Introdukshon
Imitá esnan ku pa medio di fe i pasenshi ta risibí loke Dios a primintí.”—HEBREONAN 6:12.
1, 2. Kon un superintendente biahero a konsiderá e personahenan di Beibel, i dikon nan lo por ta bon amigu pa nos?
“E TA papia tokante personahenan di Beibel komo si fuera nan ta bon amigu di dje.” Asina un ruman muhé a bisa despues ku el a skucha un diskurso di un superintendente biahero di edat. I e ruman tabatin rason! E superintendente ei pa vários dékada a studia Beibel i siña hende for di dje. Ta p’esei e hòmber- i muhénan di fe menshoná den Beibel en bèrdat tabata manera bon amigu di dje ku e konosé henter su bida.
2 Lo no ta dushi bèrdè si nos por tabatin e personahenan bíbliko ei komo amigu? Nan ta asina real pa bo? Imaginá bo kon lo tabata si nos por a pasa tempu ku nan i siña konosé hende manera Noe, Abraham, Rut, Elías i Èster. Pensa riba e bon influensia ku nan lo por tabatin riba bo bida: e animashon i konseho balioso ku nan lo por a duna bo!—Lesa Proverbionan 13:20.
3. (a) Kon nos por benefisiá si nos studia bida di e hòmber- i muhénan di fe menshoná den Beibel? (b) Kua ta algun pregunta ku nos lo bai analisá?
3 Klaru ku ta ora e ‘resurekshon di hende hustu’ tuma lugá, nos lo por disfrutá di e amistatnan ei den pleno sentido di palabra. (Echo. 24:15) Pero for di awor nos por saka benefisio si nos studia bida di e hòmber- i muhénan di fe menshoná den Beibel. Kiko nos tin ku hasi? Apòstel Pablo a bisa: “Imitá esnan ku pa medio di fe i pasenshi ta risibí loke Dios a primintí.” (Heb. 6:12) Pero promé ku nos kuminsá studia e ehèmpel di hòmber- i muhénan di fe, laga nos analisá algun pregunta ku e palabranan di Pablo ta lanta: Kiko ta fe, i dikon nos mester tin fe? Kon nos por imitá hende fiel di pasado?
Kiko Ta Fe, i Dikon Nos Mester Tin Fe?
4. Kiko hende ta pensa tokante fe, i dikon nan ta kiboká?
4 Fe ta un bunita kualidat. Tur e hòmber- i muhénan ku nos lo bai analisá den e buki akí a konsider’é un kualidat masha balioso. Hopi hende awe no sa realmente kiko fe ta enserá. Nan ta pensa ku esei ke men djis kere algu sin ku bo tin prueba òf evidensia. Ma nan ta kiboká. Fe no ke men kere siegamente, ni e no ta djis un sintimentu. Ta peligroso pa kere kos siegamente, i un sintimentu por disparsé un ora pa otro. No ta basta tampoko pa djis kere den Dios, pasobra Beibel ta bisa ku “e demoñonan tambe ta kere esei, i nan ta tembla di miedu.”—Sant. 2:19.
5, 6. (a) Nos fe ta konsentrá riba kua dos aspekto? (b) Usa un ilustrashon pa splika kon sólido e fundeshi di nos fe mester ta.
5 Berdadero fe ta enserá muchu mas ku kere siegamente den algu. Kòrda kon Beibel ta definié. (Lesa Hebreonan 11:1.) Segun Pablo, nos fe ta konsentrá riba dos aspekto. E promé ta ku nos tin fe den kosnan ku realmente ta eksistí pero ku nos “no ta mira.” Por ehèmpel, nos no por mira e “realidatnan” den shelu, manera Yehova Dios, su Yu òf e Reino ku awor ta goberná. E di dos ta ku nos tin fe den ‘loke nos ta spera,’ esta, susesonan ku ainda no a tuma lugá. Por ehèmpel, nos no ta mira e mundu nobo ku pronto e Reino di Dios lo trese. Akaso esei ke men ku nos fe den e “realidatnan” ei i den ‘loke nos ta spera’ no tin base?
