MI SA sigur ku bo tambe ta haña ku tin persona ku ta mas haltu ku ami i abo, esta, mas importante i mas poderoso ku nos. Segun bo, ken ta un di nan?— Yehova Dios ta un di nan. Kiko di su Yu e Gran Maestro? E ta mas haltu ku nos?— Klaru ku sí.

Hesus a biba den shelu serka Dios. E tabata un angel, un spiritu. Dios a traha mas yu asina?— Sí, el a traha miónes di angel. E angelnan ei tambe ta mas haltu i mas poderoso ku nos.—Hebreonan 1:7; Daniel 7:10.

Bo ta kòrda nòmber dje angel ku a papia ku Maria?— E yama Gabriel. El a bisa Maria ku su beibi lo ta Yu di Dios. Dios a pone e bida di su Yu, ku tabata un angel, den Maria su barika pa Hesus por a bira un beibi anto nase na tera.—Lukas 1:26, 27.

Abo ta kere ku e milager ei a sosodé? Bo ta kere ku Hesus a biba serka Dios den shelu promé?— Hesus a bisa ku sí. Kon Hesus por tabata sa e kosnan ei? Wèl, tempu Hesus tabata mucha, kasi sigur Maria a kont’é loke Gabriel a bisa. I kasi sigur Hosé tambe a bisa Hesus ku ta Dios ta su berdadero Tata.

Ora Hesus a batisá, Dios a asta papia for di shelu i bisa: “Esaki ta mi Yu.” (Mateo 3:17) I e anochi promé ku Hesus a muri, el a resa:  “Glorifiká mi serka bo mes, Tata, ku e gloria ku mi tabatin serka bo promé ku mundu tabata.” (Juan 17:5) Sí, Hesus a pidi Dios hib’é shelu bèk, p’e bolbe biba serka Dios. Kon e por a bai biba den shelu?— E úniko manera ku esei por a sosodé ta si Yehova Dios a hasié bira un angel bèk, un spiritu invisibel.

Awor mi ke puntra bo un kos importante. Tur angel ta bon angel? Kiko bo ta kere?— Wèl, promé nan tur tabata bon angel, pasobra ta Yehova a krea nan, i tur kos ku Yehova traha ta bon. Pero un dia un dje angelnan a bira malbado. Bo sa kon e kos ei a sosodé?

Pa nos haña sa nos tin ku bai bèk te n’e tempu ku Dios a traha e promé hende hòmber i e promé hende muhé, Adam ku Eva. Tin hende ta bisa ku e historia di Adam ku Eva ta djis un kuenta. Pero e Gran Maestro tabata sa ku e ta bèrdat.

Ora Dios a traha Adam ku Eva, el a pone nan den un hòfi masha bunita, na un lugá ku yama Edén. E tabata un parke, un paradeis. Nan por a haña hopi yu, un famia grandi, anto keda biba den Paradeis pa semper. Pero tabatin un lès importante ku nan mester a siña. Nos a papia di e lès ei kaba. Ban wak si nos ta kòrd’é.

 Yehova a bisa Adam ku Eva ku nan por a kome kuantu fruta ku nan ke for di e palunan den e hòfi. Pero tabatin un palu ku nan no mester a kome di dje. Dios a bisa nan kiko lo pasa si nan hasié tòg. El a bisa: “Lo bo muri sigur.” (Génesis 2:17) Ki lès Adam ku Eva mester a siña antó?—

E lès tabata tokante obedensia. Sí, pa nos keda biba nos tin ku obedesé Yehova Dios! No tabata basta pa Adam ku Eva djis bisa ku nan ta bai obedesé Dios. Nan tabatin ku mustra ku nan ta obedes’é dor di hasi loke e ta bisa. Dor di obedesé Dios nan lo a mustra ku nan ta stim’é, i ku nan ke pa e ta nan Gobernante. E ora ei nan lo por a biba pa semper den Paradeis. Pero si nan a kome for di e palu, kiko esei lo a mustra?—

