1. Pa ki motibu nos ta duna komentario na reunion?

 DIKON nos ta bai reunion? Nos ta bai reunion prinsipalmente pa alabá Yehova. (Sal. 26:12; 111:1) Pero, nos ta bai tambe pa animá nos rumannan durante e tempunan difísil akí. (1 Tes. 5:11) Anto ora nos duna komentario na reunion, nos ta hasi tur e dos kosnan ei pareu.

2. Ki oportunidat nos tin pa duna komentario?

² Tur siman, nos tin oportunidat di duna komentario na nos reunionnan. Den wikènt, nos por hasi esei durante nos Estudio di Toren di Vigilansia. Anto den siman, nos por hasi esei durante e parti di Hoya Spiritual, Estudio di Beibel di Kongregashon i e otro partinan di pregunta i kontesta.

3. Ki difikultatnan nos por haña nos kuné, i kon Hebreonan 10:24 i 25 ta yuda nos?

³ Nos tur ke alabá Yehova i animá nos rumannan. Pero, nos por haña nos ku e siguiente difikultatnan. Nos ta haña strès i bira nèrvioso ora di duna komentario. Òf, nos ta sinti ku nos no ta haña sufisiente bùrt pa duna komentario. Awor, kiko por yuda nos pa no laga e difikultatnan ei stroba nos? E karta ku Apòstel Pablo a manda pa e Hebreonan por yuda nos ku esei. Ora Pablo tabata papia tokante e balor di reuní huntu, el a resaltá e importansia di tene kuenta ku otro i “animá otro.” (Lesa Hebreonan 10:24, 25.) Nos lo sinti nos ménos nèrvioso si nos kòrda ku nos por animá nos rumannan  ku nos ekspreshonnan di fe asta si nos komentario ta kòrtiku. Anto si nos no haña mes tantu bùrt ku nos tabata ke, tòg nos por ta kontentu ku otro rumannan sí a haña un oportunidat.—1 Ped. 3:8.

4. Kiko ta e tres kosnan ku nos lo trata den e artíkulo akí?

⁴ Pa kuminsá, nos lo papia tokante kon pa animá otro den un kongregashon chikitu kaminda no tin hopi publikadó pa duna komentario. Despues, nos lo wak kon pa animá otro den un kongregashon grandi kaminda tin hopi publikadó pa duna komentario. Anto por último, nos lo trata kon nos por hasi sigur ku loke nos ta bisa den nos komentarionan ta ègt animá nos rumannan.

5. Ki nos por hasi pa animá otro den un kongregashon chikitu?

⁵ Den un grupo òf kongregashon chikitu, no tin hopi hende pa duna komentario. Anto tin biaha, e ruman ku ta dirigí ta hañ’é ta warda un ratu promé ku un hende hisa nan man. Kisas esei ta pone e reunion parse laf i no animante. Den un kaso asina, tin algu ku abo por hasi. Bo por hasi esfuerso pa duna mas komentario. Asina ei, lo bo animá otronan pa hasi meskos.

6-7. Kiko ta algun kos ku bo por hasi pa ta ménos nèrvioso pa duna komentario?

⁶ Bo ta haña strès i bira nèrvioso ora bo djis pensa di duna komentario? No wòri, bo no ta bo so. Pero, kiko bo por hasi pa bo ta ménos nèrvioso ora bo ke animá bo rumannan ku bo komentario? Ban wak algun kos.

⁷ Bo por haña algun sugerensia práktiko ku a sali den E Toren di Vigilansia. b Un di nan ta, prepará bon. (Pro. 21:5) Mas mihó bo komprondé e informashon, mas fásil lo ta pa bo duna komentario. Un otro sugerensia ta, duna komentario kòrtiku. (Pro. 15:23; 17:27) Lo bo tin ménos di preokupá si bo komentario ta kòrtiku, kisas un òf dos frase. Tambe, un komentario kòrtiku lo ta muchu mas fásil pa bo rumannan komprondé ku un komentario largu yen di detaye. Anto un komentario kòrtiku den bo mes palabranan ta demostrá ku bo a prepará bon i a komprondé e informashon.

