MÚSIKA tabata algu masha importante den e kultura di Israel. Vários kaminda den Beibel bo ta lesa di hende ku ta toka instrumènt i kanta. De echo, kasi dies porshento di Beibel ta kantika. Por ehèmpel tin: Salmonan, Kantikanan di Sálomon i Lamentashon. E buki Music in Biblical Life, ta bisa ku Beibel ta mustra bon kla ku e israelitanan tabata usa músika den diferente aktividat di nan bida.

Den bida di tur dia. E israelitanan tabata kanta i toka instrumènt pa ekspresá nan sintimentunan. (Isa. 30:29) Hende muhé tabata toka tamburein, kanta kantikanan alegre i baila durante selebrashonnan manera ora un rei nobo ser koroná, ora sòldánan gana guera i durante fiestanan pa Yehova. (Hues. 11:34; 1 Sám. 18:​6, 7; 1 Rei. 1:​39, 40) Ora un ser kerí muri tambe e israelitanan tabata kanta. (2 Kró. 35:25) Sin duda, manera McClintock and Strong’s Cyclopedia ta bisa, e israelitanan tabata stima músika masha hopi mes.

Den palasio. E reinan di Israel tabata gusta skucha músika. Por ehèmpel, Rei Saul a manda su mensaheronan trese David na su palasio pa toka arpa p’e. (1 Sám. 16:​18, 23) Ora David mes a bira rei, el a inventá instrumènt, komponé kantika bunita i a organisá e orkesta ku tabata bai toka despues den e tèmpel di Yehova. (2 Kró. 7:6; Ámos 6:5) Anto Rei Sálomon tabatin kantantenan hòmber i muhé den su palasio.—Ekl. 2:8.

Den adorashon. Mas importante ainda, e israelitanan tabata usa músika den nan adorashon na Yehova. Na e tèmpel na Herúsalèm tabatin 4.000 hòmber ku tabata toka simbal, instrumèntnan di kuèrdè, arpa i tròmpèt. (1 Kró. 23:5; 2 Kró. 5:12) Pero, no ta e músikonan profeshonal ei so tabata adorá Yehova ku músika. Hopi israelita tabata kanta ora nan tabata na kaminda pa Herúsalèm pa selebrá e fiestanan anual. Loke nan tabata kanta yama Kantika pa Hende Ku Ta Subi Bai Stat. (Sal. 120-134) Anto segun obranan hudiu antiguo, e israelitanan tabata kanta tambe Salmonan Halel a durante sena di Pasku Hudiu.

Te ainda músika ta masha importante pa Yehova su sirbidónan. (Sant. 5:13) Nos ta kanta pa alabá Yehova. (Efe. 5:19) Músika ta uni nos ku nos rumannan. (Kol. 3:16) Tambe e ta fortalesé nos ora nos ta pasa den situashonnan difísil. (Echo. 16:25) Músika ta un bunita manera pa demostrá nos fe den Yehova i nos amor p’e.