Esaki tabata djis ún di e tantísimo kosnan ku Hesus su enemigunan a kritiká é i su disipelnan p’e. E Lei di Moises a splika kiko lo a hasi hende impuru, por ehèmpel, emishon di sémen, menstruashon, lepra òf mishimentu ku kadaver di hende òf bestia. Tambe e Lei a bisa kon nan por a bira puru atrobe. Nan por a hasi esei mediante un sakrifisio, labamentu òf sprengumentu di awa.—Lev., kap. 11-15; Num., kap. 19.

E rabinan hudiu a amplia riba kada detaye di e leinan akí. Segun un obra di konsulta, pa kada tipo di impuresa, “mester a wak bou di ki sirkunstansianan un hende por a bira impuru, kon i te na ki grado e por a kontagiá otro hende, e artíkulonan i ophetonan ku por a bira impuru i kua nò, i finalmente, e medionan i ritualnan ku mester a kumpli kuné pa bira puru atrobe.”

E enemigunan di Hesus a puntr’é: “Pakiko bo disipelnan no ta kumpli ku tradishon di hende di ántes, ma ta kome nan kuminda ku man impuru?” (Mar. 7:5) E enemigunan di Hesus ei no tabata ke men ku ta insaludabel pa kome ku man sushi. E rabinan a bini ku un regla ku promé ku un hende kome, e mester a basha awa riba su man komo parti di un ritual. E obra di konsulta ta sigui bisa ku e rabinan a “debatí tambe tokante kua poron mester a usa pa basha awa, ki tipo di awa mester a usa, ken mester a basha e awa i kua parti di e man i brasa mester a haña awa.”

Kiko Hesus a pensa di tur e reglanan akí ku hende a bini kuné? El a bisa e lidernan religioso hudiu di promé siglo: “Ku rason Isaías a profetisá tokante boso, hipókritanan, manera ta pará skirbí: ‘E pueblo akí ta onra mi ku nan lep, ma nan kurason ta masha leu for di mi [esta, Yehova]. Ta pòrnada nan ta sigui adorá mi, pasobra nan ta siña mandamentu di hende komo doktrina.’ Boso ta neglishá mandamentu di Dios i ta pega estriktamente na tradishon di hende.”—Mar. 7:6-8.