1, 2. (a) Ki premio sirbidónan di Dios ta spera di risibí? (b) Kiko ta yuda nos tene nos bista fihá riba e premio? (Wak e promé plachi.)

MESKOS ku apòstel Pablo, kristiannan ungí awe tin e speransa presioso di risibí “e premio di Dios su yamada selestial.” (Flp. 3:14) Nan ta anhelá pa sirbi huntu ku Hesukristu den su Reino selestial i traha huntu kuné pa yuda hende yega na perfekshon. (Rev. 20:6) Ki un bunita speransa Yehova a duna nan! E otro karnénan lo haña un otro premio. Nan ta spera di biba pa semper riba tera, i e speransa ei ta hasi nan berdaderamente felis.—2 Ped. 3:13.

² Pa yuda rumannan ungí keda fiel i risibí e premio, Pablo a spièrta nan: “Keda ku boso mente fihá riba e kosnan djariba.” (Kol. 3:2) Nan mester a keda kòrda riba e speransa maravioso di risibí nan herensia selestial. (Kol. 1:4, 5) Sí, ora nos meditá riba e bendishonnan ku Yehova tin pa su sirbidónan, esei lo yuda nos keda ku nos bista fihá riba e premio, sea nos tin e speransa di biba den shelu òf riba tera.—1 Kor. 9:24.

3. Tokante ki peliger Pablo a spièrta e rumannan?

 ³ Ademas, Pablo a spièrta e rumannan di e peligernan ku por a stroba nan di risibí e premio. Por ehèmpel, el a skirbi e kongregashon na Kolósas tokante kristiannan falsu ku kier a haña e aprobashon di Dios pa medio di e obranan di e Lei di Moises en bes di pone fe den Kristu. (Kol. 2:16-18) Tambe Pablo a papia tokante peligernan ku ta eksistí te dia djawe i kon eseinan por stroba nos di risibí e premio. Por ehèmpel, el a splika kon nos por resistí deseonan inmoral, kon nos mester trata ku problema ku nos rumannan i ku difikultat den famia. Pues, e konsehonan di Pablo tokante e asuntunan akí ta masha balioso pa nos awe. P’esei, laga nos analisá algun spièrtamentu ku Pablo a skirbi den su karta pa e rumannan na Kolósas.

4. Dikon deseonan inmoral por stroba nos di risibí e premio?

⁴ Despues ku Pablo a kòrda e rumannan di nan speransa maravioso, el a skirbi nan: “P’esei, mata e inklinashonnan di boso kurpa pa loke ta fornikashon, impuresa, pashon, mal deseo i golosidat.” (Kol. 3:5) Deseonan inmoral por ta hopi fuerte i por stroba nos di haña tesoro spiritual. Un ruman hòmber kende a kometé inmoralidat seksual a bisa ora el a bini bèk den e kongregashon: “Un deseo masha fuerte a atraé mi ku mi no a rekuperá mi sano huisio sino te ora tabata muchu lat.”

5. Kon nos por protehá nos mes den situashonnan peligroso?

⁵ Ta masha importante pa nos keda alerta ora nos haña nos ku sirkunstansianan ku por pone nos bai kontra e normanan di Yehova. Por ehèmpel, ta sabí pa for di komienso un pareha ku ta namorá pone límitenan bon kla tokante kontakto físiko, sunchimentu òf ta nan so huntu. (Pro. 22:3) Un kristian por hañ’é ku situashonnan peligroso ora e ta riba un biahe di negoshi òf ora e ta traha ku un hende di e sekso opuesto. (Pro. 2:10-12, 16) Si bo haña bo den un situashon asina, identifiká bo mes komo un Testigu di Yehova, komportá bo na un manera desente i kòrda ku flirtmentu por tin konsekuensianan desastroso. Ademas, nos mester tene kuidou si nos ta sinti nos tristu òf nos so. Na momentonan asina, kisas nos ke un hende ku por laga nos sinti nos stimá. Nos por asta bira asina desesperá pa haña apoyo emoshonal ku nos por aseptá atenshon di kualke hende. Si esei sosodé ku bo, buska yudansa serka Yehova i bo rumannan pa nan yuda bo pa bo no keda sin risibí e premio.—Lesa Salmo 34:18; Proverbionan 13:20.

6. Ora di skohe entretenimentu, kiko nos mester tene na mente?

⁶ Pa nos por dominá deseonan inmoral, nos mester rechasá entretenimentu inmoral. Mayoria di e entretenimentu awe ta pone nos kòrda riba e statnan antiguo di Sódoma i Gomora. (Hudas 7) Hende ku ta dirigí e mundu di entretenimentu ta promové nan ideanan presentando inmoralidat seksual komo algu normal i sin konsekuensianan doloroso. Si nos no keda alerta, tiki tiki nos por kuminsá aseptá tur entretenimentu ku mundu ta ofresé. Nos mester skohe entretenimentu ku no ta stroba nos di keda ku nos bista fihá riba e premio di bida.—Pro. 4:23.

