SI ALGUN aña pasá bo a bishitá e isla chikitu di Sangir Besar na Indonesia, kisas lo bo a topa tres di nos ruman muhénan kant’i laman. Aunke nan ta konosí pa yuda hende komprondé Beibel, loke nan tabata hasi e momento ei kant’i laman no tabata prediká. Pues, ta kiko nan tabata hasiendo anto?

Nan tabata kana den e awa plat pa buska baranka di piedra i karga nan bin kantu kuné. Algun di e piedranan ei tabata mes grandi ku bala di futbòl. Despues, nan tabata kai sinta riba banki chikitu di palu, i ku martin nan tabata bati e piedranan kibra chikí chikí, mas chikitu ku un webu di galiña. Nan tabata hinka e piedranan chikitu den hèmber, subi trapi i hiba nan kas. Djei, nan tabata hinka e piedranan den sakunan grandi. Por último, trùk tabata pasa buska e sakunan i a usa e piedranan pa traha kaminda.

Hulda tabata un di e tres ruman muhénan ei. Kompará ku e otro dos rumannan, e tabatin mas tempu pa hasi e trabou di kibra piedra. Normalmente e tabata usa e sèn ku e tabata gana pa kubri gastunan di su famia. Pero, e biaha akí e tabata ke usa un tiki di e sèn ei pa logra kumpra un tablet. Asina ei, lo e por tabatin e app di JW Library^®. Hulda tabata sa ku e vidionan i otro informashon den e app lo yud’é mehorá den su sirbishi i yud’é komprondé Beibel mihó.

Pa un luna i mei, Hulda a traha dos ora èkstra tur mainta. Asina ei, el a logra kibra sufisiente piedra pa yena baki di un trùk chikitu. Por fin e tabatin sufisiente sèn pa kumpra un tablet.

Hulda a konta: “Mi tabata morto kansá i tur mi kurpa tabata due di tantu piedra ku m’a bati kibra. Pero asina ku mi tabatin mi tablet den mi man, tur doló a somentá pasó mi tabata por a usa e tablet pa prediká mas mihó i tabata mas fásil pa prepará pa reunion.” El a bisa tambe ku e tablet a yud’é ora e pandemia a kuminsá. E por a konektá ku e kongregashon pa reunion i pa prediká. Nos ta masha kontentu ku Hulda a logra su meta!