MIRA! E israelitanan ta krusa Riu Hordan! Pero unda e awa ta? Debí ku tin hopi áwaseru den e temporada ei di aña, poko minüt pasá e riu tabata yen di awa. Pero awor tur e awa a bai! I e israelitanan ta krusa riba tera seku meskos ku nan a hasi na Laman Kòrá! Unda tur e awa a bai? Laga nos mira.

Ora a yega tempu pa e israelitanan krusa Riu Hordan, Yehova a manda Josué bisa e pueblo esaki: ‘E saserdotenan mester tuma e arka di pakto i bai dilanti nos. Ora nan hinka nan pia den e awa di Riu Hordan, e awa lo stòp di kore.’

P’esei e saserdotenan a hisa e arka di pakto, i a karg’é hib’é dilanti di e pueblo. Ora nan a yega Hordan, e saserdotenan a djis kana drenta e awa. E awa tabata kore ku masha forsa, i e tabata hundu. Pero asina ku nan pia a mishi ku e awa, e awa a stòp di kore! Esei ta un milager! Mas nort den e riu, Yehova a para e awa komo si fuera ku un dam. P’esei, pronto no tabatin awa mas den e riu!

E saserdotenan ku tabata karga e arka di pakto a bai para nèt meimei di e riu seku. Bo ta mira nan riba e plachi? Miéntras ku nan tabata pará ei, tur e israelitanan a krusa Riu Hordan riba tera seku!

Despues ku tur hende a krusa, Yehova a laga Josué bisa 12 hòmber fuerte: ‘Bai den e riu kaminda e saserdotenan ta pará ku e arka di pakto. Kohe 12 piedra, i montoná nan kaminda boso tur lo pasa anochi awe. Anto, den futuro, ora boso yunan puntra kiko e piedranan ei kier men, boso tin ku bisa nan ku e awa a stòp di kore ora ku e arka di pakto di Yehova a krusa Hordan. E piedranan lo hasi boso kòrda e milager!’ Tambe Josué a montoná 12 piedra kaminda e saserdotenan a para den fondo di e riu.

Por fin Josué a bisa e saserdotenan ku tabata karga e arka di pakto: ‘Subi sali for di Hordan.’ I asina ku nan a sali, e riu a kuminsá kore atrobe.

Josué 3:1-17; 4:1-18.