BO NO ta kere ku lo ta hopi dushi si tur hende hasi kos bon?— Pero no tin niun hende ku ta hasi kos bon so. Bo sa dikon nos tur ta hasi kos malu de bes en kuando, maske ta kos bon nos ke hasi?— Dor ku nos tur a nase ku piká. Pero tin hende ku ta hasi yen di kos hopi malu. Nan tin rabia riba otro hende, i nan ta hasi nan daño pa malu. Bo ta kere ku nan por kambia i siña bira bon hende?—

Wak e yònkuman ku ta para kuida paña di e hendenan ku ta bati Esteban ku piedra. Su nòmber hebreo ta Saulo, pero su nòmber romano ta Pablo. E ta kontentu ku nan ta mata Esteban, un disipel di e Gran Maestro. Laga nos wak dikon Saulo ta hasi un kos asina malu.

Saulo ta parti di un grupo religioso hudiu ku yama fariseo. E fariseonan tin e Palabra di Dios, pero nan ta paga mas tinu na loke algun di nan mes lidernan religioso a siña. Esei ta loke a pone Saulo hasi kos malu.

Ora nan a kohe Esteban prezu na Yerusalèm, Saulo tabata huntu ku nan. Nan a hiba Esteban dilanti hues, i algun di e huesnan tabata fariseo. Maske nan a bisa kos malu tokante Esteban, e no tabatin miedu. Mesora el a papia ku kurashi, i a duna e huesnan un bon testimonio tokante Yehova Dios i tokante Hesus.

Pero e huesnan no a gusta loke el a bisa nan. Nan tabata sa hopi kos tokante Hesus kaba. Sí, ta nan mes a laga mata Hesus djis un poko tempu promé! Pero despues Yehova a hiba Hesus shelu bèk.  Awor, na lugá di kambia, e huesnan tabata bringa kontra e disipelnan di Hesus.

E huesnan a gara Esteban i hib’é pafó di e stat. Nan a dal e bent’é abou, anto tir’é ku piedra. I manera bo por mira riba e plachi, Saulo a para mira e kos pasa. El a pensa ku ta un bon kos nan a hasi di mata Esteban.

Bo sa dikon Saulo tabata pensa asina?— Wèl, Saulo tabata un fariseo henter su bida, i e tabata kere ku e kosnan ku e fariseonan tabata siña ta bon. E tabata tuma e fariseonan ei komo su ehèmpel, i p’esei e tabata hasi meskos ku nan.—Echonan 7:54-60.

Kiko Saulo a hasi despues ku nan a mata Esteban?— Wèl, el a purba kaba ku e otro disipelnan di Hesus tambe! E tabata bai te den nan kas, lastra tantu hòmber komo muhé saka afó, anto laga tira nan den prizon. Hopi disipel di Hesus a haña nan obligá di hui for di Yerusalèm. Pero nan no a stòp di prediká tokante Hesus sí.—Echonan 8:1-4.

 Esei a duna Saulo asta mas rabia riba e disipelnan di Hesus. P’esei, el a bai serka Sumo Saserdote Kaifas, p’e sumo saserdote dun’é pèrmit pa bai Damasko pa kohe kristian prezu den e stat ei tambe. Saulo kier a trese nan Yerusalèm prezu pa nan haña kastigu. Pero riba kaminda pa Damasko un kos masha straño mes a sosodé.

Un lus a bin for di shelu, anto un stèm a bisa: “Saulo, Saulo, pakiko bo ta persiguí mi?” Ta Hesus tabata papia for di shelu! E lus tabata asina skèrpi ku el a hasi Saulo siegu. P’esei, ta e otro hendenan ku tabata huntu ku Saulo mester a lei e hiba Damasko.

