DEN e último dos kapítulonan ku nos a lesa nos a tende di algun hende ku a resusitá. Bo ta kòrda kuantu nan tabata?— Tabatin sinku. Kuantu di nan tabata mucha?— Tres. I Beibel ta bisa ku un di e otro dosnan tambe tabata un hóben. Kiko bo ta kere ku esei ta mustra nos?—

Wèl, e ta mustra nos ku Dios ta stima mucha i hóben. Pero e ta bai resusitá hopi otro hende mas tambe. Ta hende ku a hasi bon so Dios ta bai resusitá?— Esei ta loke nos lo por pensa. Pero tin hopi hende ku nunka no a haña sa e bèrdat tokante Yehova Dios i su Yu. Nan a hasi kos malu sí, pero esei ta dor ku hende a siña nan kos robes. Bo ta kere ku Yehova ta bai resusitá hende asina?—

Beibel ta bisa: “Lo tin un resurekshon di tantu e hustunan komo e malbadonan.” (Echonan 24:15) Pakiko Dios ta bai resusitá hende malbado, esta, hende ku no a hasi bon?— Dor ku  nunka nan no a haña un chèns pa siña tokante Yehova i tokante kiko e ke pa hende hasi.

Ki dia bo ta kere ku hende ta bai resusitá?— Kòrda dia Lázaro a muri. Hesus a primintí su ruman Marta: “Bo ruman hòmber lo lanta.” Marta a respond’é: “Mi sa ku e lo lanta den e resurekshon riba e último dia.” (Juan 11:23, 24) Kiko Marta tabata kier men ora el a bisa ku Lázaro lo lanta riba “e último dia”?—

Wèl, Marta a yega di tende ku Hesus a primintí ku ‘tur hende den graf lo sali.’ (Juan 5:28, 29) Kier men, “e último dia” ta dia ku tur hende den Dios su memoria lo bolbe na bida. E último dia ei no ta un dia di 24 ora. E ta bai dura mil aña. Beibel ta bisa ku riba e dia ei ‘Dios ta bai husga e hendenan riba mundu;’ hende ku resusitá tambe.—Echonan 17:31; 2 Pedro 3:8.

Pensa kon dushi e dia ei lo ta! Durante e dia di mil aña largu ei, miónes i miónes di hende ku a muri lo biba bèk. Hesus a yama e lugá kaminda e hendenan ei ta bai biba, Paradeis. Ban wak na unda Paradeis lo ta, anto kon e ta bai ta.

Mas o ménos tres ora promé ku Hesus a muri riba e staka di tormento, el a papia di Paradeis ku un hòmber klabá na e staka banda di dje. Nan a klaba e hòmber na e staka p’e muri, pa motibu di e krímennan ku el a kometé. Pero segun ku e kriminal a mira Hesus i a tende kiko e hendenan  tabata bisa di Hesus, el a kuminsá kere den dje. P’esei e kriminal a bisa: “Kòrda di mi ora bo yega den bo reino.” Hesus a kontest’é: ‘Di bèrdat mi ta bisa bo awe, lo bo ta serka mi den Paradeis.’—Lukas 23:42, 43.

Kiko Hesus tabata kier men ku esei? Na unda Paradeis lo ta?—Pensa un ratu. Na unda Paradeis tabata na kuminsamentu?— Kòrda ku Dios a duna Adam, e promé hòmber, i su kasá, un paradeis aki riba tera mes pa nan biba aden. E lugá ei tabata yama hòfi di Edén. Tabatin bestia den e hòfi, pero nan no tabata hasi niun hende nada. I tabatin palu yen di fruta dushi i un riu grandi tambe. E tabata un lugá masha dushi mes pa biba!—Génesis 2:8-10.

P’esei, ora nos lesa ku e kriminal ta bai biba den Paradeis, nos mester imagin’é riba e tera aki mes, ora e bira un lugá bunita pa biba. Hesus ta bai biba aki bou na tera den Paradeis huntu ku e hòmber ku tabata kriminal?— Nò. Bo sa dikon nò?—

Esei ta dor ku Hesus lo ta den shelu gobernando komo Rei riba e Paradeis ku lo tin na tera. Kier men, Hesus ta bai ta ku e hòmber sí, pero den e sentido ku Hesus ta bai lant’é for di morto anto sòru pa loke e tin mester. Pero pakiko Hesus ta bai laga un hòmber ku tabata kriminal biba den Paradeis?— Laga nos wak si nos por haña sa.

 E kriminal tabata sa di Dios su propósito promé ku el a papia ku Hesus?— Nò, e no tabata sa. El a hasi kos malu dor ku e no tabata sa e bèrdat tokante Dios. Den Paradeis e ta bai siña tokante Dios su propósito. E ora ei e ta bai haña chèns di mustra ku e ta stima Dios di bèrdat, dor di hasi Dios su boluntat.

Tur hende ku resusitá ta bai biba den Paradeis na tera?— Nò, no ta tur. Bo sa dikon nò?— Dor ku un par di nan ta bai resusitá pa biba huntu ku Hesus den shelu. Huntu kuné den shelu nan ta bai goberná tera, ora tera bira un paradeis. Ban wak kon nos por sa e kos aki.

E anochi promé ku Hesus a muri, el a bisa su apòstelnan: ‘Na kas di mi Tata den shelu tin hopi lugá di biba, i mi ta bai pa mi prepará un lugá pa boso.’ E ora ei Hesus a primintí nan: “Lo mi bin atrobe i risibí boso serka mi, pa kaminda ami ta, boso tambe por ta.”—Juan 14:2, 3.

 Unda Hesus a bai despues ku el a resusitá?— Sí, el a bai shelu bèk serka su Tata. (Juan 17:4, 5) Kier men, loke Hesus a primintí su apòstelnan i algun otro siguidó di dje ta ku e ta bai resusitá nan pa nan por ta serka dje den shelu. Kiko nan ta bai hasi den shelu serka dje?— Beibel ta bisa ku e disipelnan ku resusitá den “e promé resurekshon” ta bai biba den shelu i “reina riba tera” huntu kuné pa mil aña.—Revelashon 5:10; 20:6; 2 Timoteo 2:12.

Kuantu hende ta bai resusitá den “e promé resurekshon” pa reina huntu ku Hesus?— Hesus a bisa su disipelnan: “No tene miedu, tou chikitu, pasobra a agradá boso Tata pa duna boso e reino.” (Lukas 12:32) Beibel ta bisa presis kuantu hende tin den e “tou chikitu” aki ku ta bai resusitá pa biba serka Hesus den su Reino di shelu. E ta bisa ku ta ‘shentikuarentikuater mil’ hende ta resusitá for di riba tera.—Revelashon 14:1, 3.

Anto kuantu hende ta bai biba den Paradeis na tera?— Beibel no ta bisa kuantu. Pero tempu Adam ku Eva tabata den hòfi di Edén, Dios a bisa nan pa nan haña yu anto yena tera. Ta bèrdat ku nan no a logra. Pero Dios ta bai sòru pa su propósito kumpli sí, esta, pa tera yena ku bon hende.—Génesis 1:28; Isaias 45:18; 55:11.

Imaginá bo kon dushi lo ta pa biba den Paradeis! Henter mundu lo bira manera un parke. Tur kaminda lo tin para, bestia i mata bunita, i tur sorto di flor. Niun hende lo no sinti doló pasobra e ta malu, ni niun hende lo no tin nodi muri. Tur hende lo ta amigu di otro. Si nos ke biba pa semper den Paradeis, ta awor nos tin ku prepará p’e.