1. Kiko a pone Kain tuma un mal desishon, i kiko tabata e resultado?

KAIN mester a tuma un desishon: Sea dominá su emoshonnan pekaminoso òf laga su emoshonnan domin’é. Sea kual sea su desishon, esaki lo tabatin konsekuensia pa e restu di su bida. Nos sa kiko Kain a disidí; e no a tuma un bon desishon. Su desishon a kosta bida di su fiel ruman hòmber, Abel. Ademas, Kain su desishon a daña su relashon ku su Kreador.—Gén. 4:3-16.

2. Dikon ta importante pa nos tuma bon desishon?

² Nos tambe tin ku skohe i tuma desishon. Pero, no ta tur nos desishonnan ta un asuntu di bida òf morto. Sinembargo, mayoria di nos desishonnan por tin un gran efekto riba nos bida. P’esei, si nos sa kon pa tuma bon desishon, nos lo tin un bida relativamente trankil i no un bida yen di problema, kontroversia i desapunto.—Pro. 14:8.

3. (a) Pa nos por tuma bon desishon, den ken i kiko nos mester tin fe? (b) Ki preguntanan nos lo konsiderá den e artíkulo akí?

³ Kiko por yuda nos tuma bon desishon? Nos mester tin fe den Dios ku e konfiansa ku e ke yuda nos i duna nos e sabiduria pa tuma bon desishon. Ademas, nos mester tin fe den  e Palabra di Yehova: Nos mester tin konfiansa den su konsehonan. (Lesa Santiago 1:5-8.) Segun ku nos ta hala mas serka Yehova i ta haña mas amor pa su Palabra, nos ta haña mas konfiansa ku e sa kiko ta bon pa nos. E ora ei, nos ta kria e kustumber di wak kiko e Palabra di Dios ta bisa promé ku nos tuma desishon. Awor, kiko mas nos por hasi pa desaroyá nos kapasidat di tuma bon desishon? I kiko di un desishon ku nos a tuma? Nos mester pega na dje kueste loke kueste?

4. Ki desishon Adam mester a tuma, i kiko tabata e konsekuensianan?

⁴ For di kuminsamentu di e historia humano, tantu hende hòmber komo muhé mester a tuma desishonnan importante. Adam por ehèmpel, mester a skohe si e ta skucha su Kreador òf Eva. Adam a tuma un desishon, pero kiko bo ta pensa di e desishon ku el a tuma? Su kasá, kende a ser gañá, a influensi’é pa tuma un mal desishon, ku a pone ku e no por a biba den Paradeis mas i ku despues a hiba na su morto. I esei tabata djis e komienso, pasobra te awe nos ta sufri e konsekuensianan di e mal desishon ku Adam a tuma.

5. Kon nos mester mira tumamentu di desishon?

⁵ Tin hende ta pensa ku bida lo tabata mas dushi si nos no mester a tuma desishon. Abo ta pensa asina? Kòrda ku Yehova no a krea hende manera robòt, ku no por pensa ni tuma desishon. De echo, Beibel ta siña nos kon pa tuma bon desishon. I e echo ku Yehova ke pa nos tuma nos mes desishonnan ta pa nos mes bon. Laga nos wak algun ehèmpel di pasado ku ta demostrá esei.

6, 7. Ki desishon e israelitanan di antigwedat mester a tuma, i dikon tabata difísil pa nan a tuma un bon desishon? (Wak e promé plachi.)

⁶ Unabes ku e israelitanan di antigwedat tabata den e Tera Primintí, nan mester a tuma un desishon importante: adorá Yehova òf sirbi dios falsu. (Lesa Hosue 24:15.) Aunke, esei por a parse un desishon simpel, e tabata un asuntu di bida òf morto. Durante e tempu di e huesnan, bes tras bes e israelitanan a tuma mal desishon. Nan a bira lomba pa Yehova i a bai sirbi diosnan falsu. (Hues. 2:3, 11-23) Awor pensa riba un okashon mas despues den historia di e pueblo di Dios ora nan tabatin ku tuma un desishon. Profeta Elías a bisa nan klaramente ku nan mester a disidí: adorá Yehova òf sirbi e dios falsu Baal. (1 Rei. 18:21) Elías a skual e pueblo pasobra nan tabata indesiso. Kisas bo ta pensa ku esaki tabata un desishon fásil pa tuma pasobra semper ta sabí i benefisioso pa sirbi Yehova. De echo, niun hende bon na tinu lo no a skohe pa sirbi Baal. Apesar di esei, e israelitanan ei a “keda duda entre dos opinion.” Elías tabata sabí i a urgi nan pa skohe e mihó forma di adorashon, esta, adorashon na Yehova.

