BO A ripará ku awe hopi hende ta kere ku nan ta masha kos i ta pensa ku nan meresé trato spesial? Anto ku ni maske kuantu trato spesial hende duna nan, ainda nan ta keda pensa ku nan meresé mas? E aktitut egoista i malagradesí ei ta presis loke Beibel a bisa ku hende lo tin den e último dianan.—2 Tim. 3:2.

Klaru ku semper tabatin hende egoista. Por ehèmpel, Ádam ku Eva a sinti ku nan tabatin e derechi di disidí pa nan mes loke ta bon i loke ta malu. I te awe nos tur ta sufri debí na nan desishon. Siglonan despues, Rei Uzías di Huda a pensa ku e tabatin derechi di ofresé sensia den e tèmpel, pero e no tabatin niun derechi di hasi esei. (2 Kró. 26:18, 19) Anto e fariseo- i e saduseonan a haña ku nan meresé un trato spesial for di Dios pasobra nan tabata desendiente di Ábraham.—Mat. 3:9.

Komo ku nos ta rondoná di hende egoista i ku ta pensa ku nan ta masha kos, sin ripará, nos por bira meskos ku nan. (Gal. 5:26) Nos por kuminsá pensa ku nos tin derecho di haña un sierto privilegio òf trato spesial. Kiko nos por hasi pa evitá e aktitut ei? E promé kos ku nos tin ku hasi ta di haña sa loke Yehova ta pensa tokante e asuntu akí. Laga nos wak dos prinsipio di Beibel.

Yehova ta esun ku ta disidí ki derecho hende mester tin. Ban wak algun ehèmpel.

•   Den famia, Yehova ke pa e esposo sinti ku su esposa ta respet’é i pa e esposa sinti ku su esposo ta stim’é. (Efe. 5:33) Yehova ta bisa ku hende kasá tin derechi di duna i haña atenshon romántiko di su kasá so i di niun otro hende mas. (1 Kor. 7:3) Mayornan tin derechi di ferwagt ku nan yunan ta obedesé nan, i yunan tin derechi di ferwagt ku nan mayornan ta kuida i stima nan.—2 Kor. 12:14; Efe. 6:2.

• Den kongregashon, e ansianonan meresé nos rèspèt pa e trabou duru ku nan ta hasi. (1 Tes. 5:12) Pero, nan no tin derechi di disidí kiko nan rumannan tin ku hasi.—1 Ped. 5:2, 3.

• Yehova a duna gobièrnu humano e derechi di eksigí belasting i onor for di e pueblo ku nan ta goberná.—Rom. 13:1, 6, 7.

Yehova stima nos mashá i ta duna nos hopi mas di loke nos tin derecho di dje. Komo hende imperfekto, e úniko kos ku nos meresé ta di muri. (Rom. 6:23) Pero debí ku Yehova tin amor leal pa nos, e ta duna nos hopi kos bon. (Sal. 103:10, 11) Kada bendishon òf privilegio ku e duna nos ta danki na su bondat inmeresí.—Rom. 12:6-8; Efe. 2:8.

Kuidou ku mundu su manera di pensa. Sin ku nos realisá, nos por kuminsá pensa ku nos meresé mas ku otro hende. Hesus a usa un ilustrashon pa splika kon lihé esei por pasa. Un doño a kontratá algun trahadó ku a bai di akuerdo pa traha henter un dia pa un denario. Segun ku dia tabata pasa, e doño a kontratá mas trahadó i algun di nan a traha djis un ora so. Ora e dia di trabou a kaba, e doño a paga tur trahadó mesun montante, inkluso esnan ku a traha pa djis ún ora so. E trahadónan ku a kuminsá traha fo’i mainta a sinti ku nan tabatin derecho di haña mas plaka pasobra nan a traha henter dia den kayente di solo. (Mat. 20:1-16) Ku e ilustrashon akí, Hesus a mustra ku su siguidónan mester keda kontentu ku loke Yehova a skohe pa duna nan.

Sea gradisidu i no eksigente. (1 Tes. 5:18) Imitá Apòstel Pablo, kende no a pidi e  rumannan na Korinto pa dun’é loke e tin mester aunke e tabatin derechi di hasi esei. (1 Kor. 9:11-14) Nos mester ta gradisidu pa tur loke nos ta haña i evitá di ta eksigente.

Sea humilde. Ora un hende ta pensa ku e ta masha kos, e tin e tendensia di pensa ku e meresé mas di loke e tin. Humildat ta loke lo yuda nos pa nunka pensa di e manera ei.

Profeta Dánièl ta un bon ehèmpel di un hende humilde. El a bini di un bon famia, e tabata inteligente, tabatin nèchi aparensia i hopi abilidat. Pues e por a pensa ku e meresé e privilegionan i trato spesial ku el a haña. (Dán. 1:3, 4, 19, 20) Pero Dánièl a keda humilde i p’esei e tabata mashá stimá i respetá pa Yehova.—Dán. 2:30; 10:11, 12, nota.

Pues aunke awendia hopi hende ta egoista i arogante, nos sí no ke ta manera nan. Kada bendishon ku Yehova ta duna nos, ta danki na su bondat inmeresí. P’esei, laga nos semper keda kontentu ku loke e ta duna nos.