AÑA pasá, míles di Testigu di Yehova rònt mundu a ser nombrá komo ansiano i sirbidó ministerial. Si abo ta un di e ruman hòmbernan stimá akí, siguramente bo ta felis ku bo asignashon nobo.

Sinembargo, ta di komprondé ku kisas bo ta un poko nèrvioso. Jason, un ansiano yòn, a konta: “Tempu ku mi a bira ansiano, mi a pensa ku mi no por a kumpli ku e responsabilidatnan ei.” Moises i Yeremías tambe a pensa ku nan lo no por a kumpli ku nan asignashon ku Yehova a duna nan. (Éks. 4:10; Yer. 1:6) Si abo a yega di sinti bo asina, kiko bo por hasi pa vense e sintimentu ei i sigui progresá? Ban wak e ehèmpel di Timoteo.—Echo. 16:1-3.

Muy probablemente Timoteo tabatin mas o ménos 20 aña ora apòstel Pablo a invit’é riba su biahenan misionero. Na prinsipio, komo ku Timoteo tabata yòn, kisas e tabata falta konfiansa i tabatin problema pa kumpli ku su asignashon nobo den kongregashon. (1 Tim. 4:11, 12; 2 Tim. 1:1, 2, 7) Sinembargo, un dékada despues, Pablo por a bisa e kongregashon na Filipo: “Mi ta spera, si ta e boluntat di Señor Hesus, di manda Timoteo djis akí serka boso . . . Pasobra mi no tin ningun otro hende ku un disposishon manera esun di dje.”—Flp. 2:19, 20.

Kiko a hasi Timoteo un ansiano asina sobresaliente? Laga nos wak seis lès ku nos por siña for di su ehèmpel.

1. E tabata realmente interesá den hende. Pablo a bisa e rumannan na Filipo: “[Timoteo] di bèrdat lo sòru pa e kosnan ku tin di haber ku boso.” (Flp. 2:20) Sí, Timoteo tabata interesá den hende. E tabata ke pa e rumannan hala serka Yehova i tabata dispuesto pa hasi sakrifisio pa yuda nan.

Nos no mester ta manera un shofùr di bùs ku ta mas interesá pa yega na tempu na kada parada di bùs ku den buska pasahero. William, un ansiano pa mas ku 20 aña, ta konsehá e ansianonan nobo: “Stima e rumannan. Enfoká riba nan nesesidatnan i no solamente riba e parti organisatorio di bo asignashon.”

2. El a pone kosnan spiritual na promé lugá. Pablo a kompará Timoteo ku e otro rumannan, i a bisa: “Tur e otronan ta buska nan mes interes, no di Kristu Hesus.” (Flp. 2:21) Pablo tabata na Roma ora el a skirbi e palabranan akí. El a ripará ku e rumannan einan tabata hopi okupá ku asuntunan personal. Nan no tabata hasi masha esfuerso pa prediká. Pero Timoteo sí no tabata asina! Ki ora ku el a haña oportunidat pa prediká e bon notisia, e tabata manera Isaías, kende a bisa: “At’ami aki! Manda ami!”—Isa. 6:8.

Kon bo por balansá bo responsabilidatnan personal i esnan spiritual? Di promé, bo mester sa kiko tin prioridat. Pablo a bisa: “Sigui hasi sigur kiko ta e kosnan mas importante.” (Flp. 1:10) Pues, duna prioridat na loke ta importante pa Dios. Di dos, simplifiká bo bida. Eliminá tur loke ta kita bo tempu i energia. Pablo a animá Timoteo: “Hui for di e deseonan di hubentut, ma hasi  esfuerso pa kultivá hustisia, fe, amor i pas.”—2 Tim. 2:22.

3. El a traha duru pa sirbi Yehova. Pablo a rekordá e filipensenan: “Boso sa di e prueba ku [Timoteo] a duna di su mes: manera un yu ku su tata, el a traha duru huntu ku mi pa adelanto di e bon notisia.” (Flp. 2:22) Timoteo no tabata floho. El a traha duru huntu ku Pablo, i esei a fortalesé nan amistat.

Awe, tin hopi trabou pa hasi den e organisashon di Yehova. E trabounan akí ta duna berdadero satisfakshon i ta yuda boso hala mas serka boso rumannan. Pues, semper pone meta pa bo tin “hopi di hasi den e trabou di Señor.”—1 Kor. 15:58.

4. El a apliká loke el a siña. Pablo a skirbi Timoteo: “Abo a presta bon atenshon na mi siñansa, mi manera di biba, mi propósito, mi fe, mi pasenshi, mi amor, mi perseveransia.” (2 Tim. 3:10) Komo ku Timoteo a apliká loke el a siña, el a kualifiká pa mas responsabilidat.—1 Kor. 4:17.

Tin un ansiano mas grandi ku bo, ku eksperensia komo bo konsehero? Si no ta asina, dikon no skohe ún? Tom, un ansiano pa hopi aña, ta kòrda: “Un ansiano ku eksperensia a mustra interes den mi. I el a train mi bon. Regularmente mi tabata pidié konseho i tabata apliká nan. Esei a yuda mi ta mas sigur di mi mes.”

5. E tabata entrená su mes. Pablo a urgi Timoteo: “Entrená bo mes ku e meta di kultivá deboshon na Dios.” (1 Tim. 4:7) Por ehèmpel, aunke un atleta tin un entrenadó, e mester train riba su mes tambe. Pablo a animá Timoteo: “Sigui dediká bo mes na lesamentu den públiko, na dunamentu di konseho serio i siñansa. . . . Reflekshoná riba e kosnan akí; keda intensamente okupá ku nan, pa tur hende por mira bon kla ku bo a hasi progreso.”—1 Tim. 4:13-15.

Bo tambe mester keda mehorá bo abilidatnan i no laga bo progreso spiritual stanka. Keda al dia ku e organisashon. Ademas, evitá di tin demasiado konfiansa den bo mes. No pensa ku debí di bo eksperensia, bo por trata ku kualke situashon sin tuma tempu pa buska informashon. Meskos ku Timoteo, “presta atenshon konstantemente na bo mes i na e siñansa ku bo ta duna.”—1 Tim. 4:16.

6. El a dependé riba e spiritu di Yehova. Relashoná ku Timoteo su sirbishi, Pablo a bis’é: “Ku yudansa di e spiritu santu ku ta biba den nos, kuida e tesoro akí konfiá na bo.” (2 Tim. 1:14) Pa Timoteo por a “kuida” su sirbishi, e mester a dependé riba e spiritu di Yehova.

Donald, un ansiano pa hopi dékada, a bisa: “Rumannan hòmber nombrá mester balorá i kuida nan relashon ku Dios. Esnan ku hasi asina lo bira mas i mas fuerte. Si nan pidi pa spiritu santu i kultivá su fruta, nan lo ta un berdadero bendishon pa nan rumannan.”—Sal. 84:7; 1 Ped. 4:11.

Ta masha animante pa mira asina tantu ruman hòmber resien nombrá, manera abo, sigui progresá spiritualmente. Jason, ku nos a menshoná na prinsipio, a bisa: “Desde ku mi a bira ansiano, mi a siña hopi kos i mi a haña mas konfiansa. Awor mi ta ègt disfrutá di mi asignashon i ta mir’é komo un privilegio maravioso!”

Abo lo sigui progresá spiritualmente? Pone e meta pa bo imitá Timoteo. Asina bo tambe lo ta un bendishon pa bo rumannan.