Relato 56: Saul—E Promé Rei di Israel
MIRA Samuel basha zeta riba kabes di e hòmber. Esei ta loke nan tabata hasi ku hende pa mustra ku el a wòrdu skohí komo rei. Yehova a bisa Samuel basha zeta riba kabes di Saul. Esei ta un zeta spesial di holó dushi.
Saul a pensa ku e no tabata sufisientemente bon pa ser rei. El a bisa Samuel: ‘Mi ta di e tribu di Benjamin, esun di mas chikitu di Israel. Pakiko bo ta bisa ku ami lo bira rei?’ Yehova a gusta Saul pasobra e no a pretendé di ser grandi i importante. P’esei Dios a skoh’é pa ser rei.
Pero Saul no tabata un hòmber pober ni chikitu. El a bini di un famia riku, i tabata un hòmber masha nèchi i haltu. E tabata rònt di trinta centimeter mas haltu ku kualke otro hende den Israel! Saul por a kore masha lihé tambe, i e tabata un hòmber masha fuerte. E pueblo a keda kontentu ku Yehova a skohe Saul pa ser rei. Nan tur a kuminsá grita: ‘Biba nos rei!’
E enemigunan di Israel a sigui mes fuerte. Ainda nan tabata kousa hopi difikultat pa e israelitanan. Pronto despues ku Saul a bira rei, e amonitanan a bini pa bringa kontra nan. Pero Saul a reuní un ehérsito grandi, i a logra un viktoria riba e amonitanan. Esei a hasi e pueblo kontentu di tin Saul komo rei.
Segun ku añanan a pasa, Saul a hiba e israelitanan na hopi viktoria riba nan enemigunan. Saul tabatin un yu ku kurashi tambe, ku yama Jonatan. Anto Jonatan a yuda Israel gana hopi bataya. Ainda e filisteonan tabata e enemigu di mas grandi di e israelitanan. Un dia míles i míles di filisteo a bini pa bringa kontra e israelitanan.
Samuel a bisa Saul pa warda te ora e yega pa ofresé un sakrifisio, òf ofrenda, na Yehova. Pero Samuel a tarda pa bini. Saul tabatin miedu ku e filisteonan lo kuminsá e bataya, i p’esei e mes a dal bai i ofresé e sakrifisio. Ora ku Samuel finalmente a yega, el a bisa Saul ku e tabata desobediente. Samuel a bisa: ‘Yehova lo skohe un otro hòmber pa ser rei riba Israel.’
Despues, Saul a desobedesé atrobe. P’esei Samuel a bisé: ‘Ta mihó pa obedesé Yehova ku ofresé e mihó karnénan na dje. Dor ku bo no a obedesé Yehova, Yehova lo no laga bo keda komo rei di Israel.’
Nos por siña un bon lès for di esei. E ta mustra nos kon importante ta pa obedesé Yehova semper. Tambe e ta mustra ku un bon hende, manera Saul tabata promé, por kambia i bira mal hende. Nos no ke bira mal hende nunka, no ta bèrdat?
1 Samuel kapítulo 9 te 11; 13:5-14; 14:47-52; 15:1-35; 2 Samuel 1:23.
Pregunta
- Kiko Samuel ta hasiendo riba e plachi, i pakiko e ta hasié?
- Pakiko Yehova ta gusta Saul, i ki tipo di hende e ta?
- Kon yama e yu hòmber di Saul, i kiko el a hasi?
- Pakiko Saul a ofresé sakrifisio en bes di warda pa Samuel hasié?
- Ki lèsnan nos por siña for di e relato tokante Saul?
Preguntanan adishonal
- Lesa 1 Samuel 9:15-21 i 10:17-27.
Kon Saul su aktitut humilde a yud’é evitá di aktua sin pensa ora sierto hendenan a papia riba dje ku falta di rèspèt? (1 Sam. 9:21; 10:21, 22, 27; Pro. 17:27)
- Lesa 1 Samuel 13:5-14.
Ki piká Saul a kometé na Gilgal? (1 Sam. 10:8; 13:8, 9, 13)
- Lesa 1 Samuel 15:1-35.
Ki piká grave Saul a kometé relashoná ku Agag, e rei di Amalek? (1 Sam. 15:2, 3, 8, 9, 22)
Kon Saul a purba hustifiká su akshonnan i tira falta riba otro hende? (1 Sam. 15:24)
Ki spièrtamentu nos mester tuma na pechu awe ora nos risibí konseho? (1 Sam. 15:19-21; Sal. 141:5; Pro. 9:8, 9; 11:2)
