MI A nase dia 10 di desèmber 1936 na Wichita, Kansas, Merka. Nos ta kuater ruman, i mi ta esun di mas grandi. Mi mayornan, William ku Jean, tabata fiel sirbidónan di Yehova. Mi tata tabata e sirbidó di kongregashon. Asina nos tabata yama e ruman ku tabata dirigí e kongregashon. Mi mama a siña bèrdatnan di Beibel for di su mama, Emma Wagner. Emma a siña hopi hende e bèrdatnan ei, inkluso Gertrude Steele, kende a sirbi komo misionero pa hopi aña na Puerto Rico. * Pues tabatin hopi bon ehèmpel pa mi imitá.

Riba un djasabra anochi, tempu mi tabatin sinku aña, ami ku mi tata tabata ofresé e revistanan E Toren di Vigilansia i Konsuelo (awor Spièrta!) na hende ku tabata kana riba kaya. E tempu ei e pais tabata enbolbí den Segundo Guera Mundial. Un dòkter burachi a kana pasa i papia masha malu mes ku mi tata debí ku el a keda neutral. E dòkter a bisa mi tata ku e ta un kobarde ya ku e no kier a bai guera. E dòkter a para kara kara ku mi tata i bis’é: “Dal mi no, kobarde.” Mi tabata spantá, pero mi a atmirá mi tata. El a djis sigui ofresé revista na hende ku a aglomerá einan. Despues un sòldá a kana pasa, i e dòkter a grita: “Hasi algu k’e kobarde akí!” E sòldá por a mira ku e dòkter tabata burachi, i p’esei el a bis’é: “Bai kas pa bo bini bei!” Nan tur dos a kana bai. Mi ta apresiá mashá ku Yehova a duna mi tata kurashi. E tabata doño di dos barberia na Wichita, i e dòkter tabata un di su klientenan.

Tempu mi tabatin ocho aña, mi mayornan a bende nan kas i negoshinan, a traha un kas móbil chikitu i a muda bai kaminda tabatin nesesidat pa mas predikadó di Reino na Colorado. Nos a bai biba na Grand Junction, kaminda mi mayornan a sirbi komo pionero i tabata traha partaim na boerderij i rancho. Komo resultado di e bendishon di Yehova  i nan trabou zeloso, un kongregashon a ser formá. Dia 20 di yüni 1948, mi tata a batisá mi den un riu den seru huntu ku otro hende ku a aseptá e bèrdat, inkluso Billie Nichols ku su kasá. Mas despues, nan a drenta e trabou di sirkuito, i nan yu hòmber ku su kasá tambe a hasi e trabou ei.

Nos tabata bon amigu di hopi ruman ku tabata den e trabou di prediká e Reino i tabatin hopi kòmbersashonnan edifikante ku nan, spesialmente ku famia Steele—Don ku Earlene, Dave ku Julia i Si ku Martha, kendenan tabatin un gran influensia riba mi. Nan a mustra mi ku si mi pone e Reino na promé lugá, esei lo duna mi satisfakshon i goso den bida.

Tempu mi tabatin 19 aña, Bud Hasty, un amigu di nos famia, a pidi mi pa djòin e pa traha pionero den zùit di Merka. E superintendente di sirkuito a pidi nos pa muda bai Ruston, Louisiana, kaminda vários ruman a bira inaktivo. El a bisa nos pa tene e reunionnan tur siman, sin importá kuantu hende asistí. Nos a haña un bon lugá pa reuní, i nos a drech’é. Nos a tene tur reunion, pero pa un tempu, ta nos dos so tabata asistí. Un di nos tabata duna un parti miéntras e otro tabata duna tur komentario, i despues nos tabata bòltu e ròlnan. Si e parti tabatin demostrashon, nos dos tabata hasié, sin niun hende den ouditorio. Finalmente, un ruman muhé di edat a kuminsá asistí na reunion. Ku tempu, algun studiante di Beibel i tambe algun ruman inaktivo a kuminsá asistí na e reunionnan, i poko tempu despues, nos tabatin un kongregashon progresivo.