8. Kon Yehova ta sinti ora nos hasi nos esfuerso?

⁸ Pero kiko si bo a purba algun di e sugerensianan ei pero te ainda bo ta haña muchu strès ora di duna komentario? Bo por tin sigur ku Yehova ta keda kontentu ku e esfuerso ku bo ta hasi. (Luk. 21:1-4) Yehova nunka lo pidi bo pa hasi mas ku loke bo por. (Flp. 4:5) Purba di saka afó kiko mas abo por hasi, pone meta pa logr’é i pidi Yehova pa trankilisá bo. Kisas pa algun di nos e meta ku nos tin ku kuminsá na pone ta, duna un komentario kòrtiku.

9. Ki difikultat pa duna komentario tin den un kongregashon grandi?

⁹ Pero kos ta diferente den un kongregashon ku tin hopi publikadó. Kisas tin asina tantu ruman ku ke duna komentario ku mayoria di biaha bo no ta  haña bùrt. Por ehèmpel, Danielle semper tabata gusta duna komentario na reunion. c P’e, nan ta parti di su adorashon. Tambe, nan ta un manera pa animá su rumannan i pa fortalesé su fe den loke Beibel ta bisa. Pero ora el a bai un kongregashon mas grandi, e no tabata haña mes tantu bùrt. Anto tin biaha e no tabata haña bùrt mes. El a bisa: “Mi tabata kunsumí. M’a sinti manera nan a kita un privilegio fo’i mi. Anto ora esei pasa kada bes, bo ta kuminsá pensa ku ta pa malu e ruman ta hasié.”

10. Menshoná algun sugerensia ku por yuda nos duna komentario.

¹⁰ Bo a yega di sinti bo manera Danielle? Si esei ta e kaso, kisas bo no tin gana di duna komentario mas i ke djis sinta skucha e reunion. Pero, no stòp di purba di duna komentario. Algu ku por yuda bo ta si bo prepará mas ku un komentario pa kada reunion. Ya asina, si bo no haña bùrt na kuminsamentu, durante reunion bo tin otro komentario pa duna. Ora bo ta prepará bo Toren di Vigilansia, pensa kon kada paragraf ta konektá ku tema di e artíkulo. Di e manera ei, chèns ta grandi ku lo bo tin algu èkstra pa komentá durante henter e lès. Ademas, bo por prepará komentario riba paragrafnan ku por parse mas difísil pa splika. (1 Kor. 2:10) Dikon? Pasobra kisas lo no tin dje tantu hende ku lo ke duna komentario na e paragrafnan ei. Pero kiko si bo a hasi tur e kosnan ei pero vários reunion a pasa i tòg te ainda bo no a haña bùrt? Wèl algu ku bo por hasi ta, promé ku reunion, bai serka e ruman ku ta dirigí e parti anto bis’é kua pregunta bo tin gana di kontestá.

11. Kiko Filipensenan 2:4 ta animá nos pa hasi?

¹¹ Lesa Filipensenan 2:4. Yehova a inspirá Apòstel Pablo pa animá e kristiannan pa buska interes di otro hende. Kon nos por apliká e konseho ei den nos reunionnan? Esei ta di kòrda ku otronan, meskos ku nos, ke partisipá.

12. Ki ta un bon manera pa animá nos rumannan na reunion? (Wak e plachi.)

 ¹² Wak e kos for di e ángulo akí. Por ehèmpel ora bo ta kòmbersá ku bo amigunan, bo ta papia asina tantu ku nan no ta haña chèns di bisa nada? Klaru ku nò! Bo ke pa nan tambe papia. Mesun kos ta konta na reunion, lo bo ke pa mas tantu hende haña bùrt. Anto un bon manera pa animá bo rumannan ta di duna nan chèns di ekspresá nan fe. (1 Kor. 10:24) Laga nos wak kon nos por hasi esei.

13. Ki nos por hasi pa duna mas hende chèns di duna komentario?

¹³ Pa kuminsá, tene nos komentarionan kòrtiku. Asina ei ta sobra tempu pa mas ruman komentá. Ansiano i otro publikadónan ku tin vários aña den bèrdat por pone ehèmpel den esei. Aparte di duna komentario kòrtiku, evitá di menshoná tur e puntonan den bo komentario. Si bo bisa tur kos ku tin den e paragraf, no ta sobra nada pa otronan. Por ehèmpel, den e paragraf akí tin dos sugerensia: duna komentario kòrtiku i evitá di menshoná tur e puntonan. Si abo ta e promé ku haña bùrt pa kontestá na e paragraf akí, menshoná ún di e sugerensianan ei i no tur dos.

