• “P’ami, tabata komo si fuera bes tras bes mi esposo tabata kòrta mi orea.”

• “M’a sinti mi hopi humiá, asta ku mi no tabata bal nada i ku mi no tabata atraktivo pa mi kasá.”

• “Mi no por a papia ku niun hende tokante e kos akí. Mi tabata sufri mi so.”

• “M’a sinti mané Yehova no stima mi.”

E palabranan ei ta mustra kuantu un esposa ta sufri ora su kasá ta wak pornografia. Anto si e esposo ta hasiendo esei den skondí, kisas pa algun luna òf aña, e esposa por sinti ku e no por konfi’é mas. Un esposa a bisa: “Mi tabata puntra mi mes: ‘Ta ken e hòmber akí ta? Kiko mas e ta hasiendo ku mi no sa?’”

E artíkulo akí a ser skirbí spesialmente pa esposanan ku nan kasá ta wak pornografia. a Nos lo analisá algun prinsipio di Beibel ku lo yuda esposanan sinti nan mas será ku Yehova i mira kon presioso nan ta p’e. E prinsipionan ei tambe lo konsolá nan i yuda nan haña nan pas bèk. b

Bo no por kontrolá tur loke bo esposo ta hasi, pero tin algun kos ku bo por hasi pa bo sinti bo ménos anshá. Ban wak kiko nan ta.

No kulpa bo mes. Kisas un esposa ta sinti ku ta pa su falta su kasá ta wak pornografia. Alice c tabata sinti ku e problema tabata sintá na dje, ku e no ta sufisiente bon. E tabata puntra su mes: “Dikon mi kasá ta preferá di wak otro hende muhé?” Tin esposa ta pensa ku e manera ku nan a reakshoná a hasi e situashon pió i nan ta kulpa nan mes pa esei. Danielle a bisa: “Mi tabata asina amargá i rabiá ku mi tabata sinti ku mi tabata destruí nos matrimonio ku mi aktitut.”

Si bo ta sinti asina, no lubidá ku pa Yehova, abo no ta responsabel pa loke bo esposo ta hasi. Santiago 1:14 ta bisa: “Kada hende ta ser poné na prueba ora e ser atraí i sedusí pa su mes deseo.” (Rom. 14:12; Flp. 2:12)  Pues, pa Yehova bo no ta kulpabel. Al kontrario, e ta balorá bo lealtat.—2 Kró. 16:9.

Ta bon pa sa tambe ku si un esposo ta wak pornografia, esei no ta pasó su kasá no ta sufisiente bon. Algun eksperto ta splika ku pornografia ta krea deseo i fantasia seksual ku niun hende muhé no por satisfasé.

Purba di no preokupá di mas. Catherine a bisa ku e úniko kos ku e tabata pensa riba dje ta si su kasá ta wak pornografia. Frances a bisa: “Ora mi no sa unda mi esposo ta, mi ta kuminsá bira nèrvioso. Mi ta biba den un ansha.” Otro esposa a bisa kuantu bèrgwensa nan ta sinti ora nan ta rònt di ruman ku kisas sa di nan kasá su problema. I tin otro ta sinti nan nan so pasó nan ta pensa ku niun hende no ta komprondé nan situashon.

E sintimentunan ei ta normal. Pero si bo keda pensa riba nan, lo bo sinti bo mas anshá. Lo ta mihó pa bo purba di focus riba bo amistat ku Yehova. Esei lo duna bo e forsa pa sigui padilanti.—Sal. 62:2; Efe. 6:10.

Algu ku por yuda bo ta di lesa i meditá riba e relatonan den Beibel di hende muhé ku tabata sinti nan hopi anshá, pero ku a hasi orashon na Yehova i a haña konsuelo. No ta semper Yehova a solushoná nan problemanan, pero el a duna nan pas sí. Por ehèmpel, “Ana tabata kibrá” debí na e situashon ku e tabata aden. Pero despues ku el a “hasi orashon na Yehova” pa basta ratu, el a sinti un pas, aunke ku e no tabata sa kon kosnan lo a sigui.—1 Sám. 1:10, 12, 18; 2 Kor. 1:3, 4.

Pidi yudansa serka e ansianonan. Nan ta “manera un lugá di skonde kontra bientu, un refugio kontra áwaseru pisá.” (Isa. 32:2, nota) Kisas nan por rekomendá bo un ruman muhé ku bo por konfia i papia habrí kuné i ku por konsolá bo.—Pro. 17:17.

Bo por yuda bo kasá stòp ku su hábito di wak pornografia? Kisas. Beibel ta bisa ku pa solushoná un problema òf pa tumba un enemigu poderoso, “dos ta mihó ku un.” (Ekl. 4:9-12) Ekspertonan a haña sa ku ta mas fásil pa vense e adikshon di pornografia i restorá e konfiansa den matrimonio ora esposo i esposa ta traha huntu pa logra esei.

