Un amigu ta ser definí komo “un hende ku ta pegá na un otro hende pa motibu di e kariño òf apresio profundo ku e tin p’e.” Por ehèmpel, Jonatan i David a sera un amistat fuerte despues ku David a mata Goliat. (1Sa 18:1) Kada un di nan a desplegá kualidat ku a pone ku e otro tabata ke ta su amigu. P’esei, bo mester konosé un persona bon pa bo por tin un amistat será kuné. Normalmente ta tuma tempu i esfuerso pa bo siña konosé un otro persona bon. Sinembargo, riba ret sosial hende por bira bo “amigu” dor di djis primi un boton. Ta fásil pa hende riba ret sosial skonde ken nan ta realmente, pasobra nan por plania bon kiko pa bisa i asta influensiá kon hende ta mira nan. P’esei, ta importante pa bo pensa bon ken lo bo aseptá komo bo amigu. Si un hende ku bo no konosé bon puntra pa bira bo amigu riba ret sosial, bo no mester tin miedu di keda sin asept’é komo bo amigu djis pasobra bo ta pensa ku lo bo hùrt e. Algun hende a skohe pa no usa ret sosial pasobra nan sa ku e por ta peligroso. Sinembargo, si bo skohe pa usa ret sosial, kiko ta algun kos ku bo mester tene kuenta kuné?

WAK E VIDIO USA RET SOSIAL NA UN MANERA SABÍ, I DESPUES KONTESTÁ E SIGUIENTE PREGUNTANAN:

• Kiko bo mester pensa ariba promé ku bo pone potrèt òf komentario riba ret sosial?

• Dikon bo mester tene kuidou ken bo ta skohe komo amigu riba ret sosial?

• Dikon bo mester pone un límite na e kantidat di tempu ku bo ta pasa riba ret sosial?—Efe 5:15, 16