Un dia, ami ku Bud a topa un pastor di e Iglesia di Kristu. El a papia tokante algun teksto ku mi no tabata konosé. Esei a kita mi un poko fo’i base i a pone mi pensa mas profundo tokante loke mi tabata kere aden. Durante henter un siman, mi a keda lantá te anochi lat ta buska kontesta riba e preguntanan ku el a hasi. Esei ègt a yuda mi hasi e bèrdat di mi mes, i mi no por a warda pa papia ku un otro pastor.

Poko despues, e superintendente di sirkuito a pidi mi pa muda bai El Dorado, Arkansas, pa yuda un kongregashon einan. Tempu mi tabata einan, hopi bes mi tabata biaha bai Colorado pa presentá dilanti di un komité ku ta reklutá militar nobo. Riba un di e biahenan ei, mi a bai ku algun pionero den mi outo, pero nos a haña un aksidente, anto mi outo a keda total loss. Nos a yama un ruman hòmber pa bin buska nos, el a hiba nos na su kas i despues na reunion. Einan, e rumannan a anunsiá ku nos a haña un aksidente, i bondadosamente e  rumannan a duna nos sèn. Anto e ruman hòmber a bende mi outo pa 25 dòler (merikano).

Nos a haña un kabe’i boto pa bai Wichita, kaminda un bon amigu di nos, E. F. “Doc” McCartney, tabata traha pionero. Su yu hòmbernan oochi, Frank i Francis, tabata i ainda ta dos di mi mihó amigunan. Nan tabatin un outo bieu ku nan a bende mi pa 25 dòler, nèt e montante ku m’a haña pa mi outo di dal. Esei tabata e promé biaha ku mi a mira bon kla ku Yehova a perkurá pa mi nesesidat pasobra mi a pone interes di e Reino na promé lugá. Durante e bishita ei, famia McCartney a sera mi konosí ku un bunita ruman muhé ku yama Bethel Crane. Su mama, Ruth, un Testigu zeloso na Wellington, Kansas, a sigui traha pionero te ora e tabatin 90 i piku aña. Na aña 1958, despues di ménos ku un aña ku nos a konosé otro, ami ku Bethel a kasa, i el a djòin mi den e trabou di pionero na El Dorado.

Despues di a konsiderá e ekselente ehèmpelnan ku nos a lanta kuné, nos a disidí di hasi nos mes disponibel pa loke sea ku e organisashon di Yehova pidi nos pa hasi. Nos a ser asigná pa traha komo pionero spesial na Walnut Ridge, Arkansas. Na 1962, nos a keda masha kontentu ora nos a haña invitashon pa asistí na e di 37 klas di e Skol di Galaad. Anto pa nos sorpresa, Don Steele tambe tabata den e mesun klas. Ora nos a gradua, nos a ser asigná pa sirbi na Nairobi, Kenia. Nos hemut a yena segun ku nos tabata sali for di New York, pero e tristesa ei a bira alegria ora nos a topa nos rumannan na e aeropuerto di Nairobi.

Mesora nos a gusta Kenia i nos sirbishi einan. Nos promé estudio di Beibel ku a progresá tabata ku Chris ku Mary Kanaiya. Te awe nan ta traha fielmente den e sirbishi di tempu kompleto na Kenia. E siguiente aña, e organisashon a pidi nos pa muda bai Kampala, Uganda. Nos tabata e promé misioneronan den e pais ei. Esei tabata dushi tempu pasobra hopi hende tabatin masha gana di siña bèrdatnan di Beibel, i nan a bira nos rumannan. Pero despues di tres aña i mei na Afrika, nos a bai Merka bèk pa kuminsá un famia. E dia ku nos a bai laga Afrika nos tabata mas tristu ku dia nos mester a bai laga New York. Nos a bin stima e hendenan na Afrika i a spera di por regresá un dia.

Nos a bai biba den e serunan den wèst di Colorado, kaminda mi mayornan tabata biba. Poko despues, nos yu muhé Kimberly a nase, i 17 luna despues, nos a haña Stephany. Nos a tuma nos asignashon komo mayor masha na serio, i nos tabata determiná pa inkulká e bèrdat den nos yunan. Nos kier a imitá e ehèmpelnan ku nos a haña. Un bon ehèmpel por ta un gran yudansa pa moldia nos yunan, ma esei no ta un garantia ku nan lo sigui sirbi Yehova. E pensamentu ei tabatin nos un poko preokupá. Mi ruman hòmber i ruman muhé mas chikitu a bandoná e bèrdat. Ban spera ku un dia nan lo bolbe imitá e ehèmpelnan ekselente ku nan a haña.