14. Kiko nos por tene kuenta kuné ora di disidí kuantu biaha nos lo duna komentario? (Wak e plachi.)

¹⁴ Mustra konsiderashon ora di disidí kuantu biaha lo bo ke duna komentario. Si kasi tur ora bo man ta na laira, kisas e ruman ku ta dirigí lo sintié preshoná pa duna bo vários bùrt aunke ku tin otro ruman ku no a haña bùrt ainda. Esei por pone ku otronan por pensa ku no tin sentido pa duna komentario.—Ekl. 3:7.

15. (a) Kon nos mester reakshoná si nos no haña bùrt pa duna komentario? (b) Kon un ruman ku tin un parti di pregunta i kontesta por mustra konsiderashon na tur hende? (Wak e kuadro “ Si Bo Tin un Parti di Pregunta i Kontesta.”)

¹⁵ Ora hopi ruman ta hisa man pa  duna komentario, kisas nos lo no haña mes tantu bùrt ku nos ke. Por sosodé tin biaha ku asta nos por keda sin haña bùrt mes. Ta di komprondé ku nos por sinti nos frustrá. Pero, nos lo no ke pensa ku e ruman ku ta dirigí tin algu kontra nos.—Ekl. 7:9.

16. Ki nos por hasi pa animá e rumannan ku ta duna komentario?

¹⁶ Aunke ku bo no a haña mes tantu bùrt ku bo tabata ke, bo por skucha e komentarionan di otro ruman i despues di reunion bisa nan loke bo a gusta den nan komentario. Meskos ku bo komentarionan lo a animá nan, bo palabranan tambe por hasi esei. (Pro. 10:21) Sí, elogio ta un manera mas ku bo por animá bo rumannan.

17. (a) Kiko mayornan por hasi pa yuda nan yunan duna komentario? (b) Segun e vidio, kiko ta kuater kos ku por yuda bo prepará pa duna komentario? (Wak e nota na pia di página.)

¹⁷ Kiko mas nos por hasi pa animá otro na reunion? Wèl, si bo tin yu, bo por yuda nan prepará komentario ku ta kuadra ku nan edat. (Mat. 21:16) Na reunion tin biaha lo trata temanan serio manera problema di matrimonio òf asuntu moral. Pero asina mes, lo tin un  òf dos paragraf kaminda un mucha por duna komentario. Tambe bo por yuda bo yunan komprondé ku no ta tur biaha nan lo haña bùrt. Esei lo yuda nan pa no bira tristu ora otro hende haña bùrt na lugá di nan.—1 Tim. 6:18. d

18. Ora nos ta duna komentario, kiko nos mester evitá? (Proverbionan 27:2)

¹⁸ Nos tur por prepará komentario ku ta onra Yehova i animá nos rumannan. (Pro. 25:11) Aunke ku ratu ratu nos por duna un eksperensia personal kòrtiku, nos lo evitá di papia muchu di nos mes òf hala muchu atenshon na nos mes. (Lesa Proverbionan 27:2; 2 Kor. 10:18) Mas bien, nos komentarionan mester focus riba Yehova, su Palabra i henter su pueblo. (Rev. 4:11) Klaru, bo por duna un komentario personal si e pregunta di un paragraf ta pidi esei. Un di e preguntanan di e siguiente paragraf lo ta asina.

19. (a) Kiko lo ta e resultado ora nos mustra konsiderashon pa otro na reunion? (Romanonan 1:11, 12) (b) Dikon abo gusta duna komentario?

¹⁹ Aunke no tin regla tokante kon nos tin ku duna komentario, nos tur tin ku purba animá otro. Pa algun esei ta nifiká duna mas komentario. I pa otronan esei ta nifiká keda kontentu ku e bùrtnan ku nan a haña i keda kontentu tambe ku tin otro hende ku gusta duna komentario. Si na reunion nos ta mustra konsiderashon pa otro, nos tur lo disfrutá di “un interkambio di estímulo.” Sí, nos tur lo animá otro.—Lesa Romanonan 1:11, 12.