⁷ Pero dikon tabata asina difísil pa e israelitanan tuma un bon desishon? Di promé, pasobra nan a pèrdè fe den Yehova i a nenga di skuch’é. Nan no a edifiká nan fe riba konosementu eksakto òf e sabiduria di Dios ni nan no a konfia den Yehova. Si nan a laga konosementu eksakto guia nan, nan lo por a tuma desishon sabí. (Sal. 25:12) Di dos, nan a laga otro hende influensiá nan òf asta tuma desishon pa nan. Sí, e habitantenan di e tera, kendenan no tabata sirbidó di Yehova, a influensiá nan manera  di pensa i a pone ku nan a bai tras di e multitut pagano. Hopi tempu promé, Yehova a spièrta nan ku algu asina por a pasa.—Éks. 23:2.

8. Ki lès importante tokante tumamentu di desishon nos ta siña for di e historia di Israel?

⁸ E ehèmpelnan ku nos a kaba di trata ta siña nos un lès masha kla: nos kada un mester tuma nos mes desishonnan, i un bon desishon ta basá riba konosementu sólido di e Skritura. Galationan 6:5 ta kòrda nos: “Kada ken lo karga su propio karga di responsabilidat.” Pues, nos no mester laga otro hende karga nos responsabilidat, esta, tuma desishon pa nos. Mas bien, nos mes mester siña kiko ta e boluntat di Dios i hasi esei.

9. Dikon por ta peligroso pa laga otro hende tuma desishon pa nos?

⁹ Kiko por pone nos kai den e trampa di laga otro hende tuma desishon pa nos? Preshon di pareu por pone nos tuma mal desishon. (Pro. 1:10, 15) Pero, ni maske kuantu preshon un hende purba di pone riba nos, nos tin e responsabilidat di sigui nos konsenshi bíblikamente entrená. Si nos laga otro hende tuma desishon pa nos, en realidat nos ta disidí di sigui nan ehèmpel. Ke men den un kaso asina, nos ta tuma un desishon, pero un desishon ku por tin konsekuensianan desastroso.

10. Di ki peliger apòstel Pablo a spièrta e galationan?

¹⁰ Apòstel Pablo a spièrta e galationan di e peliger di laga otro hende tuma desishon pa nan. (Lesa Galationan 4:17.) Algun hende den e kongregashon kier a tuma desishon pa otronan. Dikon? E hòmbernan egoista akí tabata buska prominensia. Nan tabata ke pa hende sigui nan i no e apòstelnan. Nan no tabata humilde i no a respetá e responsabilidat di nan rumannan pa tuma nan mes desishonnan.

11. Kon nos por yuda nos rumannan ora nan tin ku tuma desishon personal?

¹¹ Pablo a pone un bon ehèmpel pa nos: El a respetá e derecho di tuma  desishon ku tur ruman tin. (Lesa 2 Korintionan 1:24.) Ta bon pa ansianonan sigui su ehèmpel ora nan ta duna rumannan konseho tokante asuntunan personal. Ansianonan ta kontentu pa kompartí informashon basá riba Beibel ku nan rumannan. Pero nan ta laga e rumannan tuma nan mes desishonnan. Anto esei ta lógiko pasobra kada hende mester karga su propio responsabilidat. Kiko ta un lès ku nos ke enfatisá? Wèl, nos por mustra interes den nos rumannan i hala nan atenshon na konseho òf prinsipio bíbliko, pero ta nan mes mester tuma nan desishonnan. Si nan ta tuma bon desishon, e benefisionan ta pa nan mes. Pues, nos no mester pensa ku nos tin derecho di tuma desishon pa nos rumannan.

12, 13. Dikon ta peligroso pa skucha nos kurason ora nos ta rabiá òf desanimá?

¹² Awendia, hopi biaha bo ta tende hende bisa: ‘Skucha bo kurason.’ Pero esei por ta peligroso. Beibel ta spièrta nos pa no laga nos kurason imperfekto òf nos sintimentunan guia nos ora di tuma desishon. (Pro. 28:26) Vários relato di Beibel ta mustra e konsekuensianan tristu ku hende a haña nan kuné debí ku nan a skucha nan kurason. E problema prinsipal ta ku hende su “kurason ta mas engañoso ku tur kos i ta totalmente korupto.” (Yer. 3:17; 13:10; 17:9; 1 Rei. 11:9) Pues, kiko por sosodé si nos ta skucha nos kurason?

¹³ Nos kurason ta importante, pasobra nos a haña e mandamentu pa stima Yehova ku henter nos kurason i pa stima nos próhimo meskos ku nos mes. (Mat. 22:37-39) Pero e tekstonan di Beibel den e paragraf anterior ta resaltá e peliger di laga nos emoshonnan guia nos pensamentu- i echonan. Por ehèmpel, kiko por sosodé si nos ta tuma desishon ora nos ta rabiá? Si bo a yega di hasi esei, bo sa e kontesta kaba. (Pro. 14:17; 29:22) Òf, bo ta kere lo bo por tuma bon desishon ora bo ta desanimá? (Num. 32:6-12; Pro. 24:10) Ta sabí pa nos laga e Palabra di Dios guia nos. (Rom. 7:25) Pues, nos no mester laga nos emoshonnan guia nos ora di tuma desishonnan importante.

