1, 2. Kon David a mustra ku e tabata leal na Dios? (Wak e promé plachi.)

REI Saul i 3.000 sòldá tabata den desierto di Hudea en buska di David pa mata. Pero un anochi, ora nan tur tabata morto na soño, David i Abisai a logra pasa meimei di e sòldánan i a haña Saul. Abisai a flùister David: “Laga mi peg’é den tera ku e lansa, den ún hinká; i lo mi no tin mester di hasié pa di dos biaha.” Pa straño ku por parse, David a bis’é: “No mat’é, pasobra ken por saka su man kontra SEÑOR su ungí i keda sin kulpa? . . . SEÑOR warda mi di saka mi man kontra SEÑOR su ungí.”—1 Sam. 26:8-12.

² David a komprondé kiko e mester a hasi pa ta leal na Yehova. E no kier a mata Saul pasobra ta Dios mes a ungié komo rei di Israel. Awe, meskos ku den pasado, Yehova ke pa su sirbidónan ta leal na dje i mustra rèspèt na hende ku el a duna outoridat.—Lesa Mikéas 6:8. *

3. Kon Abisai a demostrá lealtat na David?

 ³ Abisai tabatin rèspèt pa David. Por ehèmpel, despues ku David a bira rei, el a kometé adulterio ku Bètsabé i a purba di tapa e piká grave akí. El a pidi Joab, ruman di Abisai, pa sòru di laga Urías, kasá di Bètsabé, muri den bataya. (2 Sam. 11:2-4, 14, 15; 1 Kró. 2:16) Kisas Abisai lo tabata sa algu di e asuntu, pero tòg el a sigui respetá David pasobra David tabata e rei ungí di Dios. Ademas, nunka Abisai no a usa su poder komo komandante militar pa hasi su mes rei. En bes di esei, el a sirbi David i a defend’é kontra di su enemigunan.—2 Sam. 10:10; 20:6; 21:15-17.

4. (a) Dikon David ta un bon ehèmpel di un persona leal? (b) Kiko nos lo trata den e artíkulo akí?

⁴ E echo ku David a nenga di mata Rei Saul a demostrá ku e tabata un sirbidó leal di Yehova. Tempu ku David tabata yòn, yen di kurashi el a enfrentá Goliat, e gigante filisteo, kende a tribi di “reta e ehérsitonan di e Dios bibu.” (1 Sam. 17:23, 26, 48-51) Despues ku David a bira rei i a kometé adulterio i asesinato, el a aseptá disiplina for di profeta Natan i a arepentí. (2 Sam. 12:1-5, 13) Durante su behes, el a sigui demostrá lealtat na Dios. Por ehèmpel, el a hasi kontribushonnan generoso pa e konstrukshon di e tèmpel di Yehova. (1 Kró. 29:1-5) Ta bèrdat ku el a kometé erornan grave, pero semper el a keda leal na Yehova. (Sal. 51:4, 10; 86:2) Den e artíkulo akí nos lo analisá e ehèmpel di David i otro hende ku tabata biba den su tempu. Nos lo haña kontesta riba e siguiente preguntanan: Na ken nos mester ta leal promé? Ki kualidatnan nos mester tin pa desplegá lealtat?

5. Ki lès nos ta saka for di e eror ku Abisai a kometé?

⁵ Ora Abisai kier a mata Rei Saul den e kampamentu, su intenshon tabata di ta leal na David. Pero David a par’é, pasobra el a realisá ku ta robes pa hasi daño na e ungí di Yehova. (1 Sam. 26:8-11) Esei ta siña nos un lès importante: No tin nada malu den ser leal na mas ku ún persona, pero pa nos sa na ken nos mester ta leal promé, nos mester apliká prinsipionan bíbliko.

6. Aunke ta natural pa nos ta leal na famia i amigunan, dikon nos tin ku tene kuidou?

⁶ Lealtat ta un kualidat ku ta sali for di nos kurason, pero nos kurason ta traishonero. (Yer. 17:9) Por ehèmpel, kisas nos ta sinti ku nos mester ta leal na un amigu òf famia asta ora e hasi malu. Pero si un persona ku nos ta stima bandoná Yehova, nos tin ku kòrda ku nos mester ta leal na Yehova promé.—Lesa Mateo 22:37.

7. Kon un ruman a keda leal na Yehova den un situashon difísil?

⁷ Ora un famia di nos ser ekspulsá, nos mester skohe bon na ken nos lo ta leal. Tuma por ehèmpel e kaso di Anne, ^[1] kende su mama tabata ekspulsá. Un dia e mama di Anne a bèl e i a bis’é ku e kier a bishit’é. E mama tabata kibrá pasobra e famia a nenga di papia kuné. Anne a keda hopi tristu i a primintí su mama ku lo e kontest’é via karta. Promé ku Anne a skirbi e karta, el a meditá riba algun prinsipio bíbliko. (1 Kor. 5:11; 2 Huan 9-11) Den e karta, Anne a kòrda su mama na un manera bondadoso ku ta é mes a bai laga e famia ora el a peka i a nenga di arepentí. Anne a skirbi: “E úniko manera pa aliviá e doló ei ta ora mami hala serka Yehova.”—San. 4:8.

