1, 2. (a) Kiko algun hende ta pensa di e echo ku Dios tin un organisashon? (b) Kiko nos lo konsiderá den e artíkulo akí?

DIOS tin un organisashon? Algun hende por bisa: “Bo no tin nodi di ta parti di un religion. E úniko kos ku bo mester tin ta un relashon personal ku Dios.” E punto di bista ei ta korekto? Kiko e echonan ta indiká?

² E artíkulo akí lo duna prueba ku Yehova ta un Dios di òrdu i ku e ta organisá su pueblo. Ademas, nos lo wak kiko nos mester hasi ora nos haña instrukshon di Yehova su organisashon. (1 Kor. 14:33, 40) Den e promé siglo i tambe den nos tempu, e Skritura a yuda e parti terenal di Yehova su organisashon hasi e trabou di prediká e bon notisia rònt mundu. Komo ku nos ta kumpli ku prinsipionan di Beibel i ta sigui e instrukshonnan ku nos ta haña for di Yehova su organisashon, nos ta yuda e kongregashon keda limpi i ta mantené pas i union den dje.

3. Kiko ta konvensé bo ku Yehova ta un Dios di òrdu?

³ Ora nos wak kreashon, nos ta mira bon kla ku Yehova ta un Dios di òrdu. Beibel ta bisa: “Pa medio di sabiduria SEÑOR a funda tera; pa medio di komprondementu el a establesé e  shelunan.” (Pro. 3:19) Nos sa “djis un parti minimal di [Dios] su obranan” i ta masha poko kos nos sa di dje. (Yòb 26:14) Asina mes, e tiki ku nos sa di e planeta-, strea- i galaksianan ta yuda nos mira ku e kuerponan selestial akí ta masha bon organisá. (Sal. 8:3, 4) Un galaksia ta konsistí di miónes di strea ku ta move den espasio na un manera organisá. Anto e planetanan den nos sistema solar ta drei den un órbita rònt di solo komo si fuera nan ta sigui reglanan di tráfiko. Sin duda, e òrdu asombroso ku tin den universo ta laga nos mira ku Yehova, kende “a traha e shelunan [i tera] ku sabiduria” ta meresé nos alabansa, lealtat i adorashon.—Sal. 136:1, 5-9.

4. Kon bini siensia no por kontestá hopi pregunta ku hende tin?

⁴ Siensia a yuda nos haña sa hopi tokante nos universo i nos planeta, i e avansenan riba tereno sientífiko a trese hopi benefisio pa bida di hende. Pero tin hopi pregunta ku siensia no por kontestá. Por ehèmpel, astrónomonan no por bisa nos eksaktamente kon universo a bini na eksistensia òf dikon nos ta riba planeta Tera, kaminda tin vários forma di bida. Ademas, hende en general no por splika dikon e ser humano tin un deseo fuerte pa biba pa semper. (Ekl. 3:11.) Kon bin tin asina tantu pregunta importante ku hende no a haña kontesta p’e? Un motibu ta ku hopi sientífiko i tambe otro hende ta bisa ku Dios no ta eksistí i ta promové e teoria di evolushon. Pero den Yehova su propio Buki, Beibel, e ta kontestá pregunta ku ta preokupá hopi hende.

5. Kon asina hende ta dependé di e leinan di naturalesa?

⁵ Nos tur ta dependé di e leinan konsistente i konfiabel di naturalesa ku Yehova a establesé. Por ehèmpel, elèktrishèn, pipefitter, ingeniero, piloto i siruhano ta dependé di e leinan akí pa nan por hasi nan trabou. Un siruhano sa ku e anatomia di kurpa humano ta básikamente konsistente. Pues ora di hasi un operashon, e no tin ku buska unda e pashènt su kurason ta. I nos tur ta respetá e leinan di naturalesa. Por ehèmpel, si nos purba di pasa por alto di e lei di gravedat, esei por kosta nos bida.

6. Dikon nos por ferwagt ku e sirbidónan di Yehova ta organisá?

⁶ Universo ta organisá na un manera masha maravioso. Pues, sin duda, nos mester ferwagt ku Yehova ke pa su sirbidónan ta bon organisá. Ta p’esei Dios a duna nos su Palabra pa guia nos. Si nos no kumpli ku Dios su normanan i haña yudansa di su organisashon, nos lo no ta felis.