Tabata dushi pa lanta nos yu muhénan, i semper nos tabata purba di hasi kos huntu komo famia. Komo ku nos tabata biba banda di Aspen, Colorado, nos tur a siña ski pa asina de bes en kuando nos por a ski huntu. Rekreo a duna nos tempu pa kòmbersá ku nos yunan segun ku nos tabata subi e left di ski. Tambe nos tabata bai kamper ku nan, i nos tabatin kòmbersashonnan masha ameno rònt  di kampvür. Maske nan tabata yòn, nan tabata hasi preguntanan manera: “Kiko lo mi hasi ora mi bira grandi? Ki tipo di kasá lo mi ke?” Nos a hasi esfuerso pa inkulká normanan di Dios den mente i kurason di nos yunan. Nos a keda kòrda nan riba e meta di drenta sirbishi di tempu kompleto i ku ta sabí pa kasa solamente ku un hende ku tin mesun meta ku nan. Nos a yuda nan komprondé ku ta mihó pa no kasa muchu yòn. Nos a bini ku e frase akí: “Saka kasamentu fo’i bo kabes te ora bo hasi 23.”

Meskos ku nos mayornan, nos a hasi esfuerso pa bai e reunionnan i partisipá regularmente den sirbishi komo famia. Nos a laga algun ruman den sirbishi di tempu kompleto alohá na nos kas. Ademas, nos tabata papia ku masha smak tokante e tempu ku nos tabata sirbi komo misionero. Nos tabata bisa nan ku un dia nos lo ke bishitá Afrika komo famia. Nos yunan tabatin masha gana di hasi esei.

Semper nos Adorashon Komo Famia tabata riba un base regular, i durante nos estudio nos tabata aktua situashonnan ku por a presentá na skol. Nos tabata laga e muchanan hunga e ròl di un Testigu ku ta kontestá pregunta. Nan tabata gusta e manera di siña ei, i esei tabata duna nan konfiansa. Segun ku nan tabata krese, tin biaha nan no tabatin gana di hasi Adorashon Komo Famia. Un biaha, komo ku mi tabata fadá, mi a bisa nan pa bai den nan kamber i ku nos lo no studia. Nan a keda di shòk i a kuminsá yora i bisa ku nan kier a studia. E ora ei nos a realisá ku en bèrdat nos tabata inkulká apresio pa kosnan spiritual den nan kurason. Nan a bin gusta Adorashon Komo Famia, i nan por a ekspresá nan mes libremente. Pero tin biaha tabata difísil pa tende nan bisa ku nan no tabata di akuerdo ku algun aspekto di e bèrdat. Ma asina nos a haña sa kiko realmente tabatin den nan kurason. Despues ku nos a rasoná ku nan, nan tabata keda satisfecho ku Yehova su manera di pensa tokante sierto asuntunan.

E proyekto di lanta nos yunan a bai muchu mas lihé ku nos por a imaginá. Ku yudansa i guia di e organisashon di Dios, nos a hasi nos bèst pa lanta nan ku amor pa Yehova. Nos a keda masha kontentu ora tur dos yu a kuminsá traha pionero regular despues ku nan a kaba skol sekundario, i nan a desaroyá abilidatnan ku a yuda nan perkurá pa nan mes finansieramente. Nan a muda bai Cleveland, Tennessee, huntu ku dos otro ruman muhé pa sirbi kaminda tabatin nesesidat pa mas predikadó di Reino. Nos tabata sinti nan falta masha hopi mes, pero nos tabata kontentu ku nan tabata usa nan bida pa traha den sirbishi di tempu kompleto. Ami ku Bethel a kuminsá traha pionero regular atrobe, i esei a habri kaminda pa otro privilegionan maravioso. Mi a sirbi komo superintendente di sirkuito supstituto, i tambe nos a yuda durante e kongresonan.