6 Al kontrario! Pablo a mustra ku berdadero fe tin un fundeshi sólido. Ora el a bisa ku fe ta “e konfiansa firme,” el a usa un ekspreshon ku por ser tradusí tambe komo “akta di propiedat.” Suponé ku un hende a disidí di duna bo un kas. Lo e por djis duna bo e akta den bo man i bisa bo: “Ata bo kas nobo aki.” Naturalmente, e no ke men ku lo bo bai biba riba e pida papel ei. Loke e ke bisa ta ku e dokumento legal ei ta un prueba asina palpabel ku bo ta doño di e kas, ku si bo tin e akta den bo man ta komo si fuera ta e kas bo tin den bo man. Di igual manera, e evidensia riba kua nos fe ta basá ta asina sólido, asina konvinsente, ku ta komo si fuera nos ta mira kaba tur loke nos ta kere aden.
7. Kiko berdadero fe ta enserá?
7 Pues, berdadero fe ta enserá un konfiansa bon fundá i un konvikshon firme ku ta enfoká kompletamente riba Yehova Dios. Fe ta laga nos mir’é komo nos Tata amoroso i konfia ku tur su promesanan lo ser realisá sigur. Pero berdadero fe ta enserá mas. Fe ta meskos ku algu bibu; bo mester aliment’é p’e keda na bida. Pues, bo mester ekspresá bo fe pa medio di obra, sino e ta muri.—Sant. 2:26.
8. Dikon fe ta asina importante?
8 Dikon fe ta asina importante? Pablo a duna un kontesta interesante. (Lesa Hebreonan 11:6.) Ta solamente si nos tin fe nos por aserká Yehova i agrad’é. Pues, fe ta indispensabel si nos ke kumpli ku e propósito di mas elevá i noble di tur ser inteligente: glorifiká nos Tata selestial, Yehova, i mantené un bon relashon kuné.
9. Kon Yehova a demostrá ku e sa ku nos tin mester di fe?
9 Yehova sa ku nos mester di fe, p’esei el a perkurá pa nos tin ehèmpelnan ku por siña nos kon pa kultivá fe i demostr’é. E ehèmpel di hòmbernan fiel ku ta dirigí e kongregashon kristian mes ta un bendishon di Yehova. I su Palabra ta bisa: “Imitá nan fe.” (Heb. 13:7) Pero Yehova a duna nos mas ehèmpel. Pablo a skirbi tokante ‘un nubia grandi di testigu.’ E tabata referí na hòmber- i muhénan di antigwedat ku a laga un ekselente ehèmpel di fe. (Heb. 12:1) Pero e lista di personanan fiel ku Pablo a menshoná na Hebreonan kapítulo 11 no ta kompleto. Beibel tin kantidat di relato di bida real di hende hòmber i muhé, di tur edat i di tur nivel di bida, ku a hiba un bida di fe i ku por siña nos hopi kos den e mundu sin fe akí.
Kon Nos Por Imitá e Fe di Otro Hende?
10. Kon nos estudio personal por yuda nos imitá e hòmber- i muhénan fiel menshoná den Beibel?
10 Bo no por imitá un persona sin ku bo opserv’é bon promé. Segun ku bo ta lesa e buki akí, lo bo ripará ku nos a hasi hopi investigashon pa yuda bo opservá e hòmber- i muhénan di fe akí. Lo ta bon si bo mes tambe hasi algun investigashon adishonal. Durante bo estudio personal, usa e publikashonnan ku bo tin pa bai mas profundo den Beibel. Segun ku bo ta meditá riba loke bo ta studia, purba di imaginá e marko di sirkunstansia i background di e relatonan di Beibel. Purba di mira e lugá den bo mente, tende e zonidonan i hole e aromanan, komo si fuera bo tabata einan. Mas importante ainda, purba di saka afó ki sintimentu e hòmber- i muhénan fiel ei tabatin. Asina nan lo bira mas real pa bo, mas konosí, i podisé lo bo asta kuminsá mira algun di nan komo bon amigu.
11, 12. (a) Ki ora lo bo sinti ku bo a siña konosé Abraham ku Sara mihó? (b) Kon lo bo por benefisiá di e ehèmpel di Ana, Elías òf Samuel?