8. Ki kualidatnan por yuda nos keda leal na Yehova?

 ⁸ E sirbidónan leal di Yehova den tempu di David a demostrá humildat, bondat i kurashi tambe. Ban wak kon e tres kualidatnan akí por yuda nos keda leal na Yehova.

9. Dikon Abner a purba di mata David?

⁹ Ora David a bai serka Rei Saul, ainda e tabatin e kabes di Goliat den su man. Tabatin por lo ménos dos hende pará einan; Jonatan, yu di Saul, ku kende el a sera un promesa di amistat, i Abner, e ofisial di ehérsito. (1 Sam. 17:57–18:3) Jonatan a keda leal na David. Pero Abner sí no. Mas despues, el a apoyá Saul ora Saul kier a mata David. De echo, David a skirbi: “Hòmbernan violento a buska mi alma.” (Sal. 54:3; 1 Sam. 26:1-5) Awor, tantu Jonatan komo Abner tabata sa ku Yehova a skohe David pa bira e siguiente rei di Israel. Dikon anto e dos hòmbernan ei a reakshoná asina diferente pa ku David? Esei ta pasobra Jonatan tabata humilde, pero Abner no. Despues di morto di Saul, Abner no a apoyá David. En bes di esei, el a purba di hasi Saul su yu Is-boset rei. Mas despues, probablemente Abner mes kier a bira rei, i kisas ta p’esei el a tene relashon ku e konkubina di Rei Saul.—2 Sam. 2:8-10; 3:6-11.

10. Dikon nos por bisa ku Absalon no tabata leal na Dios?

¹⁰ Absalon, yu di Rei David, tampoko no tabata leal na Dios, pasobra e no tabata humilde. E kier a bira rei, i p’esei el a buska “un garoshi ku kabai i sinkuenta hòmber pa kore su dilanti.” (2 Sam. 15:1) Ademas, el a konvensé hopi israelita pa bira leal na dje. I meskos ku Abner, Absalon tambe a purba di mata David, maske e tabata sa ku ta Yehova a nombra David komo rei di Israel.—2 Sam. 15:13, 14; 17:1-4.

11. Kiko nos por siña for di e ehèmpelnan di Abner, Absalon i Baruk?

¹¹ E ehèmpelnan di Abner i Absalon ta mustra bon kla ku ambishon fásilmente por pone un persona bira desleal na Dios. Klaru ku niun fiel sirbidó di Yehova lo no ke imitá e aktitut malbado i egoista ei. Pero e deseo pa gana hopi plaka òf haña un karera prestigioso den e mundu akí tambe por daña nos relashon ku  Yehova. Pa un tempu, Baruk, e sekretario di profeta Yeremías, tabata ke algu ku e no tabatin i no tabata sirbi Yehova mas ku goso. Beibel no ta bisa ta kiko e tabata buska, pero Yehova a yud’é mira e peliger i a dun’é e mensahe akí: “Mira, loke mi a edifiká mi ta bai basha abou, i loke mi a planta mi ta bai ranka, esta, henter e tera. Ma abo, bo ta buska kosnan grandi pa bo mes? No buska eseinan.” (Yer. 45:4, 5) Baruk a skucha di Yehova. Nos tambe mester hasi esei, pasobra un bes akí Yehova ta bai destruí e mundu malbado akí.

12. Dikon nos no por ta leal na Yehova ora nos ta bai tras di deseonan egoista?

¹² Daniel, un ruman di México, mester a disidí na ken e ta keda leal. E kier a kasa ku un mucha muhé ku no tabata sirbi Yehova. Daniel a bisa: “Mi a sigui skirbi e mucha muhé asta despues ku mi a bira pionero.” Pero na un dado momento Daniel a realisá ku si e bai tras di su deseonan egoista, e no ta demostrá lealtat na Yehova ni mustra humildat. P’esei el a disidí di papia ku un ansiano tokante e asuntu. Daniel a sigui bisa: “El a yuda mi mira ku si mi ke keda leal na Yehova, mi mester a stòp di skirbi e mucha muhé. Despues di hopi orashon i yoramentu, mi a stòp. I no a dura muchu ku mi a kuminsá disfrutá mas di sirbishi.” Despues di tempu, Daniel a kasa ku un bon mucha muhé kristian, i awor e ta sirbi komo superintendente di sirkuito.

