1, 2. Kiko Hebreonan 13:4 mester motivá nos pa hasi?

NOS tur ke onra Yehova. Yehova ta meresé nos onor i ta primintí nos ku e tambe lo onra nos. (1 Sam. 2:30; Pro. 3:9; Rev. 4:11) Ademas, Yehova ke pa nos mustra onor na otro hende, manera funshonario di gobièrnu. (Rom. 12:10; 13:7) Pero, tin algu ku spesialmente ta meresé nos onor i rèspèt. Esei ta e areglo di matrimonio.

² Apòstel Pablo a skirbi: “Laga matrimonio ta onorabel den bista di tur hende, i tene e kama matrimonial sin mancha.” (Heb. 13:4) Pablo no tabata djis dunando algun informashon tokante matrimonio. Mas bien, e tabata urgi e kristiannan pa onra matrimonio, esta, pa mira matrimonio komo algu presioso. Nos tambe ta mira matrimonio asina, foral nos mes matrimonio si nos ta kasá?

3. Ki konseho importante tokante matrimonio Hesus a duna? (Wak e promé plachi.)

³ Si nos ta balorá i ta onra matrimonio, nos ta sigui e mihó ehèmpel ku ta eksistí, esta, esun di Hesus. Ora e fariseonan a puntra Hesus tokante divorsio, Hesus a menshoná loke Dios a bisa tokante e promé matrimonio: “P’esei un hòmber lo bandoná  su tata i su mama, i nan dos lo ta ún karni.” El a agregá: “No laga ningun hende separá loke Dios a uni bou di un yugo.”—Lesa Marko 10:2-12; Gén. 2:24.

4. Kiko tabata Yehova su propósito pa matrimonio?

⁴ Pues, Hesus tabata di akuerdo ku ta Dios a originá matrimonio i ku matrimonio mester ta un areglo permanente. Ora Dios a instituí e promé matrimonio, e no a bisa Adam ku Eva ku nan por a divorsiá. Mas bien, Dios su propósito tabata pa “nan dos” keda uní den matrimonio pa semper.

5. Kon morto ta afektá matrimonio?

⁵ Manera nos sa, ora Adam a peka, hopi kos a kambia. Un di e kambionan ei ta ku hende a kuminsá muri, i esei a afektá matrimonio. Apòstel Pablo a splika e kristiannan ku morto ta fin di matrimonio i ku e kasá ku a keda atras por bolbe kasa.—Rom. 7:1-3.

6. Kiko Lei di Moises ta siña nos tokante Yehova su punto di bista di matrimonio?

⁶ Dios a duna e nashon di Israel e Lei di Moises ku a inkluí detaye tokante matrimonio. Lei a permití poligamia, esta, ku un hòmber por tabatin mas ku ún esposa. Esaki tabata un kustumber ku a eksistí asta promé ku Dios a duna Israel e Lei. Loke Yehova a hasi tabata regulá e práktika di poligamia pa protehá hende muhé i mucha di maltrato. Por ehèmpel, si un israelita a kasa ku un esklabo i despues a tuma un esposa mas, e mester a sigui perkurá pa e nesesidatnan físiko, material i emoshonal di su promé esposa. Dios a rekerí pa e esposo sigui protehá i kuida su promé esposa. (Éks. 21:9, 10) Aunke nos no ta bou di Lei di Moises, e ta yuda nos mira kon presioso matrimonio ta pa Yehova. Esei sigur ta motivá nos pa onra matrimonio!

7, 8. (a) Segun Deuteronomio 24:1, kiko Lei di Moises a bisa tokante divorsio? (b) Kiko ta Yehova su punto di bista di divorsio?

⁷ Kiko Lei di Moises a bisa di divorsio? Dios a sigui mira matrimonio komo algu presioso. Aunke no tabata Yehova su intenshon pa un pareha divorsiá, Lei a permití un hòmber israelita divorsiá for di su esposa si “el a haña algu indesente den dje.” (Lesa Deuteronomio 24:1.) E Lei di Moises no a deskribí kiko por ser konsiderá komo “algu indesente.” Sinembargo, esei lo mester tabata algu bergonsoso òf serio, no algu insignifikante. (Deu. 23:14) Lamentablemente, den tempu di Hesus ya hopi israelita tabata divorsiá “pa kualke motibu.” (Mat. 19:3) Esei no ta un aktitut ku nos ke imitá.

