TUR mayor ta tuma parti den un suseso ku niun hende no por kaba di komprondé kompletamente. Kada un ta kontribuí ku un parti di nan mes, i komo resultado un ser humano bibu i kompletamente formá ta desaroyá den barika di e mama. Pues, no ta nada straño ku ora un beibi nase, hende ta papia di “e milager di nasementu.”

Pero di mes, hañamentu di yu ta apénas e komienso di e responsabilidat di e mayornan. Ora e beibi kaba di nase e ta dependé kasi kompletamente riba otro hende pa su nesesidatnan físiko. Pero ora e kuminsá krese e tin mester di mas. E tin mester di yudansa p’e desaroyá den sentido mental, emoshonal, moral i spiritual.

Un di e kosnan prinsipal ku un mucha tin mester pa e por desaroyá na un manera sano, ta amor di su mayornan. Ta importante pa ekspresá bo amor na dje ku palabra, pero palabra so no ta basta. Bo mester mustr’é ku akshon ku bo ta stim’é. Sí, mucha tin mester pa nan mayornan duna nan un bon ehèmpel. Nan tin mester di guia moral: prinsipio ku por yuda nan den bida. I ta for di hopi chikitu nan mester kuminsá haña e guia aki. Kosnan masha tristu por pasa, i sa pasa tambe, ora mucha keda sin haña yudansa promé ku ta lat.

E prinsipionan ku tin den Beibel ta mihó ku kualkier prinsipio ku bo por haña otro kaminda. Siñansa basá riba Beibel tin sierto bentahanan úniko. Ora bo usa Beibel pa siña bo yunan, nan ta bin komprondé ku loke bo ta siña nan no ta djis algu ku un otro ser humano ta bisa, sino loke nan Kreadó, nan Tata selestial ta bisa. Esei ta duna bo konsehonan un forsa inigualabel.

Beibel ta animá mayornan pa traha duru pa inkulká prinsipio hustu den mente di nan yunan. Pero segun ku muchanan ta krese, hopi bes mayornan ta haña ku ta difísil pa papia ku nan tokante nèt e kosnan di mas importante.  E buki aki, Siña for di e Gran Maestro, ta diseñá pa yuda prevení ku un situashon asina ta desaroyá. E ta duna abo i bo yunan informashon spiritual pa boso lesa huntu. Pero mas ainda, e mester yuda lanta kòmbersashon entre e chikitin i esun ku ta lesa e buki aki kuné.

Lo bo nota ku e buki ta pidi pa e muchanan duna kontesta. Tin hopi pregunta den e kapítulonan, na lugánan bon skohé. Ora bo yega na nan, lo bo mira un strepi (—). E strepi ta pa kòrda bo ku bo mester pousa, pa animá e mucha ekspresá su mes. Mucha gusta partisipá. Si nan no por partisipá, nan ta pèrdè interes lihé.

Pero loke ta asta mas importante ta ku e preguntanan aki lo yuda bo haña sa kiko ta biba den mente di bo yu. Por sosodé ku e mucha ta duna un kontesta robes. Pero loke e lès ta sigui bisa despues di kada pregunta t’ei spesialmente pa yuda e mucha desaroyá un manera sano di pensa.

Algu spesial di e buki aki ta e mas ku 230 plachinan. Mayoria di nan ta bin kompañá ku teksto breve ku ta animá e mucha pa bisa kiko e ta pensa tokante loke e ta mira riba e plachi, i tokante loke el a lesa. P’esei, ta bon pa bo repasá e plachinan ku e mucha. Nan por sirbi komo un ekselente medio di edukashon ku ta kaba di mustra kiko ta e lèsnan prinsipal ku e mucha mester saka for di e kapítulo.

Ora e mucha siña lesa, anim’é p’e lesa e buki pa bo tende, i p’e les’é su so tambe. Mas e les’é, mas e bon konsehonan den dje lo penetrá den su mente i kurason. Pero di tur manera ta hopi importante pa boso lesa e buki huntu i riba un base regular, pasobra esei lo fortalesé e lasonan di kariño i rèspèt entre abo i bo yu.

Apénas un par di dékada pasá, nos lo no por a kere mes kuantu awendia nos muchanan ta ser eksponé na relashon seksual inapropiado, spiritismo i otro práktikanan baho. P’esei nan tin mester di protekshon, i e buki aki ta yuda bo duna nan tal protekshon na un manera drechi, pero franko. Pero loke mucha tin mester di dje prinsipalmente ta pa bo dirigí nan na e Fuente di tur sabiduria, nos Tata den shelu, Yehova Dios. Esei ta loke Hesus e Gran Maestro a hasi semper. Nos ta spera sinseramente ku e buki aki lo yuda abo i bo famia dirigí boso bida di tal manera ku boso ta agradá Yehova, ku bendishon eterno komo resultado.