Ora nos ta lesa Beibel, tin vários kos ku por yuda nos komprondé mihó loke nos ta lesa. Klaru, nos no ke djis yena nos kabes ku konosementu di Beibel. Nos meta mester ta pa stima Yehova mas. I pa nos stim’é mas, nos mester sa ken e ta realmente. Pa logra esei, puntra bo mes: ‘Kiko e relato akí di Beibel ta siña mi tokante Yehova?’

Ora nos ta lesa Beibel, nos por presta atenshon na e manera ku Yehova ta mustra amor, sabiduria, hustisia i poder. Pero eseinan no ta e úniko kualidatnan ku Yehova tin. E tin mas kualidat bunita. Unda bo por bai pa haña sa mas tokante su kualidatnan?

Bo por bai den Guia pa Buska Informashon den Publikashonnan di Testigunan di Yehova. Bou di e tópiko “Yehova Dios,” buska e suptema “Yehova Su Kualidatnan.” Djei, focus riba e kualidatnan ku bo lesamentu di Beibel a resaltá.