 Ta klaru ku tur kos ta dependé si bo kasá ègt ke stòp di wak pornografia. El a roga Yehova pa dun’é forsa i a bai serka e ansianonan pa yudansa? (2 Kor. 4:7; Sant. 5:14, 15) El a tuma algun medida ku por yud’é stòp di wak pornografia? Por ehèmpel, el a pone límite den su uso di aparato elektróniko i ta evitá situashonnan ku por lag’é kai den tentashon? (Pro. 27:12) E ta dispuesto pa aseptá bo yudansa i ta kompletamente onesto ku bo? Si ta asina, kisas bo por yud’é.

Laga nos wak kon un pareha kasá, Felicia ku Ethan, ta hasi esei. Ethan a bira adikto na pornografia fo’i tempu ku e tabata yòn. Felicia tin pasenshi i semper ta habrí pa skuch’é. Pues, ki ora ku Ethan sinti e gana di wak pornografia, e por papia ku Felicia libremente. Ethan a bisa: “Mi ta habrí i franko ku mi kasá. E ta trata mi ku masha kariño. E ta yuda mi pone límite pa evitá tentashon i regularmente e ta puntra mi kon ta bayendo. Ademas e ta yuda mi ku mi uso di Internet.” Ta bèrdat ku no ta nada fásil pa Felicia mira su kasá lucha kontra e hábito di wak pornografia. Pero Felicia a bisa: “Pa kon rabiá òf di hùrt ku mi por ta, mi sa ku e sintimentunan ei lo no yuda mi kasá skapa di su adikshon. P’esei, promé nos ta papia tokante su lucha i despues mi ta haña chèns di bisa kon loke el a trese dilanti ta afektá mi. Esei ta yud’é pa ta mas determiná pa evitá pornografia i gana mi konfiansa atrobe.”

Kòmbersashonnan sinsero asina ta yuda un esposo evitá di wak pornografia. Pero tambe nan ta yuda e esposa haña konfiansa bèk den su esposo. Lo ta mas fásil pa e konfia su esposo si e esposo no ta skonde nada p’e, ta dispuesto pa papia habrí kuné tokante su debilidatnan i ta bis’é unda e ta bai i kiko e ta hasi.

Bo ta kere bo por duna bo kasá e tipo di yudansa ei? Si ta asina, boso por trata e artíkulo akí huntu. Meta di bo esposo mester ta pa stòp di wak pornografia i gana bo konfiansa bèk. En bes di kunsumí òf bira iritá pasó bo ke papia tokante su problema, e mester purba di komprondé kon e problema ei ta afektá abo. Bo meta mester ta pa anim’é p’e sigui hasi esfuerso i dun’é chèns di gana bo konfiansa bèk. Boso tur dos mester komprondé kiko ta pone ku un hende ta haña gana di wak pornografia i kon pa vense e adikshon ei. d

 Si bo tin miedu ku boso no por keda kalmu durante boso kòmbersashonnan, pidi dos ansiano di konfiansa pa e t’ei durante algun di boso kòmbersashonnan. Tene kuenta ku asta despues ku bo esposo a logra stòp di wak pornografia, kisas lo tuma bo tempu pa bolbe konfi’é. Pero no entregá. Purba di focus riba kon pokopoko boso relashon ku otro ta mehorando. Karga speransa ku, ku tempu i pasenshi, boso matrimonio lo bira fuerte atrobe.—Ekl. 7:8; 1 Kor. 13:4.

Kiko si bo esposo haña un rekaida? Esei ke men ku e no a arepentí i ku e ta un kaso pèrdí? No nesesariamente. Si e ta adikto na pornografia, kisas lo e tin ku lucha ku e problema ei pa restu di su bida. E por haña rekaida asta despues ku e tin basta aña sin ta wak pornografia. Pa evitá di bolbe haña un rekaida e tin ku tuma medidanan mas drástiko i semper tene su mes na nan asta ora ku ta parse ku el a vense e problema. (Pro. 28:14; Mat. 5:29; 1 Kor. 10:12) Lo e mester ‘renobá e forsa ku ta motivá su mente’ i siña “odia loke ta malu.” Esei ta inkluí pornografia i kualke práktika impuru, manera masturbashon. (Efe. 4:23; Sal. 97:10; Rom. 12:9) E ta dispuesto pa hasi tur esei? Si ta asina, tin speransa. e

Pero kiko bo por hasi si bo kasá no ke hasi nada pa vense su adikshon? Den e kaso ei, ta normal ku bes tras bes lo bo sinti bo desepshoná, traishoná i te asta rabiá. Papia ku Yehova tokante bo preokupashonnan. Esei lo yuda bo haña bo pas bèk. (1 Ped. 5:7) Sigui hala serka Yehova pa medio di estudio personal, orashon i meditashon. I bo por tin sigur ku e tambe lo hala serka bo. Isaías 57:15 ta bisa ku Yehova ta biba huntu ku “hende kibrá i desanimá” i ke yuda nan haña nan goso bèk. Sigui hasi bo bèst pa sirbi Yehova, buska yudansa serka e ansianonan i no pèrdè speransa ku un dia bo kasá lo kambia.—Rom. 2:4; 2 Ped. 3:9.