⁸ Profeta Malakías a revelá Dios su punto di bista di divorsio. Den tempu di Malakías tabata masha komun pa un hòmber “trata e esposa di su hubentut ku traishon” i divorsiá for di dje kisas pa kasa ku un muhé mas yòn ku no tabata adorá Dios. Profeta Malakías a ekspresá Dios su punto di bista ora el a bisa: “Mi ta odia divorsio.” (Mal. 2:14-16) Esei a kuadra ku loke Dios a bisa tokante e promé matrimonio, esta: “[Un hòmber] lo uni ku su esposa. I nan lo bira ún karni.” (Gén. 2:24) Hesus tin e mesun punto di bista ku su Tata tin di matrimonio. Kon nos sa esei? Pasobra Hesus a bisa: “No laga ningun hende separá loke Dios a uni bou di un yugo.”—Mat. 19:6.

9. Kon nos tin ku komprondé e palabranan di Hesus na Marko 10:11, 12?

⁹ Kisas algun hende ta puntra: ‘Tin un base bíbliko ku ta permití un kristian divorsiá i bolbe kasa?’ Wèl, laga nos wak kiko Hesus a bisa: “Ken ku divorsiá di su esposa i kasa ku un otro muhé ta kometé adulterio kontra su esposa, i si un muhé, despues ku e  divorsiá di su esposo, kasa ku un otro hòmber, e muhé ta kometé adulterio.” (Mar. 10:11, 12; Luk. 16:18) Pues, ta bisto ku Hesus a onra matrimonio i e tabata ke pa otro hende tambe hasi meskos. Si un persona divorsiá di su kasá inosente i kasa atrobe, e persona ei ta kometé adulterio. Dikon? Pasobra den bista di Dios, ainda nan dos ta “ún karni.” Nan matrimonio no a terminá djis pasobra nan a divorsiá. Es mas, Hesus a bisa ku ora un hòmber divorsiá su esposa inosente, esei lo pone e esposa den peliger di kometé adulterio. Kon asina? Den tempu di Hesus, un esposa divorsiá por a sinti ku e mester a kasa atrobe pa e por haña sosten finansiero. Pero, si e esposa a hasi esaki, lo el a kometé adulterio.

10. Kiko ta e úniko base pa divorsio ku ta permití un persona bolbe kasa?

¹⁰ Hesus a menshoná e úniko base pa divorsio. El a bisa: “Mi ta bisa boso ku ken ku divorsiá di su esposa i kasa ku un otro muhé—si no ta pa motibu ku e esposa a kometé fornikashon [na griego, pornéia]—ta kometé adulterio.” (Mat. 19:9) El a bisa algu similar den su Sermon Riba Seru. (Mat. 5:31, 32) Na tur dos okashon Hesus a papia di fornikashon, esta, inmoralidat seksual. E ekspreshon ei ta inkluí vários tipo di relashon seksual pafó di matrimonio, entre otro: adulterio, prostitushon, relashon seksual entre hende ku no ta kasá, homoseksualidat i relashon seksual ku bestia. Pues, si un esposo kometé inmoralidat seksual, su esposa por disidí si e ta divorsiá for di dje òf nò. Si e disidí di divorsiá, esei lo terminá e matrimonio den bista di Dios.

11. Dikon un kristian por skohe pa keda kasá aunke e tin base bíbliko pa divorsiá?

¹¹ Tuma nota ku Hesus no a bisa ku si un persona kasá kometé inmoralidat seksual (pornéia), e kasá inosente mester divorsiá. Por ehèmpel, un esposa lo por skohe pa keda kasá aunke e esposo a kometé inmoralidat seksual. Dikon? Kisas ainda e esposa ta stima su esposo i ta dispuesto pa pordon’é i traha riba nan matrimonio. Ademas, si e esposa skohe pa divorsiá pero keda sin bolbe kasa, e por hañ’é ku sierto difikultat. Por ehèmpel, kiko di su nesesidatnan material i  seksual? Lo e tin ku lucha ku soledat? Kon e divorsio lo afektá su yunan? E divorsio lo hasié mas difísil pa e lanta su yunan den e bèrdat? (1 Kor. 7:14) Pues, ta klaru ku e kasá inosente ku skohe pa divorsiá lo hañ’é ku difikultat.