13. Kon Natan a demostrá lealtat tantu na Dios komo na David ora David a peka?

¹³ Lealtat na Yehova ta yuda nos demostrá lealtat na otro hende. Por ehèmpel, profeta Natan tabata leal na Yehova, pero e tabata leal na David tambe. Despues ku David a kometé adulterio i sòru pa kasá di Bètsabé muri den bataya, Yehova a manda Natan pa disipliná David. E profeta a obedesé Yehova, i ku kurashi el a bai serka David. Pa yuda David mira gravedat di su pikánan, Natan a usa takto i a papia bondadosamente kuné. El a konta David un ilustrashon di un hòmber riku ku a kue e úniko lamchi di un hòmber pober. Ora David a tende esei, el a rabia masha pisá pa loke e hòmber riku a hasi. Natan a bis’é: “Ta abo ta e hòmber!” E ora ei David a kapta e punto.—2 Sam. 12:1-7, 13.

14. Kon bo por demostrá lealtat tantu na Yehova komo na otro hende?

 ¹⁴ Di mes manera, bondat por yuda nos demostrá lealtat tantu na Yehova komo na otro hende. Por ehèmpel, kisas bo tin prueba ku un ruman a kometé un piká serio. Podisé bo ta sinti ku bo mester ta leal na dje, spesialmente si e ta famia òf un bon amigu di bo. Pero si bo tapa e mal echo, lo bo no ta leal na Yehova. Klaru ku nos mester ta leal na Yehova promé. P’esei, meskos ku Natan, na un manera bondadoso pero firme, bo mester bisa e persona pa e buska yudansa serka e ansianonan mas pronto posibel. Si e no hasi esei, bo mes mester bisa e ansianonan. Asina bo ta demostrá lealtat na Yehova i a la bes bo ta mustra bondat na e persona, ya ku e ansianonan lo yud’é drecha su relashon ku Yehova ku kariño i pasenshi.—Lesa Levítiko 5:1; Galationan 6:1.

15, 16. Dikon Husai tabatin mester di kurashi pa ta leal na Dios?

¹⁵ Husai, un amigu di David, tabatin mester di kurashi pa e por tabata na leal na Yehova i David. Su lealtat a ser poné na prueba ora ku Absalon a haña apoyo di hopi israelita i kier a hasi su mes rei. (2 Sam. 15:13; 16:15) David a hui for di e stat, pero kiko Husai a hasi? El a bandoná David i apoyá Absalon? Nò. Maske David tabata un rei di edat avansá i tabata hui pa su bida, Husai a keda leal na dje komo e rei ungí di Yehova, i p’esei Husai a bai kontr’é riba Seru di Oleifi.—2 Sam. 15:30, 32.

¹⁶ David a pidi Husai pa bai Herúsalèm bèk pa hasi komo si fuera e ta amigu di Absalon i asina bruha e konseho di Ahitofel. Husai a riska su bida i a hasi loke David a pidié. Asina el a demostrá ku e tabata leal na Yehova. Anto manera David a pidi den orashon, Absalon a skucha e konseho di Husai en bes di e konseho di Ahitofel.—2 Sam. 15:31; 17:14.

17. Dikon nos mester tin kurashi pa ta leal?

¹⁷ Nos mester tin kurashi pa ta leal na Yehova. Hopi di nos ta demostrá ku nos ta leal na Yehova debí ku nos ta para firme ora famia, kolega di trabou òf gobièrnu pone preshon riba nos pa desobedes’é. Por ehèmpel, for di chikitu, Taro, un ruman di Hapon, tabata obedesé su mayornan i tabata leal na nan. E no tabata hasi esei djis pasobra e tabata obligá di hasié, sino pasobra e tabata ke hasi su mayornan kontentu. Pero ora el a kuminsá studia Beibel ku Testigunan di Yehova, su mayornan no a keda niun tiki kontentu i kier a stòp e. Esaki a duel e i tabata difísil pa bisa su mayornan ku el a disidí di asistí na e reunionnan. Taro a bisa: “Nan a rabia asina tantu ku pa hopi aña nan a prohibí mi di bishitá nan na kas. Mi a pidi Yehova pa duna mi kurashi pa mi no kambia mi desishon. Awor nan aktitut a kambia, i mi por bishitá nan regularmente.”—Lesa Proverbionan 29:25.

18. Kon e artíkulo akí a yuda bo?

¹⁸ Meskos ku David, Jonatan, Natan i Husai, nos tambe por sinti gran satisfakshon ora nos ta leal na Yehova. Di otro banda, hamas nos lo ke ta manera Abner i Absalon, kendenan no a demostrá lealtat. Laga nos semper keda leal na Yehova meskos ku David. Komo ku nos ta imperfekto, nos ta faya, pero nos por mustra Yehova ku ser leal na dje ta e kos di mas importante den nos bida.