7. Kiko ta mustra ku Beibel ta un buki bon hinká den otro?

⁷ Beibel no ta djis un kolekshon di literatura hudiu i kristian ku no tin nada di haber ku otro. Mas bien, e ta un buki masha bon hinká den otro, un obra maestro ku Dios a inspirá. Kada buki di Beibel ta konektá ku otro i su tema sentral, esta, e vindikashon di Yehova su soberania i kumplimentu di su propósito pa tera mediante su Reino bou di Kristu, e “simia” primintí, ta kore manera un liña kòrá for di Génesis te Revelashon.—Lesa Génesis 3:15; Mateo 6:10; Revelashon 11:15.

8. Dikon nos por bisa ku e israelitanan tabata bon organisá?

⁸ E pueblo di Israel di antigwedat tabata masha bon organisá. Por ehèmpel, segun e Lei di Moises, tabatin “muhénan sirbidó ku tabata [“organisá pa,” NW]  sirbi na entrada di e tènt di reunion.” (Éks. 38:8) Ora e israelitanan a transportá e kampamentu i e tabernakel, nan a hasi esei na un manera ordená. Mas despues, Rei David a parti e levita- i saserdotenan den gruponan organisá pa hasi trabou spesífiko na e tèmpel. (1 Kró. 23:1-6; 24:1-3) Ora e israelitanan a obedesé Yehova, el a bendishoná nan ku òrdu, pas i union.—Deu. 11:26, 27; 28:1-14.

9. Kiko ta mustra ku e kongregashonnan di promé siglo tabata organisá?

⁹ E kongregashonnan kristian di promé siglo tambe tabata organisá, i nan tabata benefisiá di e guia di e kuerpo gobernante, ku na prinsipio tabata konsistí di e apòstelnan. (Echo. 6:1-6) Despues, mas ruman hòmber a bin forma parti di e kuerpo gobernante ei. (Echo. 15:6) Yehova a inspirá miembronan di e kuerpo gobernante di promé siglo i otro kristiannan ku tabata traha estrechamente ku nan pa skirbi kartanan ku tabata kontené konseho i instrukshon pa e kongregashonnan. (1 Tim. 3:1-13; Tito 1:5-9) Kon e kongregashonnan a benefisiá ora nan a sigui guia di e kuerpo gobernante?

10. Kiko tabata e resultado ora e kongregashonnan di promé siglo tabata kumpli ku e dekretonan di e kuerpo gobernante? (Wak e promé plachi.)

¹⁰ Lesa Echonan 16:4, 5. E kuerpo gobernante tabata manda ruman hòmbernan ku tabata “entregá e rumannan e dekretonan ku e apòstelnan i e ansianonan di Herúsalèm a stipulá pa nan kumpli kuné.” Segun ku e kongregashonnan tabata kumpli ku e dekretonan ei, nan tabata “sigui bira firme den fe i krese na kantidat dia tras dia.” Kiko nos por siña for di nan ehèmpel ku lo yuda nos den nos kongregashon awe?

11. Kiko ruman hòmbernan nombrá mester hasi ora nan haña instrukshon for di Dios su organisashon?

¹¹ Kiko e miembronan di Komité di Sukursal òf Komité di Pais, superintendentenan di sirkuito i ansianonan mester hasi ora nan haña instrukshon for di Dios su organisashon? Yehova ta bisa nos den su Buki, Beibel, ku nos mester ta obediente i sumiso. (Deu. 30:16; Heb. 13:7, 17) Un aktitut krítiko òf rebelde no ta pas den Dios su organisashon, pasobra un aktitut asina por kaba ku e amor, pas i union den e kongregashon. Klaru ku ningun fiel kristian lo no ke ta manera Diótrefes, un hòmber desleal ku no tabatin rèspèt pa e rumannan ku tabata dirigí. (Lesa 3 Huan 9, 10.) Nos por puntra nos mes: ‘Mi ta yuda mi rumannan den sentido spiritual? Mi ta dispuesto pa aseptá i apoyá e instrukshonnan ku e rumannan ku ta dirigí ta duna?’

