PREGUNTA 10

Kon Beibel Por Yuda Mi?

TOKA NA

DIKON TA BON PA BO SA?

Beibel ta bisa ku “henter e Skritura ta inspirá di Dios.” (2 Timoteo 3:16) Si esaki ta bèrdat, e ora ei Beibel por duna bo e guia ku bo mester.

KIKO ABO LO HASI?

Imaginá bo e siguiente esena: David ta kore den un área i e no ta rekonosé nada rònt di dje. E bòrchinan di tráfiko i paisahe ta mustra ku e no ta kaminda e ta supose di ta. David ta realisá ku e no sa na unda e ta. Kasi sigur el a lora un kaminda robes.

Si ta abo ta David, kiko abo lo hasi?

PARA KETU I PENSA!

Bo tin vários opshon:

Puntra un hende pa direkshon.
Konsultá un mapa òf usa un GPS.
Keda kore numa i spera ku di un manera òf otro lo bo haña sa unda bo tin ku bai.

Ta klaru ku e opshon C ta esun ku ta duna bo ménos chèns di haña e kaminda korekto bèk.

Opshon B ta mas mihó ku e promé opshon. Al fin i al kabo, e mapa òf e GPS t’ei pa yuda bo i guia bo durante henter e kaminda.

Meskos tambe Beibel por yuda bo!

E buki mas bendí akí por:

Yuda bo trata ku problema di bida
Yuda bo siña konosé bo mes i bira un mihó persona
Mustra bo ku no tin un mihó bida ku esaki

KONTESTA PA PREGUNTANAN IMPORTANTE DI BIDA

For di ora nos kuminsá papia, nos ta hasi pregunta.

Dikon shelu ta blou?
Di kiko strea ta trahá?

Despues nos ta kuminsá hasi pregunta tokante e mundu ku nos ta biba aden.

Pakiko kos malu ta pasa?
Dikon hende ta muri?

Kiko si resultá ku tur e tempu e kontestanan pa e preguntanan akí tabata den Beibel?

Hopi hende ta bisa ku Beibel ta yen di kuenta i leyenda, ku e ta un buki antikuá òf muchu difísil pa komprondé. Pero esei ta bèrdat, òf e problema ta sinta mas bien den loke hende ta pensa di Beibel? E hendenan akí por ta mal informá?

Por ehèmpel, tin hende ta pensa ku Beibel ta bisa ku ta Dios tin e mundu akí bou di su kontrol. Pero, kon esei por ta? E mundu akí a bai kompletamente for di man. Tur kaminda tin doló i sufrimentu, malesa i morto, pobresa i kalamidat. Kon un Dios di amor por ta responsabel pa tur esaki?

Lo bo tin gana di sa e kontesta? Loke Beibel ta bisa tokante ken tin e mundu akí bou di su kontrol kisas lo sorprendé bo!

Sin duda, bo a ripará ku e konseho ku e foyeto akí ta duna ta basá riba Beibel. Testigunan di Yehova ta konvensí ku Beibel ta un fuente konfiabel ku por guia nos. Esei ta pasobra e ta “inspirá di Dios i ta probechoso pa siña hende, pa reprendé i pa korigí.” (2 Timoteo 3:16, 17) Lo ta bon pa bo analisá e buki antiguo akí pero ku ta kontené konseho bálido te den nos tempu!