11 Ora ku di bèrdat bo siña konosé nan, lo bo ke imitá nan. Por ehèmpel, suponé ku e organisashon di Yehova a pidi bo pa ekspandé bo sirbishi. Kisas bo a haña un asignashon nobo. Podisé nan a pidi bo bai biba na un lugá ku tin mester di mas predikadó urgentemente. Òf tal bes nan a pidi bo partisipá den un forma di predikashon ku ta nobo pa bo òf ku bo no ta sinti bo masha kómodo kuné. Miéntras bo ta evaluá e asignashon i ta hasi orashon tokante dje, meditá riba e ehèmpel di Abraham. Esei lo por ta un bon yudansa pa bo. E ku Sara tabata dispuesto pa bandoná nan bida kómodo na Ur, i Dios a bendishoná nan rikamente pa esei. Si bo tambe tuma un desishon asina, lo bo sinti sin duda ku awor bo konosé nan mihó ku nunka.
12 Un otro ehèmpel. Kiko si un persona hopi yegá na bo hasi ko’i falsu ku bo, i bo ta sinti bo desanimá, sin gana di bai reunion? Si bo meditá riba e ehèmpel di Ana i wak kon e no a laga e komportashon malisioso di Penina strob’é di rindi adorashon na Yehova, esei lo yuda bo tuma e desishon korekto. Ademas, lo bo bin mira Ana mas manera un bon amiga. Asina tambe, si bo ta desanimá pasobra bo ta pensa ku bo no bal nada, lo bo sinti bo mas será ku Elías ora bo studia e situashon difísil ku e tabata aden i mira kon Yehova a konsol’é. I hóbennan na skol ku ta haña hopi preshon di nan kompañeronan di skol inmoral kisas lo sinti nan mas será ku Samuel despues ku nan analisá kon el a reakshoná riba e mal influensia di e yunan di Elí ku tabata sirbi na e tabernakel.
13. Splika dikon no ta asina ku ora bo ta imitá e fe di un personahe bíbliko bo fe tin ménos balor.
13 Ta asina ku ora bo ta imitá loke otro hende a hasi pa demostrá nan fe, bo fe lo tin ménos balor pa Yehova? Klaru ku nò! Kòrda ku e Palabra di Yehova ta animá nos pa imitá hende di fe. (1 Kor. 4:16; 11:1; 2 Tes. 3:7, 9) Es mas, algun di e personanan ku nos lo analisá den e buki akí mes tambe a imitá otro hende fiel ku a biba promé ku nan. Por ehèmpel, den Kapítulo 17, nos por tuma nota ku Maria aparentemente a sita e palabranan di Ana. Ta bisto ku el a konsiderá Ana un ehèmpel p’e. Esei ke men ku Maria su fe no tabata fuerte? Nò! Al kontrario, e ehèmpel di Ana a yuda Maria fortalesé su fe, di manera ku e mes por a traha un bon nòmber serka Yehova Dios.
14, 15. Menshoná algun rasgo di e buki akí, i kon bo por hasi bon uso di dje.
14 E buki akí por yuda bo fortalesé bo fe. E kapítulonan ku ta sigui ta un kompilashon di e artíkulonan di e seri “Imitá Nan Fe” ku a sali den e edishon públiko di E Toren di Vigilansia. Pero nos a agregá algun informashon nobo. Kada kapítulo tin preguntanan pa yuda bo konsiderá e informashon i aplik’é. Spesialmente pa e buki akí nos a krea plachinan hopi detayá i kolorido i a drecha algun ku tabat’ei kaba i a hasi nan mas grandi. E mapanan i e liña di sekuensia kronológiko di algun suseso tambe ta hopi útil. E buki Imitá Nan Fe a ser prepará pa nos us’é den nos estudio personal, di famia i di kongregashon. Hopi famia lo disfrutá tambe di simplemente sinta huntu i lesa e relatonan na bos haltu.
15 Nos deseo ta pa e buki akí yuda bo imitá e fe di Yehova su sirbidónan leal di pasado. Tambe nos ta spera ku segun ku bo ta haña un amistat mas será ku bo Tata selestial, Yehova, bo fe lo bira mas fuerte.