12. Ki kambio a bini den e manera ku ansiano i sirbidó ministerial ta ser nombrá?

¹² Tuma nota di un desishon ku e Kuerpo Gobernante a tuma resientemente. E “Pregunta di Lektor” den E Toren di Vigilansia di 15 di novèmber 2014 a splika ku den e promé siglo, e kuerpo gobernante a duna superintendentenan biahero outoridat pa nombra ansiano i sirbidó ministerial. Di akuerdo ku esei, for di 1 di sèptèmber 2014, ta superintendentenan di sirkuito ta nombra ansiano i sirbidó ministerial. E superintendente di sirkuito ta purba di siña konosé e ruman hòmbernan ku e kuerpo di ansiano a rekomendá i, si ta posibel, ta traha ku nan den sirbishi. Tambe e ta opservá nan famia. (1 Tim. 3:4, 5) E kuerpo di ansiano i e superintendente di sirkuito ta analisá e rekisitonan ku Beibel ta duna pa un ruman hòmber por kualifiká pa bira un  ansiano òf sirbidó ministerial.—1 Tim. 3:1-10, 12, 13; 1 Ped. 5:1-3.

13. Kon nos por demostrá ku nos ta apoyá instrukshon di e ansianonan?

¹³ Nos mester sigui e guia basá riba Beibel ku nos ta haña di e ansianonan. Ta “instrukshon sano,” òf benefisioso, den Dios su propio Buki ta guia fiel wardadónan den e organisashon di Dios. (1 Tim. 6:3) Tuma nota di e konseho ku Pablo a duna tokante hende den kongregashon ku tabata hiba un bida desordená. Algun di nan ‘no tabata traha, ma tabata kana mete den loke no tabata nan asuntu.’ E ansianonan a konsehá nan, pero nan no kier a skucha. Kon e kongregashon mester a trata un kristian asina? Pablo a duna e siguiente instrukshon: “Mark’é i stòp di anda kuné.” Pero tambe el a spièrta nan pa no trata e kristiannan akí komo enemigu. (2 Tes. 3:11-15) Awe ansianonan ta purba di yuda kristiannan ku ta ignorá e normanan di Dios. Por ehèmpel, suponé ku un ruman ta mustra interes romántiko den un hende ku no ta Testigu di Yehova. (1 Kor. 7:39) Si e ruman ei no kambia su kondukta, e ansianonan por duna un diskurso ku ta splika kon e mal kondukta ei por pone otro hende papia malu di e organisashon di Yehova. Kiko lo bo hasi ora e ansianonan ta haña ku ta nesesario pa duna un diskurso asina? Si bo ta konsiente di e situashon ei, lo bo hasi tur esfuerso pa stòp di anda ku e ruman? Bo amor p’e, bo interes den dje i bo posishon firme por motivá e ruman pa stòp ku su mal kondukta. ^[1]

14. Kon nos por yuda mantené e kongregashon limpi den sentido spiritual?

¹⁴ Nos por yuda mantené e kongregashon limpi den sentido spiritual ora nos ta sigui e instrukshonnan ku tin den e Palabra di Dios. Por ehèmpel, wak kiko a sosodé den e stat antiguo di Korinto. Pablo a hasi hopi esfuerso pa prediká einan, i e tabata stima esnan “santu.” (1 Kor. 1:1, 2) Pero e echo ku e mester a papia ku e kongregashon tokante e inmoralidat seksual ku nan tabata tolerá lo mester a molesti’é bastante. Pablo a instruí e ansianonan pa entregá e hòmber inmoral na Satanas. Ku otro palabra, mester a ekspuls’é. Pa e kongregashon por a keda limpi, e ansianonan mester a saka e “zürdeg” afó. (1 Kor. 5:1, 5-7, 12) Ora nos apoyá e desishon di e ansianonan pa ekspulsá un pekadó ku no a arepentí, nos ta yuda mantené e kongregashon limpi, i kisas esei ta motivá e persona pa arepentí i buska Yehova su pordon.

