DIANA tin mas ku 80 aña di edat. Su kasá tabatin Alzheimer i a biba den un kas di kuido pa algun aña promé ku el a fayesé. Ademas, Diana a pèrdè su dos yunan i tabatin ku lucha ku kanser na pechu. Pero, ora e rumannan mira Diana na reunion òf den sirbishi, nan ta mira ku semper e ta kontentu.

John tabata superintendente biahero pa mas ku 43 aña. E tabata stima su asignashon i a dediká su mes kompletamente na dje. Sinembargo, e mester a stòp ku e asignashon akí pa kuida un miembro di famia malu, i awor e ta sirbi den un kongregashon lokal. Apesar di esei, ora rumannan ku konosé John top’é na asamblea òf kongreso, nan ta bisa ku e no a kambia. Ainda e ta un persona hopi kontentu.

Kon ta posibel ku Diana i John tin goso? Kon un hende ku ta sufri emoshonalmente i físikamente por sigui tin goso? I kon un hende por mantené su goso si e mester a stòp ku un asignashon ku e tabata stima? Beibel ta splika nos esei: “E hende hustu lo alegrá den Yehova.” (Sal. 64:10, NW) Pa por komprondé e bèrdat fundamental akí mihó, laga nos analisá kiko ta duna nos berdadero goso i kiko nò.

Tin sierto kos ku kasi semper ta duna goso. Por ehèmpel, pensa riba un pareha ku ta stima otro i ku ta bai kasa. Òf, kiko di un hende ku a kaba di haña yu òf un hende ku a haña un asignashon teokrátiko nobo? E kosnan akí di bèrdat ta duna goso pasobra nan ta bini di Yehova. E ta esun ku a instituí matrimonio, a krea nos ku e posibilidat di haña yu i a duna nos asignashon pa medio di e kongregashon kristian.—Gén. 2:18, 22; Sal. 127:3; 1 Tim. 3:1.

Sinembargo, algun kos ku ta trese goso por ta temporal. Lamentablemente, un kasá por bira infiel òf muri. (Eze. 24:18; Osé. 3:1) Un yu por desobedesé su mayornan i Dios i kisas asta ser ekspulsá. Samuel su yunan no a sirbi Yehova na un manera aseptabel i e pikánan ku David a kometé a trese  hopi problema den su famia. (1 Sam. 8:1-3; 2 Sam. 12:11) Ora e tipo di kosnan akí tuma lugá, nan no ta trese goso sino tristesa i sufrimentu.

Asina tambe, por sosodé ku nos mester stòp ku un asignashon teokrátiko, debí na malesa, obligashon di famia òf kambio den e organisashon. Hopi ruman ku a pasa den e situashon akí ta bisa ku nan ta sinti falta di e goso ku e trabou tabata duna nan.

Nos ta mira bon kla ku e tipo di kosnan akí ku ta duna nos goso por ta temporal. Pero akaso, tin un otro tipo di goso, un ku ta duradero asta ora kosnan no ta bai manera nos ke? Sigur, pasobra Oséas, Ezekiel, Samuel i David a mantené un grado di goso apesar di difikultat ku nan a pasa aden.

Hesus tabata sa kiko ta berdadero goso. Den shelu, su situashon tabata ideal, e tabata “regosihando semper . . . dilanti” Yehova. (Pro. 8:30) Pero riba tera, tin biaha el a enfrentá situashonnan hopi difísil. Tòg, Hesus tabatin goso den hasi e boluntat di su Tata. (Huan 4:34) Awor, kiko di su último oranan doloroso? Nos ta lesa: “Pa motibu di e goso ku tabata sper’é, el a soportá morto na un staka di tormento.” (Heb. 12:2) Pues, ta bon pa nos konsiderá loke Hesus a bisa tokante berdadero goso.

Un biaha, 70 disipel di Hesus a bini serka dje despues di a prediká. Nan tabata kontentu pasobra nan a hasi milager i asta saka demoño. Pero Hesus a bisa nan: “No alegrá pasobra e spiritunan ta obedesé boso, ma alegrá pasobra boso nòmber a ser skirbí den shelu.” (Luk. 10:1-9, 17, 20) Sí, Yehova su aprobashon ta mas importante i ta duna muchu mas goso ku kualke privilegio spesial.