Esei lo a mustra ku nan no tabata gradisidu di bèrdat pa e kosnan ku Dios a duna nan. Abo lo a obedesé Yehova si bo tabata na Edén?— Na kuminsamentu Adam ku Eva a obedesé. Pero despues un persona mas haltu ku nan a gaña Eva. El a pone Eva desobedesé Yehova. Ta ken e tabata?—

 Beibel ta bisa ku un kolebra a papia ku Eva. Pero bo mes sa ku kolebra no por papia. Kon e por a papia ku Eva antó?— Un angel a hasi manera kos ku ta e kolebra a papia. Pero ta e angel mes tabata papia. Loke a pasa ta ku e angel ei a kuminsá pensa kos malu. E tabata ke pa Adam ku Eva adorá é. E tabata ke pa nan hasi loke é bisa. E kier a tuma e lugá di Dios pa su mes.

P’esei, e mal angel ei a hinka mal pensamentu den Eva su kabes. Via e kolebra el a bisa Eva: ‘Loke Dios a bisa boso no ta bèrdat. Boso no ta muri si boso kome for di e palu. Boso ta bai bira sabí manera Dios.’ Abo lo a kere e kos ku e stèm a bisa?—

Eva a kuminsá deseá un kos ku Dios no a dun’é. El a kome fruta for di e palu ku nan no tabatin mag di kome di dje. Despues el a duna Adam tambe fruta di e palu. Adam no a kere e kos ku e kolebra a bisa. Pero e tabatin mas gana di keda ku Eva, ku e tabatin amor pa Dios. P’esei, e tambe a kome fruta dje palu.—Génesis 3:1-6; 1 Timoteo 2:14.

Anto kiko a sosodé?— Adam ku Eva a bira imperfekto, nan a bira bieu i nan a  muri. I dor ku nan tabata imperfekto, tur nan yunan tambe a nase imperfekto, i ku tempu nan tambe a bira bieu i muri. Dios no a gaña! Ta bèrdat ku nos tin ku obedesé Dios pa nos keda biba. (Romanonan 5:12) Beibel ta konta nos ku e angel ku a gaña Eva yama Satanas e Diabel, i e otro angelnan ku a bira malbado yama demoño.—Santiago 2:19; Revelashon 12:9.

Bo a komprondé awor ta dikon e bon angel ku Dios a traha a bira malbado?— Dor ku el a kuminsá pensa kos malu. E kier a bira Number Un. E tabata sa ku Dios a bisa Adam ku Eva pa nan haña yu, i e tabata ke pa nan i tur nan yunan adorá é. Diabel ke pone tur hende desobedesé Yehova. P’esei e ta purba hinka mal pensamentu den nos kabes.—Santiago 1:13-15.

Diabel ta bisa ku niun hende no ta stima Yehova di bèrdat. E ta bisa ku ni abo ni ami no ta stima Dios, i ku no ta di bèrdat nos ke hasi loke Dios bisa. E ta bisa ku ta ora tur kos ta bai manera nos ke so nos ta obedesé Yehova. Diabel tin rason? Ta asina nos ta?

E Gran Maestro a bisa ku Diabel ta un gañadó! Hesus a mustra ku e ta stima Dios di bèrdat, pasobra el a obedesé Yehova. I no ta ora kos a bai fásil so Hesus a obedesé Dios. Tur ora el a obedesé Dios, asta ora hende a purba strob’é di hasi Dios su boluntat. El a keda fiel na Yehova te na su morto. Ta p’esei Dios a lant’é bèk p’e biba pa semper.

Wèl, ken bo ta kere ku ta nos enemigu di mas grandi antó?— Sí, Satanas e Diabel. Bo por mir’é?— Klaru ku nò! Pero nos sa ku e ta eksistí, i ku e ta mas haltu i mas poderoso ku nos. Pero ken ta mas haltu ku Diabel?— Sí, Yehova Dios. P’esei nos sa ku Dios por protehá nos.