1-2. (a) Ki spièrtamentu Hesus a duna su disipelnan? (b) Dikon Hesus su disipelnan a bandon’é? (Wak e plachi.)

 HESUS a bisa: “Klaru ku e spiritu tin e boluntat, ma e karni ta débil.” a (Mat. 26:41b) E palabranan ei di Hesus a mustra ku el a komprondé ku nos ta imperfekto i lo faya. Pero na mes momento el a atvertí nos ku nos mester tene kuidou pa no pone muchu konfiansa den nos mes. Un par di ora promé ku Hesus a bisa e palabranan ei, su disipelnan a bis’é ku hamas nan lo bandon’é. (Mat. 26:35) Aunke nan tabatin bon intenshon, nan no a realisá kon lihé nan lo por a sukumbí bou di preshon. Ta p’esei Hesus a spièrta nan: “Keda vigilá i hasi orashon kontinuamente pa boso no kai den tentashon.”—Mat. 26:41a.

² Kiko nan a hasi ora ku Hesus a ser arestá? Lamentablemente, komo ku nan no a vigilá, nan a kai den tentashon. E situashon a kue nan fo’i base i nan a hasi nèt loke nan a bisa ku hamas nan lo hasi: bandoná Hesus.—Mat. 26:56.

3. (a) Pa nos keda leal na Yehova, dikon nos no por pone muchu konfiansa den nos mes? (b) Kiko nos lo bai trata den e artíkulo akí?

³ Nos tampoko no por pone muchu konfiansa den nos mes. Ta bèrdat ku nos ta determiná pa no laga nada daña nos amistat ku Yehova. Pero, realidat ta ku nos ta imperfekto i fásilmente nos por kai den tentashon. (Rom. 5:12;  7:​21-23) Ònferwagt asina nos por haña nos ku un tentashon. Pa keda leal na Yehova i su Yu, nos tin ku sigui Hesus su konseho di wak bon pa nos no kai den tentashon. E artíkulo akí lo yuda nos ku esei. Promé, nos ta bai wak den ki áreanan foral nos mester ta alerta. Despues nos lo wak kon nos por evitá di kai den tentashon. I por último nos lo analisá kon pa sigui ta alerta.

ÁREANAN KU BO MESTER TA ALERTA

4-5. Dikon nos mester tene kuidou ku pikánan ku ta ménos grave?

⁴ Ta bèrdat ku no ta tur piká ta mes grave. Pero, esnan ménos grave tambe por daña nos amistat ku Yehova. Nan por asta pone nos hasi pikánan mas grave.

⁵ Nos tur ta haña nos ku tentashon. Pero, nos kada un su debilidat ta diferente for di otro. Pues, lo tin sierto kos ku lo duna un hende mas gana di hasi loke ta robes ku un otro hende. Por ehèmpel, kisas un hende ta lucha kontra e tentashon pa kometé inmoralidat seksual. Un otro ta bringa pa no hasi algu impuru, manera masturbá òf wak pornografia. I kisas otronan ta hasi esfuerso pa vense nan miedu di hende, mal karakter òf orguyo. Santiago ta bisa: “Kada hende ta ser poné na prueba ora e ser atraí i sedusí pa su mes deseo.”—Sant. 1:14.

6. Kiko nos tin ku rekonosé?

⁶ Abo sa kiko ta bo debilidatnan? Ta masha peligroso pa nos sera wowo pa nan òf pensa ku nos ta asina fuerte ku nunka nos lo faya. (1 Huan 1:8) Kòrda, Pablo a bisa ku asta esnan ku “ta spiritualmente kapasitá” por kai den tentashon si nan no keda alerta. (Gal. 6:1) Nos mester ta onesto ku nos mes i rekonosé nos debilidatnan.—2 Kor. 13:5.

7. Na kiko nos mester pone mas atenshon? Duna un ehèmpel.

⁷ Unabes nos sa kiko nos debilidatnan ta, kiko nos mester hasi? Hasi esfuerso pa resistí e gana di hasi loke ta robes. Por ehèmpel, den tempu di Beibel, e parti mas vulnerabel di e muraya di un stat ta kaminda e portanan ta. P’esei tabata stashoná mas tantu hende einan pa vigilá. Asina tambe, den nos kaso nos tin ku pone mas atenshon foral na áreanan ku nos sa ku nos ta suak den dje.—1 Kor. 9:27.

 KON PA EVITÁ DI KAI DEN TENTASHON

8-9. Kon e yònkuman por a evitá di kometé un piká serio? (Proverbionan 7:​8, 9, 13, 14, 21)

⁸ Kon nos por evitá di kai den tentashon i peka? Ban wak loke nos por siña for di e yònkuman menshoná na Proverbionan kapítulo 7. El a kometé inmoralidat seksual ku un muhé inmoral. Versíkulo 22 ta bisa nos ku “no a dura muchu” ku e yònkuman a bai tras di e muhé. Pero manera e versíkulonan anterior ta mustra, tabatin vários kos ku e yònkuman a hasi ku tiki-tiki a hib’é n’e piká ei.