14. Kon nos por sa ku tin biaha ta bon pa kambia un desishon?

¹⁴ Nos a mira ku ta importante pa tuma bon desishon. Pero, esei no ta nifiká ku nos no por kambia un desishon ku nos a tuma kaba. Tin biaha, ta bon pa nos evaluá un desishon ku nos a tuma i podisé asta kambi’é. Tuma nota di loke Yehova a hasi den kaso di e ninivitanan den tempu di Yonas. “Ora Dios a mira nan echonan, ku nan a bira for di nan mal kaminda, e ora ei Dios a arepentí di e kalamidat ku el a deklará ku e lo trese riba nan. I e no a hasié.” (Yon. 3:10) Sí, despues ku Yehova a mira ku e ninivitanan a arepentí, esta, a kambia nan aktitut, el a kambia su desishon. Di e manera ei, Yehova a demostrá ku e ta rasonabel, humilde i kompasivo. Ademas, Dios no ta tuma desishon ora e ta rabiá ni e no ta laga emoshon gui’é, manera hopi hende sa hasi.

15. Kiko por pone nos kambia un desishon?

¹⁵ Awor, ki ora ta bon pa nos kambia un desishon ku nos a tuma? Por ehèmpel, nos por hasi esei ora sirkunstansianan  kambia. Yehova a hasi esei na mas ku un okashon. (1 Rei. 21:20, 21, 27-29; 2 Rei. 20:1-5) Òf kisas nos ta haña informashon nobo ku ta duna nos bon motibu pa kambia un desishon. Rei David a haña informashon robes tokante e ñetu di Saul, Mefi-boset. Despues, ora David a haña informashon korekto, el a kambia su desishon. (2 Sam. 16:3, 4; 19:24-29) Tin bes, lo ta sabí pa nos hasi meskos.

16. (a) Kiko por yuda nos tuma desishon sabí? (b) Dikon por sosodé ku nos mester kambia un desishon ku nos a tuma kaba?

¹⁶ E Palabra di Dios ta konsehá nos pa no kore tuma un desishon importante sin pensa. (Pro. 21:5) Ora nos tuma tempu pa evaluá tur detaye òf aspekto relashoná ku un desishon ku nos ke tuma, tin mas chèns ku nos lo haña mihó resultado. (1 Tes. 5:21) Promé ku un kabes di famia tuma un desishon, ta bon pa e tuma tempu pa analisá loke e Skritura i nos publikashonnan ta bisa i skucha opinion di e miembronan di su famia. Kòrda ku Dios a urgi Abraham pa skucha na loke su kasá Sara tabatin di bisa. (Gén. 21:9-12) Ansianonan tambe mester tuma tempu pa hasi investigashon. I si nan ta rasonabel i modesto, nan lo no tin miedu di pèrdè kara si nan haña informashon nobo òf relevante ku ta indiká ku nan mester kambia un desishon. I ora esei ta nesesario, nan mester ta kla pa kambia nan pensamentu i desishonnan; anto nos tur ta hasi bon di sigui nan ehèmpel. Esaki por promové pas i órden den e kongregashon.—Echo. 6:1-4.

17. Kiko lo yuda nos tuma bon desishon?

¹⁷ Algun desishon ta mas importante ku otro. Ora di tuma desishonnan importante, nos tin ku tuma mas tempu pa pensa riba e asuntu i pa hasi orashon. Algun ruman tin ku disidí si nan ke kasa òf nò, i si nan ke kasa, ku ken nan ta kasa. Un otro desishon importante ku por trese hopi bendishon ta e desishon di drenta sirbishi di tempu kompleto i na ki tempu. Ora di tuma desishonnan asina, ta masha importante pa konfia plenamente ku Yehova por i lo duna bo sabiduria pa tuma un bon desishon. (Pro. 1:5) Pues ta masha importante pa nos rekonosé ku Beibel ta e fuente di e mihó konsehonan i buska Yehova su guia mediante orashon. Anto kòrda, Yehova por duna nos e kualidatnan nesesario pa tuma desishon ku ta di akuerdo ku su boluntat. Hasié un kustumber ku ki ora ku bo ta bai tuma desishon importante, bo ta puntra bo mes: ‘E desishon akí ta demostrá ku mi ta stima Yehova? Mi desishon lo trese goso i pas pa mi famia? Lo e mustra ku mi tin pasenshi i ku mi ta bondadoso?’

18. Dikon Yehova ta ferwagt ku nos ta tuma nos mes desishonnan?

¹⁸ Yehova no ta fòrsa nos stim’é ni sirbié. Esei ta nos desishon. Komo ku el a duna nos boluntat liber, e ta respetá nos responsabilidat i derecho di ‘skohe pa nos mes’ si nos ke sirbié òf nò. (Hos. 24:15; Ekl. 5:4) Pero unabes ku nos a disidí ku nos ta sirbié, e ta ferwagt ku nos ta kumpli ku e desishon ei i ku e otro desishonnan ku nos ta tuma basá riba su guia. Laga nos demostrá fe den Yehova i den su prinsipionan. Di e manera ei, nos por tuma bon desishon i demostrá ku nos ta personanan stabil den tur nos kamindanan.—Sant. 1:5-8; 4:8.