Beibel ta mustra bon kla ku Yehova por bisa loke lo bai pasa den futuro. (Isa. 45:21) Pero Beibel no ta duna tur detaye tokante kon i na ki momento Yehova ta hasi esei ni no ta splika kuantu Yehova ta skohe pa sa tokante futuro. Pues, nos no sa tur detaye tokante Yehova su kapasidat di bisa loke lo bai pasa den futuro. Pero, tin algun kos ku sí nos sa.

Yehova por hasi tur loke e ke, pero tin biaha e ta disidí di no hasi sierto kos. Yehova su sabiduria no tin límite. Pues, e por usa su sabiduria pa haña sa kiko ku e ke i bisa esei di antemano. (Rom. 11:33) Pero, komo ku Yehova por dominá su mes den tur kos, e por skohe tambe di no sa loke lo bai pasa.—Kompará Isaías 42:14.

Yehova ta sòru pa su boluntat kumpli. Kiko esei tin di haber ku Yehova su kapasidat di bisa loke lo bai pasa den futuro? Isaías 46:10 ta splika: “Mi ta anunsiá e final for di kuminsamentu. I for di hopi tempu pasá, mi a anunsiá kos ku no a sosodé ainda. Mi ta bisa: ‘Loke mi disidí lo kumpli sigur, i lo mi hasi tur loke mi ta deseá.’”

Pues, un motibu dikon Yehova por bisa òf anunsiá loke lo bai pasa den futuro ta pasó e tin e poder pa sòru pa e kosnan pasa. E no tin nodi di primi fast-forward, na moda di papia, pa wak loke lo bai pasa den futuro—komo si fuera tur kos ku lo pasa den futuro ya ta establesí i e ta djis repasá nan di antemano. Mas bien, Yehova por disidí ku sierto kos lo pasa na un tempu spesífiko i despues, ora e fecha ku el a stipulá yega, e ta sòru pa e kos pasa.—Éks. 9:​5, 6; Mat. 24:36; Echo. 17:31.

Pa e motibu akí, Beibel ta usa palabra manera “propósito” i “disidí” pa deskribí loke Yehova a hasi ku algun suseso ku lo a bai pasa den futuro. (2 Rei. 19:25; Isa. 46:11; nota) A tradusí e palabranan ei for di un palabra hebreo ku ta relashoná ku e palabra “alfarero.” (Yer. 18:4) Meskos ku un alfarero ábil por forma un klòmpi di klei den un vas bunita, Yehova por forma, òf manehá, kos pa kumpli ku su boluntat.—Efe. 1:11.

Yehova ta permití kada hende tuma nan mes desishon. E no ta determiná destino di kada hende; ni e no ta pone bon hende hasi algu ku lo hiba nan na destrukshon. E ta siña hende kon ta e mihó manera di biba, i despues e ta permití kada hende skohe kon nan ke hiba nan bida.

Wak dos ehèmpel. E promé tin di haber ku e ninivitanan. E stat di Nínive tabata saturá ku asina tantu maldat ku Yehova a profetisá ku lo e destruyé. Pero ora e habitantenan a arepentí, Yehova “a kambia di idea; e no a trese e kalamidat ku el a bisa ku lo el a trese riba nan.” (Yón. 3:​1-10) Dikon Yehova a kambia di idea? Pasó e ninivitanan a skucha e atvertensia ku Yehova a manda i a disidí di arepentí.

E di dos ehèmpel ta e profesia tokante Siro, un konkistadó ku a libra e hudiunan i ku a duna òrdu pa rekonstruí Yehova su tèmpel. (Isa. 44:26–45:4) Rei Siro di Pèrsia a kumpli ku e profesia ei. (Èsd. 1:​1-4) Sinembargo, Siro no tabata adorá e Dios berdadero. Yehova a us’é pa kumpli ku e profesia ei, pero e no a oblig’é pa sirbié.—Pro. 21:1.

Klaru ku e kosnan ku nos a trata ta djis algun kos ku Yehova ta tene kuenta kuné ora e bisa loke lo bai pasa den futuro. Pa ta sinsero, niun hende no por komprondé kompletamente Yehova su manera di pensa i di hasi kosnan. (Isa. 55:​8, 9) Pero, loke nos sa tokante Yehova ta konvensé nos ku semper lo e hasi loke ta korekto—inkluso ora e bisa loke lo bai pasa den futuro.