15. Kon nos por mantené pas den kongregashon?

¹⁵ Tabatin un problema mas na Korinto: algun kristian tabata hiba nan ruman korte. Pablo a hasi nan un pregunta pa pone nan pensa: “Pakiko boso no ta dispuesto pa soportá inhustisia?” (1 Kor. 6:1-8) Awe tambe tin algu similar ta sosodé ku por stroba e pas entre rumannan. Algun ruman den kongregashon a sera kombenio di negoshi ku otro ruman pero a pèrdè nan sèn, òf un ta akusá e otro di a kometé froude. Algun a hiba nan ruman korte, pero Dios su Buki ta yuda nos mira ku ta mihó pa nos sufri pèrdida ku trese reproche riba Dios su nòmber òf kita e pas ku tin den kongregashon. ^[2] Klaru, pa nos por resolvé problema i desakuerdo serio, nos mester apliká Hesus su konseho. (Lesa Mateo 5:23, 24; 18:15-17.) Ora nos hasi esei, nos ta promové union entre Yehova su sirbidónan.

16. Dikon nos por ferwagt ku Dios su pueblo ta uní?

 ¹⁶ E Palabra di Dios ta mustra nos dikon nos por ferwagt ku su pueblo ta uní. Un salmista a kanta: “Mira, ki bon i ki dushi ta pa rumannan biba huntu den armonia [òf, “union,” NW]!” (Sal. 133:1) Ora e israelitanan a obedesé Yehova, nan tabata organisá i uní. Dios a profetisá loke lo a sosodé ku su pueblo den futuro, bisando: “Lo mi trese nan huntu [“den union,” NW] manera karné den kurá.” (Mik. 2:12) Ademas, Yehova a profetisá pa medio di profeta Sofonías: “Lo mi kambia e idioma di e pueblonan pa un idioma puru [di e bèrdatnan di e Skritura], pa nan tur por invoká e nòmber di Yehova i sirbié skouder ku skouder [òf, “ador’é den union,” nota].” (Sof. 3:9, NW) Nos ta masha gradisidu ku nos tin e privilegio di sirbi Yehova den union!

17. Pa e kongregashon keda limpi i uní, kon e ansianonan mester atendé kasonan di mal echo?

¹⁷ Pa e kongregashon keda limpi i uní, e ansianonan mester atendé kasonan hudisial ku amor i mas pronto posibel. Pablo tabata sa ku Dios su amor no ta basá riba puru sentimentalismo ni E no ta sera wowo pa mal echo. (Pro. 15:3) P’esei Pablo no a duda pa skirbi e karta di Promé Korintionan na un manera firme pero tòg ku amor. E karta di Segundo Korintionan, ku el a skirbi algun luna despues, ta mustra ku kosnan a drecha den e kongregashon debí ku e ansianonan a apliká su instrukshonnan. Si un ruman dal un paso robes promé ku e realisá esei, ruman hòmbernan spiritualmente kapasitá mester purba di reahust’é ku suavedat.—Gal. 6:1.

18. (a) Den ki maneranan konseho di e Palabra di Dios a yuda e kongregashonnan di promé siglo? (b) Kiko nos lo analisá den e siguiente artíkulo?

¹⁸ Ta bisto ku e konsehonan inspirá den Dios su Buki a yuda e kristiannan di promé siglo na Korinto i na otro lugánan keda limpi i mantené pas i union den nan kongregashon. (1 Kor. 1:10; Efe. 4:11-13, nota; 1 Ped. 3:8) Komo resultado, nos rumannan di e tempu ayá por a logra hopi den sirbishi. De echo, Pablo por a bisa ku e bon notisia “a ser prediká na henter e kreashon bou di shelu.” (Kol. 1:23) Awe tambe e pueblo di Dios ta un organisashon uní ku ta plama e mensahe tokante Dios su maravioso propósito rònt mundu. E siguiente artíkulo lo duna mas prueba ku e pueblo di Dios tin masha rèspèt pa Beibel i ta determiná pa duna onor na e Soberano Señor Yehova.—Sal. 71:15, 16.