⁹ Kiko tabata e kosnan ku a hib’é na piká? Pa kuminsá, poko promé ku a bira skur, el a pasa “na skina di un kaya kaminda un muhé inmoral tabata biba.” Djei, el a kana bai den direkshon di e kas di e muhé. (Lesa Proverbionan 7:​8, 9.) Despues ora el a mira e muhé, e no a bira bai. Na lugá di esei, el a para laga e muhé dun’é un sunchi i a skuch’é konta ku el a ofresé su sakrifisio di pas. Kisas e muhé a hasi esei pa laga e yònkuman kere ku e no ta mal hende. (Lesa Proverbionan 7:​13, 14, 21.) E yònkuman a hasi vários kos ku no tabata sabí. Si e no a hasi eseinan, lo el a evitá di kai den tentashon i peka.

10. Kon un ruman awe por hasi e mesun eror ku e yònkuman?

¹⁰ E relato ei ta mustra loke por pasa ku kualke un di nos. Kisas un ruman por kometé un piká serio i despues sinti ku ta gewon diripiente asina e kos a pasa. E por bisa: “Mi no sa kon m’a haña mi den e kos akí.” Pero si e tuma tempu pa pensa riba loke a pasa, lo e mira ku el a hasi algun kos ku no tabata sabí ku a hib’é na kometé e piká serio. Kisas el a skohe amigu ku no ta stima Yehova. Òf, el a skohe entretenimentu, a subi sierto website òf a bai sierto lugá ku no ta pas pa un kristian. Kisas tambe el a stòp di hasi orashon, lesa Beibel, bai reunion òf prediká. Meskos ku e yònkuman den e buki di Proverbionan, e ruman no a kometé e piká gewon diripiente asina.

11. Kiko nos tin ku hasi si nos no ke kometé un piká?

¹¹ Kiko ta e lès pa nos? Nos no mester djis evitá di kometé un piká, ma tambe evitá e kosnan ku por hiba na piká. Anto esei ta presis loke Sálomon a splika despues ku el a konta e relato di e yònkuman i e muhé inmoral. Refiriendo na e muhé, el a bisa: “No sigui un muhé asina.” (Pro. 7:25) El a bisa tambe: “Keda leu for di un muhé inmoral; no yega serka di su porta di kas.” (Pro. 5:​3, 8) Pues si bo no ke kometé un piká, bo mester “keda leu” for di tur loke ku por hiba bo na esei. b Pa logra esaki, kisas bo tin ku evitá sierto situashon òf kosnan ku no nesesariamente ta robes pa un kristian pero ku por hinka abo sí den tentashon.—Mat. 5:​29, 30.

12. Ki desishon firme Yòb a tuma, i kon esei a yud’é evitá di kai den tentashon? (Yòb 31:1)

¹² Pa nos evitá situashonnan ku por hiba nos na piká, nos tin ku hasi meskos ku Yòb. El a tuma un desishon firme. El a “sera un pakto ku [su] wowonan” pa, fuera di su esposa, nunka e wak otro muhé ku deseo seksual. (Lesa Yòb 31:1.) Yòb tabata desididu i esei lo a yud’é pa nunka kometé adulterio. Nos tambe mester ta determiná pa evitá kiko ku ta ku por hinka nos den tentashon.

13. Dikon nos tin ku tene kuidou ku loke nos ta pensa? (Wak e plachi.)

 ¹³ Tambe nos tin ku tene kuidou ku loke nos ta pensa riba dje. (Éks. 20:17) Tin hende ta kere ku no tin nada malu den fantasiá riba kos robes tanten ku no hasi nan. Pero nan ta mal kiboká. Mas un hende pensa riba algu robes, mas gana lo e haña pa hasié. Den un sentido, e ta kobando un buraku pa su mes i djei paga tinu pa e no kai den dje. Klaru ku tin biaha, gewon asina, kosnan robes ta bini na nos mente. Ki nos tin ku hasi e ora ei? Rechasá nan mesora i remplasá nan ku pensamentunan bon. Asina ei nos ta evitá ku pensamentunan robes ta krese bira deseonan fuerte ku ta difísil pa resistí i ku por asta hiba nos na kometé un piká grave.—Flp. 4:8; Kol. 3:2; Sant. 1:​13-15.

14. Kiko mas lo yuda nos pa no kai den tentashon?

¹⁴ Pa evitá di kai den tentashon, nos mester ta kompletamente konvensí ku si nos obedesé Yehova su leinan, semper lo bai bon ku nos. Tin biaha ta difísil pa nos logra pone nos pensamentu- i deseonan kuadra ku loke Yehova ta ferwagt di nos. Pero e pas ku nos lo sinti ta pone ku e esfuerso ta bale pa pena.

15. Dikon ta importante pa nos tin un deseo fuerte pa hasi loke ta korekto?

¹⁵ Nos mester tin un deseo fuerte pa hasi loke ta korekto i pa siña “odia loke ta malu, i stima loke ta bon.” (Ámos 5:15) Si nos hasi esei, nos lo ta mas determiná pa hasi loke ta korekto i evitá situashonnan ku por pone nos peka. Ademas, nos lo tin mas forsa pa resistí tentashonnan ku kisas ta presentá den situashonnan ku nos no a ferwagt òf no por a evitá.