12, 13. (a) Kiko a sosodé den e matrimonio di Oséas? (b) Dikon Oséas a tuma Gomer bèk, i kiko esei ta siña nos tokante matrimonio awe?

¹² E eksperensia di profeta Oséas ta siña nos hopi tokante e manera ku Dios ta mira matrimonio. Yehova a bisa Oséas pa kasa ku un muhé ku yama Gomer. Gomer lo a bira “un esposa prostituta” i lo a “haña yunan di prostitushon.” Gomer “a konsebí i a haña un yu hòmber [pa Oséas].” (Osé. 1:2, 3) Mas despues, el a haña un yu muhé i un yu hòmber mas, probablemente ku un otro hòmber. Aunke Gomer a kometé adulterio vários biaha, Oséas a keda kasá kuné. Finalmente, Gomer a bandoná Oséas i a bira un esklabo. Tòg, Oséas a kumpr’é bèk. (Osé. 3:1, 2) Yehova a usa e eksperensia di Oséas pa ilustrá kuantu bes Yehova a pordoná Israel apesar ku nan tabata infiel na dje i a adorá otro dios. Kiko nos por siña for di e matrimonio di Oséas?

¹³ Si un kristian kometé inmoralidat seksual, e esposo òf esposa inosente lo tin ku tuma un desishon. Hesus a bisa ku e kasá inosente lo tin base pa divorsiá i lo ta liber pa kasa atrobe. Di otro banda, e esposo òf esposa inosente por skohe pa pordoná su kasá. No tin nada malu den esei. Oséas a tuma Gomer bèk. Unabes ku Gomer tabata bèk huntu ku Oséas, Gomer no tabatin mag di tene relashon seksual ku ningun otro hòmber. Oséas “no a tene relashon seksual” ku Gomer pa un tempu. (Osé. 3:3, nota, NW) Pero, despues Oséas lo mester a bolbe tene relashon seksual ku Gomer. Esaki a mustra kon dispuesto Dios tabata pa aseptá e israelitanan bèk i sigui tin amistat ku nan. (Osé. 1:11; 3:3-5) Kiko esaki ta siña nos tokante matrimonio awe? Si un esposo òf esposa inosente kuminsá tene relashon seksual atrobe ku su kasá ku a kometé inmoralidat seksual, esei lo ta prueba ku e kasá inosente a pordoná su kasá. (1 Kor. 7:3, 5) E ora ei lo no tin base mas pa divorsio. For di e momento ei, nan tur dos mester hasi esfuerso pa mira matrimonio manera Yehova ta mir’é.

14. Segun 1 Korintionan 7:10, 11, kiko por pasa den un matrimonio?

¹⁴ Tur kristian mester hasi esfuerso pa onra matrimonio, meskos ku Yehova i Hesus ta onra matrimonio. Pero imperfekshon ta pone ku algun hende no ta onra matrimonio. (Rom. 7:18-23) Pues, no mester sorprendé nos ku algun kristian den promé siglo tabatin problema matrimonial. Pablo a skirbi ku “un esposa no mester separá di su esposo.” Pero, tabatin biaha ku esei a sosodé.—Lesa 1 Korintionan 7:10, 11.

15, 16. (a) Ki meta tur pareha mester tin ora surgi problema den nan matrimonio, i dikon? (b) Kon esaki ta apliká na un kristian ku ta kasá ku un hende ku no ta sirbi Yehova?