Tres dia despues Hesus a aparesé den un vishon na un di su disipelnan na Damasko ku yama Ananias. Hesus a bisa Ananias p’e bai bishitá Saulo, dun’é su bista bèk i papia kuné. Ora Ananias a papia ku Saulo, el a aseptá e bèrdat tokante Hesus. El a haña su bista bèk. Henter su manera di biba a kambia, i el a bira un sirbidó fiel di Dios.—Echonan 9:1-22.

B’a komprondé awor dikon Saulo tabata hasi kos malu?— Ta dor ku nan a siñ’é kos robes. E tabata bai tras di hende ku no tabata fiel na Dios. I e tabata parti di un grupo di hende ku tabata bai mas tras di idea di hende, ku tras di e Palabra di Dios. Pero, dikon Saulo sí a kambia su bida i kuminsá hasi bon, maske e otro fariseonan a sigui bringa kontra Dios?— Dor ku no ta rabia Saulo tabatin riba e bèrdat. P’esei, ora nan a mustr’é kiko ta bon, e tabata kla pa hasié.

Bo sa ken Saulo a bira despues?— Sí, el a bira konosí komo apòstel Pablo, un apòstel di Hesus. I kòrda ku ta Pablo a skirbi mas tantu buki di Beibel ku tur otro hende.

Tin hopi hende manera Saulo ku por kambia. Pero no ta fásil, pasobra tin un persona ku ta traha hopi duru pa pone hende hasi  malu. Bo sa ta ken?— Ora Hesus a aparesé na Saulo riba kaminda pa Damasko, el a papia tokante e persona ei. El a papia ku Saulo for di shelu i bis’é: ‘Mi ta bai manda bo pa habri wowo di hende, pa saka nan for di skuridat i trese nan den lus, i saka nan for di dominio di Satanas i hiba nan na Dios.’—Echonan 26:17, 18.

Sí, ta Satanas e Diabel ta purba pone tur hende hasi malu. Abo sa sinti ku tin bes ta difísil pa hasi bon?— Nos tur sa sinti asina. Ta Satanas ta hasié difísil. Pero tin un otro kos ku ta pone ku tin bes no ta fásil pa nos hasi bon. Bo sa kiko e kos ei ta?— E piká ku nos a nase kuné.

Ta esei ta pone ku hopi bes ta mas fásil pa nos hasi malu na lugá di hasi bon. P’esei, kiko nos tin ku hasi?— Sí, nos tin ku lucha pa hasi bon. Si nos hasi asina, nos por tin sigur ku Hesus lo yuda nos, pasobra e ta stima nos.

Tempu Hesus tabata na tera, el a stima hende ku a yega di hasi malu pero ku a kambia. E tabata sa kon difísil ta pa nan kambia. Por ehèmpel, tabatin hende muhé ku ta tene relashon seksual ku hopi hende hòmber. Di mes, e kos ei ta malu. Beibel ta yama e hende muhénan ei prostituta.

 Un dia un di e hende muhénan ei a tende di Hesus, anto el a bai serka Hesus ora e tabata na kas di un fariseo. El a basha zeta riba Hesus su pia i ku su kabei el a seka su lágrimanan for di Hesus su pia. E tabatin hopi duele di e pikánan ku el a hasi, i p’esei Hesus a pordon’é. Pero e fariseo no a haña ku mester a pordon’é.—Lukas 7:36-50.

Bo sa kiko Hesus a bisa algun fariseo?— El a bisa nan: ‘E kobradónan di belasting i prostitutanan lo drenta e reino di Dios promé ku boso.’ (Mateo 21:31) Hesus a bisa asina pasobra e prostitutanan a kere den dje i nan a stòp di hasi malu. Pero e fariseonan sí a keda hasi malu kontra e disipelnan di Hesus.

P’esei, ora nos mira den Beibel ku un kos ku nos ta hasi ta malu, nos mester ta dispuesto pa kambia. I ora nos siña kiko Yehova ke pa nos hasi, nos mester tin hopi gana di kuminsá hasi loke e ta bisa. E ora ei Yehova lo keda kontentu ku nos, i lo e duna nos bida pa semper.