16. Kon aktividatnan spiritual por yuda nos keda alerta? (Wak e plachi.)

¹⁶ Ki nos tin ku hasi pa nos tin un deseo fuerte pa hasi loke ta korekto? Keda okupá ku aktividatnan ku ta yuda nos stima Yehova mas. Ora nos ta na Salòn òf  den sirbishi, nos ta bezig ta fortalesé nos amistat ku Yehova i no ta fásil pa nos kai den tentashon. (Mat. 28:​19, 20; Heb. 10:​24, 25) Ora nos studia Beibel i meditá riba loke nos a lesa, nos amor pa loke ta bon i odio pa loke ta malu lo bira mas fuerte. (Hos. 1:8; Sal. 1:​2, 3; 119:​97, 101) Kòrda ku Hesus a bisa su disipelnan: “Hasi orashon kontinuamente pa boso no kai den tentashon.” (Mat. 26:41) Pues, ora nos tuma tempu pa resa na nos Tata den shelu, nos ta dun’é oportunidat pa yuda nos i nos ta fortalesé nos determinashon pa hasié kontentu.—Sant. 4:8.

SIGUI TA ALERTA

17. Ki debilidat Pedro mester a sigui lucha kuné?

¹⁷ Kisas nos por logra vense algun di nos debilidatnan, pero kisas tin algun ku ketu bai nos ta lucha kuné. Apòstel Pedro tabatin un debilidat asina: miedu di hende. E debilidat ei a pone ku el a nenga Hesus tres biaha. (Mat. 26:​69-75) Despues, a parse ku el a vens’é pasó el a prediká yen di kurashi tokante Hesus dilanti Korte Supremo Hudiu. (Echo. 5:​27-29) Ma algun aña despues, “miedu di esnan sirkunsidá” a pone ku pa un tempu el a stòp di kome huntu ku e kristiannan no-hudiu. (Gal. 2:​11, 12) Pedro su debilidat a lanta kabes atrobe. Kisas nunka el a logra vens’é kompletamente.

18. Kiko por pasa ku algun di nos debilidatnan?

¹⁸ Meskos ku Pedro, kisas nos tambe tin ku bolbe lucha ku un debilidat ku nos a pensa ku nos a vense. Un ruman hòmber a konta: “Pa dies aña mi no a wak pornografia i m’a pensa ku e debilidat ei tabata tras di lomba. Pero, e adikshon no a bai, e tabata drumí wardando e momento oportuno p’e saka kabes.” Nos ta kontentu ku nos ruman no a stòp di lucha. El a realisá ku pa resistí e debilidat ei, lo e tin ku lucha tur dia i kisas pa restu di su bida den e mundu malbado akí. Ku yudansa di su esposa i e ansianonan, el a tuma medidanan mas fuerte pa keda leu for di pornografia.

19. Kiko nos tin ku hasi si nos tin un debilidat ku ainda nos no a vense?

 ¹⁹ Kiko nos tin ku hasi pa asina un debilidat ku ainda nos no a vense, no laga nos kometé piká? Wèl, sigui Hesus su konseho: “Keda vigilá.” Asta ora bo sinti ku bo tin tur kos bou di kontrol, sigui ta alerta i sigui evitá situashonnan ku por hinka bo den tentashon. (1 Kor. 10:12) Sigui hasi e kosnan ku a duna bo bon resultado. Proverbionan 28:14 ta bisa: “Hende ku semper ta alerta ta felis.”—2 Ped. 3:14.

TA BALE LA PENA SIGUI TA ALERTA

20-21. (a) Ki rekompensa nos lo haña si nos sigui ta alerta kontra tentashon? (b) Kiko Yehova lo hasi pa nos si nos hasi nos parti? (2 Korintionan 4:7)

²⁰ Nos por tin sigur ku ta bale la pena pa sigui ta alerta pa tentashon. “E plasernan pasahero di piká” no ta di kompará ku e felisidat di obedesé Yehova su normanan. (Heb. 11:25; Sal. 19:8) Dikon? Pasobra Yehova a krea nos pa biba segun su normanan. (Gén. 1:27) Ta asina ei so, nos lo tin un konsenshi limpi i e speransa di biba pa semper.—1 Tim. 6:12; 2 Tim. 1:3; Hudas 20, 21.

²¹ Nos no por kita e echo ku “e karni ta débil.” Pero, esei no ke men ku nos no por hasi nada. Yehova t’ei pa yuda nos. (Lesa 2 Korintionan 4:7.) Ripará ku Yehova ta duna nos e poder ku ta surpasá esun di hende. E poder di hende, esta, e esfuerso ku tur dia nos ta hasi pa no kai den tentashon, ta nos mes tin ku sòru pa esei. Pues, si nos hasi nos parti, nos por ta konvensí ku ora nos pidi Yehova forsa pa no kai den tentashon, lo e duna nos e èkstra forsa ku nos mester. (1 Kor. 10:13) Sí, ku Yehova su yudansa, nos por sigui ta alerta pa tentashon.