Promé ku nos yunan a muda bai Tennessee, nan a bai Lònden, Inglatera, ku fakansi i a bishitá e sukursal. Einan, Stephany, ku e tempu ei tabatin 19 aña, a konosé Paul Norton, un bètelita yòn. Durante un otro fakansi, Kimberly a konosé Brian Llewellyn, un di Paul su kompañeronan di trabou. Paul ku Stephany a kasa, pero despues ku el a hasi 23 aña. Brian ku Kimberly a kasa e aña despues, ora e tabatin 25 aña. Pues nan a keda soltero te ora nan tabatin por lo ménos 23 aña. Nan a skohe un bon kasá, i nos a aprobá nan eskoho di henter kurason.

Nos yunan a bisa nos ku nos ehèmpel i e ehèmpel di nan welanan a yuda nan obedesé e mandamentu di Hesus pa ‘sigui buska promé e Reino,’ asta ora nan tabatin problema finansiero. (Mat. 6:33) Na aprel 1998, Paul ku Stephany a haña invitashon pa asistí na e di 105 klas di e Skol di Galaad, i despues di esei nan a ser asigná pa sirbi na Malawi, Afrika. Den mesun tempu, Brian ku Kimberly a haña invitashon pa traha na e Bètel di Lònden, i despues nan a manda nan na e Bètel di Malawi. Nos tabata masha kontentu mes, ya ku esaki ta e mihó manera pa hóbennan usa nan bida.

Na yanüari 2001, mi a haña e yamada di telefòn ku mi a relatá na prinsipio. Ruman Marais, e superintendente di e departamento di Servisionan di Tradukshon, a splika mi ku nan ke kuminsá duna  kurso di ingles na timnan di tradukshon rònt mundu i ku, na edat di 64 aña, nan kier a entrená mi pa bira un di e instruktornan. Ami ku Bethel a hasi orashon tokante esei i a papia tokante e asuntu ku nos mamanan di edat pa haña nan konseho. Nan tur dos tabata ke pa nos bai apesar ku nan lo no tabatin nos yudansa mas. Mi a yama e ruman bèk pa bisa ku nos lo ta masha kontentu pa hasi nos mes disponibel pa e privilegio maravioso ei.

Nèt den e tempu ei, dòkter a diagnostiká mi mama ku kanser. Nos a bis’é ku nos lo keda pa yuda mi ruman Linda kuid’é. Mi mama a bisa: “Bo no ta bai hasi e kos ei. Lo mi sinti mi mas malu ainda si bo no bai.” Linda tabata pensa meskos. Nos a apresiá nan spiritu di sakrifisio propio mashá i tambe e yudansa ku e rumannan lokal a duna. E dia despues ku nos a yega e Sentro Edukativo di Watchtower na Patterson, Linda a yama nos pa bisa ku mi mama a fayesé. Pero nos a enfoká riba nos trabou nobo, manera lo el a animá nos pa hasi.

Pa nos sorpresa, nos promé asignashon tabata na e sukursal di Malawi, kaminda nos yunan i nan kasá tabata sirbi. Esei sí tabata un reenkuentro gososo! Despues nos a duna e kurso na Zimbabwe, i mas despues na Zambia. Despues di a duna e kurso pa tres aña i mei, nan a pidi nos pa bai Malawi bèk pa dokumentá eksperensia di rumannan ku a sufri persekushon einan debí ku nan a mantené nan neutralidat kristian. *

Un biaha mas tabata tristu pa regresá nos kas na Basalt, Colorado, na 2005. Ami ku Bethel a sigui traha pionero einan. Na 2006, Brian ku Kimberly a muda i bin biba banda di nos pa lanta nan dos yu muhénan, Mackenzie ku Elizabeth. Ainda Paul ku Stephany ta na Malawi, kaminda Paul ta sirbi den e Komité di Sukursal. Awor ku mi tin kasi 80 aña di edat, ta un plaser pa mira ruman hòmbernan yòn ku ántes mi tabata traha kuné haña e responsabilidatnan ku un tempu ami tabatin. Gran parti di e goso ku nos tin ta danki na e ekselente ehèmpelnan ku nos a haña i danki na e esfuerso diligente ku nos a hasi pa imitá nan pa asina nos por a yuda nos yu- i ñetanan.