1. Durante historia, kiko e sirbidónan di Yehova tabata dispuesto pa hasi?

 SIN duda, bo ta stima Yehova masha tantu, i no ta abo so. Semper tabatin hende ku ta stima Yehova. (Sal. 104:​33, 34) Hopi di nan tabata dispuesto pa hasi sakrifisio pa sirbi Yehova. Esei ta loke e nazareonan den tempu di Israel a hasi. Pero, ken e nazareonan tabata i kiko nos por siña for di nan?

2. (a) Ken e nazareonan tabata? (Numbernan 6:​1, 2) (b) Dikon algun israelita tabata ke bira nazareo?

² E palabra “nazareo” ta bini di un término hebreo ku por nifiká “apartá pa,” “separá pa” òf “dediká na.” Un nazareo tabata un israelita fiel ku a hasi sierto sakrifisio pa sirbi Yehova. Bou di Lei di Moises, tantu un hòmber komo un muhé por a hasi un promesa solèm na Yehova pa biba komo nazareo durante un tempu. a (Lesa Numbernan 6:​1, 2.) Ora un israelita a hasi e promesa solèm ei, e mester a tene su mes na sierto rekisitonan ku sobrá israelita no mester a tene na dje. Pero, dikon anto un israelita lo kier a bira un nazareo? Muy probablemente ta su amor pa Yehova i gratitut pa Yehova su regalonan a motiv’é.—Deu. 6:5; 16:17.

3. Den ki sentido Yehova su pueblo awe ta meskos ku e nazareonan?

³ Ora “lei di Kristu” a remplasá Lei di Moises, niun sirbidó  di Dios no por a bira nazareo mas. (Gal. 6:2; Rom. 10:4) Pero, meskos ku e nazareonan, Yehova su pueblo awe ta sigui demostrá un gran deseo pa sirbi Yehova ku henter nan kurason, alma, mente i forsa. (Mar. 12:30) Nos ta hasi un promesa solèm pa sirbi Yehova ora nos dediká nos mes na dje. Pa nos kumpli ku e promesa ei, nos mester hasi Yehova su boluntat i hasi sakrifisio pa sirbié. Nos ta bai wak kon e nazareonan a kumpli ku nan promesa i kon nan ehèmpel por yuda nos kumpli ku nos promesa. b—Mat. 16:24.

SEA DISPUESTO PA HASI SAKRIFISIO

4. Segun Numbernan 6:3 i 4, ki sakrifisio e nazareonan tabata hasi?

⁴ Lesa Numbernan 6:​3, 4. Un nazareo no tabatin mag di bebe alkohòl ni kome nada di loke mata di wendrùif produsí, manera drùif i rasenchi. Otro israelita por a bebe alkohòl i kome drùif i rasenchi sin niun problema. Beibel mes ta menshoná ku biña ta un regalo di Dios i “ta hasi hende su kurason kontentu.” (Sal. 104:​14, 15) Pero, e nazareonan tabata dispuesto pa sakrifiká e kosnan dushi ei. c

5. Ki sakrifisio Madián i Marcela a skohe pa hasi, i dikon?

⁵ Meskos ku e nazareonan, nos tambe ta hasi sakrifisio pa hasi mas pa Yehova. Wak e ehèmpel di Madián i Marcela. d E pareha ei tabatin un bida konfortabel. Madián tabatin un bon trabou, i nan tabata biba den un apartamento bunita. Pero, nan kier a hasi mas den Yehova su sirbishi. Pa logra esei, nan a disidí di hasi algun ahuste. Nan a bisa: “Nos a kuminsá baha nos gastunan. Nos a bai biba den un apartamento mas chikitu i nos a bende nos outo.” Niun hende a forsa Madián i Marcela pa hasi e sakrifisionan ei. Di nan mes nan a hasi eseinan pa asina nan por hasi mas pa Yehova. Nan ta satisfecho i felis ku e desishonnan ku nan a tuma.

6. Dikon nos ta hasi sakrifisio? (Wak e plachi.)

 ⁶ Komo sirbidónan di Yehova, nos gusta hasi sakrifisio pa asina nos por hasi mas pa Yehova. (1 Kor. 9:​3-6) Yehova no ta eksigí pa nos hasi e sakrifisionan ei; i e kosnan ku nos a sakrifiká no ta malu. Por ehèmpel, tin ruman a sakrifiká un trabou ku nan a gusta, un kas òf asta un maskota. Hopi ruman a disidí di keda soltero òf pa no haña yu mesora despues ku nan kasa. Otro ruman a skohe pa muda bai kaminda tin mester di mas predikadó, asta si esei a nifiká ku nan mester biba leu for di nan famia. Hopi di nos ta dispuesto pa hasi e tipo di sakrifisionan ei pasobra nos ke duna Yehova lo mihó di nos. Nos por tin sigur ku Yehova ta apresiá masha hopi mes kualke sakrifisio, sea grandi òf chikitu, ku nos hasi pa sirbié.—Heb. 6:10.