¹⁵ Pablo no a splika kiko a pone e parehanan separá di otro. E problema no tabata, por ehèmpel, ku e esposo a kometé inmoralidat seksual i asina a duna e esposa base pa divorsiá i bolbe kasa. Pablo a skirbi ku e esposa ku separá for di su esposo mester “keda sin kasa, òf si no, . . . hasi bon ku su esposo.” Pues, den bista di Dios, e pareha tabata kasá ainda. Pablo a bisa ku sin importá ki problema un pareha por tin, si ningun di nan no a kometé inmoralidat seksual, nan meta mester ta pa rekonsiliá ku otro, esta, resolvé nan problemanan i keda huntu. E pareha por buska yudansa serka ansiano. E ansianonan lo no tuma parti pa niun di nan dos; mas bien, nan lo duna e pareha konseho práktiko for di Beibel.

 ¹⁶ Awor, kiko si un kristian ta kasá ku un hende ku no ta sirbi Yehova? Ora problema presentá den nan matrimonio, nan tin mag di separá for di otro? Manera a ser menshoná kaba, Beibel ta bisa ku inmoralidat seksual ta e úniko base pa divorsio. Pero Beibel no ta menshoná pa ki motibu un pareha por separá. Pablo a bisa: “Si un muhé tin un esposo ku no ta kreyente i tòg e esposo ta di akuerdo pa biba kuné, lag’é no bandoná su esposo.” (1 Kor. 7:12, 13) Esaki ta apliká pa nos awe tambe.

17, 18. Dikon algun kristian a disidí di keda kasá aunke e situashon tabata difísil?

¹⁷ Ta bèrdat ku tabatin algun kaso den kua un “esposo ku no ta kreyente” a mustra ku e no “ta di akuerdo pa biba” ku su esposa. Kisas e ta abusá físikamente di su esposa te na e punto ku e esposa ta sinti ku su salú òf su bida ta na peliger. Kisas e ta nenga di perkurá materialmente pa su esposa i su famia òf ta pone spiritualidat di su esposa na peliger. Den e kasonan ei, un esposa kristian por haña ku no ta ked’é nada otro ku separá for di su esposo, apesar di loke e esposo ta bisa, pasobra e esposo no “ta di akuerdo pa biba kuné.” Di otro banda, algun kristian ku tabata pasa den situashon similar a skohe pa keda ku nan kasá. Nan a perseverá i a purba di drecha nan matrimonio. Dikon?

¹⁸ Wèl, si den un situashon asina, e pareha disidí di separá, nan lo ta kasá ainda i tur dos lo tin e difikultatnan ku a ser menshoná anteriormente. Apòstel Pablo a duna un otro motibu pa un esposo i esposa keda huntu. El a skirbi: “E esposo ku no ta kreyente ta keda santifiká debí na su esposa, i e esposa ku no ta kreyente ta keda santifiká debí na e ruman hòmber; si no ta asina, boso yunan lo ta impuru, ma awor nan ta santu.” (1 Kor. 7:14) Hopi kristian a disidí pa keda ku nan kasá ku no ta sirbi Yehova aunke e situashon tabata difísil. Nan tabata masha kontentu ku nan a hasi e sakrifisionan ei pasobra despues nan kasá a bira Testigu di Yehova.—Lesa 1 Korintionan 7:16; 1 Ped. 3:1, 2.

19. Dikon tin hopi matrimonio eksitoso den e kongregashon kristian?

¹⁹ Hesus a duna konseho tokante divorsio i apòstel Pablo, bou di inspirashon, a duna konseho tokante separashon. Nan tur dos tabata ke pa e sirbidónan di Yehova onra matrimonio. Awendia, den hopi kongregashon rònt mundu, tin matrimonio eksitoso. Probablemente tin hopi pareha felis den bo kongregashon. E esposonan ta stima nan esposa i e esposanan ta respetá nan esposo. Nan tur ta duna prueba ku nan ta onra matrimonio. I nos por ta kontentu ku miónes di esposo i esposa ta demostrá ku e palabranan akí di Dios ta bèrdat: “Pa e motibu akí un hòmber lo bandoná su tata i su mama i keda ku su esposa, i nan dos lo bira ún karni.”—Efe. 5:31, 33.