7. Ki problema por surgi den e kongregashon?

⁷ Nos tur ta haña ku ta un bendishon pa ta parti di e kongregashon kristian. Ora nos ta studia e Palabra di Dios na nos reunionnan i ta apoyá nos rumannan, nos ta keda ku nos bista fihá riba e premio. Sinembargo, tin biaha mal komprondementu por kousa problema entre rumannan den e kongregashon. Si nos no resolvé e problemanan akí, nos por kuminsá karga renkor.—Lesa 1 Pedro 3:8, 9.

8, 9. (a) Ki kualidatnan por yuda nos gana e premio? (b) Kiko por yuda nos mantené pas si un ruman hùrt nos?

⁸ Kon nos por evitá di laga renkor stroba nos di risibí e premio? Pablo a urgi e rumannan na Kolósas, bisando: “Komo skohínan di Dios, santu i stimá, bisti tierno kompashon, bondat, humildat, suavedat i pasenshi. Sigui soportá otro i pordoná otro libremente, asta si un di boso tin motibu pa keha un otro. Meskos ku Yehova a pordoná boso libremente, boso tambe mester hasi meskos. Pero, ademas di tur e kosnan akí, bisti amor, pasobra e ta e laso perfekto di union.”—Kol. 3:12-14.

⁹ Amor i bondat por yuda nos pa pordoná otro. Por ehèmpel, si un ruman a hùrt nos mediante su akshon- òf palabranan, nos por purba di kòrda momentonan ku nos a bisa òf hasi algu ku a hùrt un ruman. Nos no ta keda kontentu ku nos rumannan a pasa por alto di nos fayonan i asina a mustra amor i bondat na nos? (Lesa Eklesiástes 7:21, 22.) Nos ta spesialmente gradisidu pa e bondat ku Hesus a mustra ora el a uni kristiannan berdadero. (Kol. 3:15) Nos tur ta stima e mesun Dios, ta prediká e mesun mensahe i ta enfrentá kasi e mesun retonan. Si nos ta mustra amor i bondat i ta kla pa pordoná otro, nos ta kontribuí na e union kristian i ta keda ku nos bista fihá riba e premio di bida.

10, 11. (a) Dikon yalursheit ta algu peligroso? (b) Kon nos por evitá di laga yalursheit stroba nos di risibí e premio?

¹⁰ Un otro kos ku por stroba nos di risibí e premio ta yalursheit, manera algun ehèmpel di Beibel ta mustra. Por ehèmpel, Kain a bira yalurs riba su ruman hòmber Abel i a mat’é. Kore, Datan i Abiram a bira yalurs riba Moises i a opon’é. Ademas, Rei Saul a bira yalurs riba David pa e éksito ku David tabatin i a purba di mat’é. Ku bon motibu anto Beibel ta bisa: “Kaminda tin yalursheit i e spiritu di pleitu, ei lo tin tambe desòrdu i tur sorto di kos baho.”—Sant. 3:16.

¹¹ Si nos kultivá amor i bondat di kurason, nos lo no bira yalurs lihé. Beibel ta bisa: “Amor tin pasenshi i ta bondadoso. Amor no ta yalurs.” (1 Kor. 13:4) Pa nos no laga yalursheit saka rais den nos kurason, nos mester hasi esfuerso pa mira kosnan for di e punto di bista di Dios i mira nos rumannan komo parti di e mesun kurpa, esta, e kongregashon. Esei lo yuda nos tene konsiderashon ku otro hende, i esei ta di akuerdo ku e konseho ku nos ta haña den Beibel: “Si un parti di e kurpa ser glorifiká, tur otro parti ta alegrá huntu kuné.” (1 Kor. 12:16-18, 26) Pues, en bes di bira yalurs, nos mester ta kontentu ora nos rumannan haña bendishon. Wak e ehèmpel di Jonatan, yu di Rei Saul. E no a bira yalurs ora David a ser skohí pa bira rei; mas bien, el a animá David. (1 Sam. 23:16-18) Nos tambe por imitá e amor i bondat di Jonatan?

12. Ki konseho bíbliko ta yuda nos famia risibí e premio?

¹² Ora kada miembro di famia apliká prinsipionan di Beibel, esei por trese pas i felisidat i yuda nan gana e premio. Ki konseho enkuanto famia Pablo a duna e rumannan na Kolósas? El a bisa: “Esposanan, sea sumiso na boso esposo, ya ku esei ta apropiá den bista di Señor. Esposonan, sigui stima boso esposa i no rabia amargamente ku nan. Yunan, obedesé boso mayornan den tur kos, pasobra esaki ta agradabel den bista di Señor. Tatanan, no iritá boso yunan pa nan no desanimá.” (Kol. 3:18-21) Sin duda, nos ta di akuerdo ku ora nos apliká e konseho di Pablo, esei ta benefisiá esposo, esposa i yunan.