TIN KURASHI PA TA DIFERENTE

7. Dikon por tabata difísil pa un nazareo kumpli ku su promesa? (Numbernan 6:5) (Wak e plachi.)

⁷ Lesa Numbernan 6:5. Un nazareo a primintí ku lo e no kòrta su kabei. Asina ei e tabata mustra ku el a someté su mes kompletamente na e boluntat di Yehova. Si un israelita tabata un nazareo pa un tempu largu, su kabei lo a krese hopi i lo a hala atenshon. Si hende rònt di dje tabata apoy’é, esei lo no tabata niun problema. Pero, ta tristu pa bisa ku tabatin periodonan ku israelitanan no a respetá ni apoyá e nazareonan. Por ehèmpel, durante tempu di Profeta Ámos, algun israelita apóstata “a keda duna e nazareonan biña pa bebe.” Kisas nan tabata hasi esei pa purba di pone e nazareonan kibra nan promesa. (Ámos 2:12) Tin biaha, tabata rekerí hopi kurashi pa un nazareo ta diferente i kumpli ku su promesa.

8. Kon Benjamin su eksperensia a animá bo?

⁸ Ku Yehova su yudansa, nos tambe, por tin kurashi pa ta diferente asta si di naturalesa nos ta tímido. Wak loke a pasa ku Ruman Benjamin. E tin 10 aña i ta biba na Noruega. Debí na e guera na Ukrania, su skol a tene un evento pa mustra nan sosten na Ukrania. E muchanan mester a bin bistí na e kolónan nashonal di Ukrania i kanta un kantika. Pa evitá di partisipá na e evento ei, Benjamin a plania pa para na un distansia. Pero, un yùfrou a mir’é i a bisa na bos haltu: “Bini aki aworakí. Ta riba bo nos ta warda!” Benjamin a tuma un kurashi i a bisa e yùfrou: “Mi ta neutral i no  ta partisipá den kos polítiko. De echo, hopi Testigu di Yehova ta den prizòn pasobra nan a nenga di bai guera.” E yùfrou a aseptá su splikashon i a bis’é ku e no tin nodi di partisipá den e evento. Pero, e muchanan den su klas a kuminsá puntr’é dikon e no a djòin nan. Benjamin tabata asina nèrvioso ku el a hera di kuminsá yora. Pero ku kurashi el a ripití na henter e klas loke el a bisa e yùfrou. Despues, Benjamin a konta su mayornan ku el a sinti ku Yehova a yud’é defendé su fe.

9. Kon nos por hasi Yehova su kurason kontentu?

⁹ Ora nos skohe pa obedesé Yehova, hende rònt di nos lo ripará ku nos ta diferente. Nos mester di kurashi pa bisa hende na trabou òf skol ku nos ta Testigu di Yehova. Anto, segun aktitut i kondukta di mundu ta bai di malu pa pió, chèns ta grandi ku lo bira mas difísil pa biba segun prinsipio di Beibel i pa prediká. (2 Tim. 1:8; 3:13) Pero semper kòrda ku nos ta “hasi [Yehova su] kurason kontentu” ora nos tin kurashi pa ta diferente for di hende ku no ta sirbié.—Pro. 27:11; Mal. 3:18.

PONE YEHOVA NA PROMÉ LUGÁ

10. Dikon por tabata difísil pa e nazareonan kumpli ku e mandamentu na Numbernan 6:6 i 7?

¹⁰ Lesa Numbernan 6:​6, 7. Un nazareo no tabatin mag di yega serka di un kurpa morto. Esei lo tabata un reto p’e, foral ora un famia yegá a muri. Dikon? E tempu ei, tabata kustumber pa yega serka di e kurpa morto. (Huan 19:​39, 40; Echo. 9:​36-40) Pero un nazareo no por a sigui e kustumbernan ei. Asta durante tempu di hopi tristesa, un nazareo a sigui kumpli su promesa. Esei a mustra ku e tabatin fe fuerte. Sin duda, Yehova a duna e nazareonan forsa pa trata ku situashonnan difísil asina.

