E sakrifisio di reskate ku Hesus a paga ku su sanger ta e úniko manera posibel pa haña pordon di nos pikánan. (Efe. 1:7) Pero tòg, Beibel ta bisa ku Dios “a tene pasenshi . . . i a pordoná e pikánan . . . kometé den pasado,” esta, promé ku Hesus a pèrkurá e reskate. (Rom. 3:25) Kon Yehova por a hasi esei sin kibra su propio normanan di hustisia?

For di tempu ku Yehova a primintí ku lo bin un “desendiente” pa salba hende ku pone fe den djÉ i su promesanan, tabata komo si fuera ya kaba e reskate a ser pagá. (Gén. 3:15; 22:18) Yehova tabatin sigur ku, na su debido tempu, su Yu lo ta dispuesto pa sakrifiká su bida komo reskate. (Gal. 4:4; Heb. 10:7-10) Tempu ku Hesus tabata riba tera, Yehova a dun’é outoridat pa pordoná piká asta promé ku el a duna su bida komo sakrifisio. Hesus por a pordoná piká di esnan ku tabatin fe pasobra e tabata sa ku e sakrifisio ku lo el a hasi lo a kubri nan pikánan.​—Mat. 9:2-6.