13. Kon un ruman muhé por yuda su kasá ku no ta Testigu kuminsá sirbi Yehova?

¹³ Awor, kiko si bo ta un esposa i bo ta haña ku bo kasá ku no ta Testigu no ta trata bo bon? E situashon lo mehorá si bo pleita kuné tokante su aktitut? Asta si bo logra pa e hasi loke bo ke, lo bo ta yudando e p’e sirbi Yehova un dia? Kasi sigur ku nò. Pero si bo mustra rèspèt na bo kasá komo kabes di famia, bo por yuda mantené pas den famia i trese onor na Yehova. Bo por asta gana bo kasá den e bèrdat i boso tur dos por risibí e premio.—Lesa 1 Pedro 3:1, 2.

14. Kiko un esposo kristian mester hasi si su esposa ku no ta Testigu no ta mustr’é rèspèt?

 ¹⁴ Kiko si bo ta un esposo i bo ta haña ku bo kasá ku no ta Testigu no ta respetá bo? Si bo grit’é i mustr’é ken ta manda, lo bo yud’é pa e mustra bo mas rèspèt? Sigur ku nò! Yehova ta ferwagt ku bo ta kumpli ku bo papel komo kabes di famia ku amor, manera Hesus a hasi. (Efe. 5:23) Hesus ta dirigí su kongregashon ku amor i pasenshi. (Luk. 9:46-48) Ora un esposo imitá e ehèmpel di Hesus, e por yuda su kasá kuminsá sirbi Yehova.

15. Kon un ruman hòmber ta mustra amor na su kasá?

¹⁵ Beibel ta bisa: “Esposonan, sigui stima boso esposa i no rabia amargamente ku nan.” (Kol. 3:19) Un esposo ku ta mustra amor ta onra su kasá ora e ta skucha opinion di su esposa i ta sigur’é ku e ta balorá loke su esposa ta bisa. (1 Ped. 3:7) Aunke ku no ta tur biaha e esposo por hasi loke su kasá pidié, hopi biaha ora e esposo papia ku su kasá, e por yega na un mihó desishon. (Pro. 15:22) Un esposo ku ta mustra amor ta purba di gana e rèspèt di su kasá i no ta eksigí esei for di dje. Un esposo ku ta stima su kasá i yunan tin mas chèns di tin un famia ku ta sirbi Yehova ku goso i gana e premio di bida.

16, 17. Komo hóben, kon bo por evitá di fada muchu ku bo mayornan?

¹⁶ Kisas bo ta un hóben i bo ta haña ku bo mayornan no ta komprondé bo i ku nan ta muchu strèn. Esaki por fada bo asina tantu ku bo por asta kuminsá duda si ta bale la pena pa sirbi Yehova. Pero si bo laga bo frustrashon stroba bo di sirbi Yehova, lo no dura muchu pa bo ripará ku no tin niun hende ku ta interesá mas den bo ku bo mayornan ku ta stima Dios i bo kongregashon.

¹⁷ Pensa riba esaki: Si nunka bo mayornan no ta korigí bo, kisas bo ta puntra bo mes si nan ta stima bo di bèrdat. (Heb. 12:8) Pero kisas ta e manera ku bo mayornan ta disipliná bo ta molestiá bo. En bes di kunsumí ku e manera ku bo mayornan ta disipliná bo, purba di komprondé e motibu pakiko nan ta hasi esei. Pues keda trankil i hasi bo bèst pa no eksagerá bo reakshon ora bo haña konseho. E Palabra di Dios ta bisa: “Esun ku midi su palabranan tin konosementu, i esun ku tin un spiritu kalmu ta un hende di komprondementu.” (Pro. 17:27) Ta bon pa bo pone komo meta pa bira un hende maduro kende ta tuma konseho, ta keda trankil i ta benefisiá di e konseho sin preokupá demasiado den ki manera bo a haña e konseho. (Pro. 1:8) Ta un bendishon di por tin mayornan ku ta sirbi Yehova i ku ta stim’é di bèrdat. No tin duda ku nan ke yuda bo gana e premio di bida.

18. Dikon bo ta determiná pa keda ku bo bista fihá riba e premio?

¹⁸ Nos tur tin e oportunidat di risibí un premio maravioso, sea ku ta bida inmortal den shelu òf bida pa semper den un paradeis riba tera. Nos speransa ta sigur. E ta basá riba un promesa ku e Kreador di universo mes a duna. El a bisa tokante Paradeis riba tera: “Tera lo ta yen di e konosementu di SEÑOR, manera awa ta tapa laman.” (Isa. 11:9) Pa e tempu ei, tur hende ku ta biba riba tera lo ser siñá pa Dios. Esei sigur ta un premio ku nos ke hasi esfuerso pa haña. Pues, keda ku bo bista fihá riba loke Yehova a primintí, i no laga nada stroba bo di risibí e premio!