11. Kiko nos mester ta desididu pa hasi ora ta trata asuntu di famia? (Wak e plachi.)

¹¹ Nos ta tuma nos dedikashon na Yehova masha na serio. Esei ta bisto den loke nos ta disidí i loke nos ta hasi ora ta trata asuntu di famia. Nos ta hasi esfuerso pa pèrkurá p’e nesesidatnan di nos famia, pero hamas nos lo pone deseo di nos famia riba loke Yehova ta pidi nos. (Mat. 10:​35-37; 1 Tim. 5:8) Tin biaha,  pa agradá Yehova kisas nos tin ku tuma desishon ku nos famia lo no keda masha kontentu kuné.

12. Ora Alexandru a hañ’é ku un situashon difísil den famia, kiko el a hasi i kiko e no a hasi?

¹² Wak e ehèmpel di Alexandru i su kasá Dorina. Despues ku nan a studia Beibel un aña komo pareha, Dorina a disidí di stòp, anto e tabata ke pa Alexandru tambe stòp. Pero, Alexandru a usa takto i na un manera hopi kalmu el a bis’é ku e sí ta sigui. Esei no a kai den bon tera serka Dorina. El a purba tur manera pa oblig’é stòp di studia. Alexandru a purba di komprondé dikon Dorina tabata hasi asina, pero esei no tabata fásil. Tin biaha ora Dorina tabata kritik’é òf papia brutu kuné e tabata haña gana di stòp e estudio. Pero, Alexandru a sigui pone Yehova na promé lugá i na mes momento mustra hopi amor i rèspèt na su kasá. Ku tempu, su ehèmpel a motivá Dorina pa kuminsá studia Beibel atrobe i aseptá e bèrdat.—Wak e vidio Alexandru ku Dorina Văcar: “Amor Tin Pasenshi i Ta Bondadoso” den e seri “E Bèrdat Ta Kambia Bida di Hende” riba jw.org.

13. Kon nos por demostrá ku nos stima Yehova i tambe mustra ku nos ta stima nos famia?

¹³ Yehova a krea famia, i e ke pa nos famia ta felis. (Efe. 3:​14, 15) Si nos ègt ke ta felis, nos tin ku hasi kos na Yehova su manera. E ta mira i ta balorá e sakrifisionan ku nos ta hasi pa sirbié miéntras nos ta kuida nos famia i ta trata nan ku amor i rèspèt.—Rom. 12:10.

ANIMÁ OTRO PA TA MANERA NAZAREO

14. Ken foral nos mester animá ku nos palabranan?

¹⁴ Nos tur ku ta skohe pa sirbi Yehova awe mester ta dispuesto pa hasi sakrifisio motivá pa nos amor pa Yehova. Tin biaha esei no ta fásil. Kon nos por yuda otro hasi sakrifisio pa Yehova? Nos por animá otro ku nos palabranan. (Yòb 16:5) Den bo kongregashon tin algun ruman ku ta purba di biba mas simpel pa asina nan por hasi mas pa Yehova? Bo konosé algun hóben ku tin kurashi pa ta diferente na skol aunke esei no ta fásil? Tin studiante di Beibel òf ruman ku ta keda fiel apesar ku nan famia ta kontra e bèrdat? Buska tur chèns pa animá nan i bisa nan kuantu bo  ta atmirá nan pa e kurashi ku nan ta mustra i e sakrifisionan ku nan ta hasi pa Yehova.—Flm. 4, 5, 7.

15. Kiko algun ruman a hasi pa yuda esnan ku ta den sirbishi di tempu kompleto?

¹⁵ Tin biaha nos por ofresé yudansa práktiko na nos rumannan ku ta den sirbishi di tempu kompleto. (Pro. 19:17; Heb. 13:16) Esei ta loke un ruman muhé di edat na Sri Lanka a hasi. Ora nan a subi su penshon, el a disidí di yuda dos ruman muhé hóben ya asina ei nan por sigui traha pionero apesar di nan situashon ekonómiko difísil. Pues, tur luna e tabata apartá un suma di sèn pa yuda nan paga nan resibu di telefòn. Ki bunita aktitut e ruman muhé di edat akí a mustra!

16. Kiko nos ta siña for di e ehèmpel di e nazareonan?

¹⁶ Sigur nos por siña hopi kos for di e ehèmpel di e nazareonan! Pero, nos por siña algu tambe tokante nos Tata den shelu, Yehova. E sa ku nos ke agrad’é i ku nos ta dispuesto pa hasi sakrifisio pa kumpli ku nos dedikashon. E ta duna nos e onor pa skohe di nos mes kon pa demostrá ku nos ta stim’é. (Pro. 23:​15, 16; Mar. 10:​28-30; 1 Huan 4:19) E ehèmpel di e nazareonan ta mustra nos ku Yehova ta mira i balorá e sakrifisionan ku nos ta hasi pa sirbié. Pues, laga nos sigui sirbi Yehova i ofres’é lo mihó di nos di henter nos kurason.