu ku ta agradá Satanas en bes di agradá Dios. Pero laga nos bai bèk na e relato di Pedro i wak kon el a reakshoná riba e korekshon.

17. Kiko Hesus tabata ke men ora el a bisa Pedro pa ‘kita for di su dilanti’?

¹⁷ Naturalmente, Pedro tabata sa ku Hesus no tabata ke men ku literalmente e tabata Satanas e Diabel. Kon ku bai bin, Hesus no a papia ku Pedro manera el a papia ku Satanas. El a bisa Satanas: “Bai for di aki,” miéntras ku el a bisa Pedro: “Kita for di mi dilanti.” (Mat. 4:10) Hesus no a rechasá Pedro komo apòstel, pasobra el a mira su bon kurason i su potensial; simplemente el a korigí Pedro su manera di pensa robes den e asuntu akí. Hesus tabata ke men ku Pedro mester a stòp di para su dilanti manera un opstákulo, i mas bien mester a kana su tras komo un disipel ku tabata apoy’é.

18. Kon Pedro a demostrá su lealtat, i kon nos por imit’é?

¹⁸ En bes di rabia, nua ku Hesus òf kontestá bèk, Pedro a aseptá e korekshon ku humildat. Asina el a bolbe demostrá su lealtat. Nos tur ku ta sigui Kristu mester di korekshon de bes en kuando. Pero si nos ke pa esei yuda nos hala mas serka di Hesukristu i su Tata, Yehova Dios, nos tin ku aseptá e disiplina humildemente i siña for di dje.—Lesa Proverbionan 19:20.

19. Ki deklarashon sorprendente Hesus a hasi, i kiko podisé Pedro a puntra su mes?

¹⁹ Djis despues Hesus a bolbe hasi un deklarashon sorprendente. E di: “Di bèrdat mi ta bisa boso ku tin algun hende pará akinan ku lo no muri promé ku nan mira e Yu di hende bini den su ­Reino.”  (Mat. 16:28) E palabranan ei, sin duda, a hasi Pedro masha kurioso. Kiko Hesus lo tabata ke men? Podisé Pedro a puntra su mes si despues di e korekshon ku el a kaba di haña lo el a bini na remarke pa tal privilegio.

20, 21. (a) Deskribí e vishon ku Pedro a mira. (b) Kiko e kòmbersashon entre e figuranan den e vishon a yuda Pedro komprondé ?

²⁰ Wèl, un siman despues, Hesus a bai ku Santiago, Huan i ­Pedro riba “un seru haltu” (kisas Seru Hermon, ku no tabata keda muchu leu). Lo mester tabata anochi, pasobra e tres hòmbernan tabata bringa un soño. Pero miéntras ku Hesus tabata hasi orashon, algu a ­sosodé ku a pone nan wowo bira kla kla.—Mat. 17:1; Luk. 9:28, 29, 32.

²¹ Diripiente, Hesus su aparensia a kuminsá kambia. Su kara a kuminsá bria manera solo, i su paña tambe a bira un blanku briante. Anto nan a mira dos figura aparesé banda di Hesus: unu a representá Moises i e otro, Elías. Nan tabata kòmbersá kuné tokante “kon  e mester a bai for di e mundu akí, lokual lo mester a sosodé na Herúsalèm.” Aparentemente, nan tabata papia tokante su morto i resurekshon. Pedro a komprondé bon kla e ora ei ku e tabata robes ora el a bisa Hesus ku lo e no a bai pasa den e sufrimentu doloroso ei!—Luk. 9:30, 31.

22, 23. (a) Kon Pedro a demostrá bondat i entusiasmo? (b) Ki otro rekompensa Pedro, Santiago ku Huan a risibí e anochi ei?

²² Pedro a sinti ku e mester partisipá di un manera òf otro den e vishon fasinante akí i kisas asta purba di lag’é dura un poko mas largu. Na dado momento a parse ku Moises ku Elías tabata bai laga Hesus. P’esei Pedro a bisa: “Maestro, ta masha bon ku nos ta akinan; pues laga nos lanta tres tènt: ún pa bo, ún pa Moises i ún pa Elías.” Klaru ku e personahenan akí no tabatin mester di tènt, pasobra esaki tabata un vishon i nan tabata simplemente un representashon simbóliko di dos sirbidó di Yehova ku tabatin basta tempu morto kaba. Pero Pedro no a realisá kiko e tabata papia. Asina mes, su bondat i entusiasmo ta atraé nos na dje.—Luk. 9:33.

²³ E anochi ei Pedro, Santiago ku Huan a risibí un otro rekompensa. Un nubia a forma i kuminsá tapa nan ku su sombra. I un stèm for di e nubia a bisa: “Esaki ta mi Yu, esun ku mi a skohe. ­Skuch’é.” Tabata e stèm di Yehova Dios! Anto e vishon a terminá, i nan tabata nan so ku Hesus riba e seru.—Luk. 9:34-36.

24. (a) Kon e vishon di e transfigurashon a benefisiá Pedro? (b) Den ki manera e vishon di e transfigurashon por yuda nos awe?

²⁴ Ki un regalo maravioso e vishon di e transfigurashon ei tabata pa Pedro, i pa nos tambe! Dékadanan despues, el a skirbi tokante e privilegio ku e tabatin e anochi ei: El a mira Hesus den su futuro puesto komo glorioso Rei selestial i tambe e tabata un ­“testigu okular di su splendor magnífiko.” E vishon ei a konfirmá hopi profesia di e Palabra di Dios i a fortalesé Pedro su fe, di ­manera ku e por a perseverá bou di e pruebanan ku e tabatin ku konfrontá den futuro. (Lesa 2 Pedro 1:16-19.) E vishon ei por tin e mesun efekto riba nos tambe si nos imitá Pedro su ehèmpel. Kon nos por imit’é? Nos ta hasi esei si nos keda leal na Hesus, siña for di dje, aseptá su disiplina i korekshon i siguié humildemente tur dia.