Na un otro okashon, Hesus tabata papia ku un multitut. Un señora hudiu tabata asina impreshoná ku Hesus su manera di siña ku el a bisa ku Hesus su mama mester ta felis. Pero, Hesus a korigié i a bisa: “Mas felis ta esnan ku ta tende e palabra di Dios i ta kumpli kuné!” (Luk. 11:27, 28) Komo mayor bo  por ta orguyoso di bo yunan, esei por hasi bo felis. Pero, berdadero goso ta bini di obedesé Yehova i tin un bon relashon kuné.

En bèrdat, nos lo tin berdadero goso si nos tin Yehova su aprobashon. I berdadero goso ta permanesé apesar di prueba. De echo, ora nos perseverá i keda fiel bou di prueba, nos ta haña mas goso. (Rom. 5:3-5) Ademas, Yehova ta duna su spiritu na hende ku ta konfia den dje, i goso ta parti di e fruta di spiritu. (Gal. 5:22) Esaki ta yuda nos komprondé dikon Salmo 64:10 (NW) ta bisa: “E hende hustu lo alegrá den Yehova.”

Esaki ta splika dikon Diana i John, kendenan a ser menshoná anteriormente, por a mantené nan goso apesar di prueba. Diana ta bisa: “Mi a tuma refugio den Yehova, meskos ku un yu lo hasi ku un mayor.” Kon Diana sa ku e tin Dios su aprobashon? E ta bisa: “Mi ta sinti ku el a bendishoná mi pa sigui prediká riba un base regular ku un smail riba mi kara.” Kiko a yuda John mantené su goso i keda aktivo den sirbishi despues ku e mester a stòp ku un asignashon ku e tabata stima? John ta bisa: “Desde 1998 ku nan a pidi mi pa ta instruktor di e Skol di Entrenamentu Ministerial, mi a hasi mas estudio personal ku nunka.” John a splika ku e ku su kasá tabata dispuesto pa sirbi Yehova den kualke asignashon, i esei a hasi e kambio akí mas fásil. El a agregá: “Nos a hasié sin lamentá.”

Hopi otro hende a eksperensiá ku loke Salmo 64:10 ta bisa ta bèrdat. Tuma por ehèmpel un pareha ku a sirbi na Bètel na Merka pa mas ku 30 aña. Nan a haña un otro asignashon pa sirbi den vèlt komo pionero spesial. Nan a atmití: “Ta normal pa ta tristu ora bo pèrdè un kos ku bo ta stima,” pero nan a agregá: “Bo no por keda tristu pa semper.” Mesora ku nan a yega nan kongregashon nobo, nan a kuminsá sali den sirbishi ku e rumannan. E pareha a bisa tambe: “Nos a hasi orashon tokante sierto kosnan spesífiko. Ora nos a mira ku Yehova a kontestá nos orashonnan, esei a animá nos i a duna nos goso. Poko tempu despues ku nos a yega, otro ruman den e kongregashon tambe a kuminsá traha pionero. Ademas, nos tin e goso di por dirigí dos estudio progresivo di Beibel.”

Ta bèrdat ku no semper ta fásil pa mantené nos goso. Lo tin kos ku ta hasi nos tristu. Pero, Yehova ta duna nos e siguransa ku nos ta haña na Salmo 64:10 (NW). Asta si nos ta desanimá, nos por ta sigur ku hende ku demostrá di ta “hustu” i ku keda fiel apesar ku nan sirkunstansianan ta kambia, “lo alegrá den Yehova.” Ademas, nos por meditá riba e goso ku nos lo sinti ora Yehova establesé e “shelunan nobo i un tera nobo” ku el a primintí. Ora e promesanan ei kumpli, nos lo ta kompletamente liber di imperfekshon. Tur sirbidó di Dios lo ta “kontentu i [lo] regosihá pa semper” den loke Yehova ta krea i proveé.—Isa. 65:17, 18.

Imaginá kiko esaki lo nifiká: Nos lo tin salú perfekto i nos lo lanta tur dia yen di energia. Sin importá loke nos a pasa aden ku a hasi nos tristu, nos lo no tin e mal rekuerdonan ei mas. Yehova ta sigurá nos ku “e kosnan di ántes lo no wòrdu rekordá mas ni bini na memoria.” Pa medio di e resurekshon nos lo ta huntu ku nos sernan kerí atrobe. Miónes di hende lo sinti meskos ku e mayornan di e mucha di 12 aña ku Hesus a resusitá: “Nan no por a kontené nan mes di kontentu ku nan a bira.” (Mar. 5:42) Ku tempu, tur hende riba tera lo ta realmente “hustu” i “lo alegrá den Yehova” pa semper.